រាជធានីភ្នំពេញ ៖ លោកវេជ្ជបណ្ឌិត ហុង សុខឃាង បានប្រាប់កោះសន្តិភាពឱ្យដឹងថា ការបំបៅកូនដោយទឹកដោះម្តាយ គឺមានប្រយោជន៍ច្រើនយ៉ាងដូចជា ជួយការពារទារក ទប់ទល់ជំងឺឆ្លង ជំងឺអាលែកហ្ស៊ី និងជំងឺរ៉ាំរ៉ៃជាច្រើនទៀត ។ វិធីជ្រើសរើសដែលល្អបំផុតនោះត្រូវបំបៅកូនដោយទឹកដោះមួយមុខគត់ យ៉ាងហោចណាស់ឱ្យបានរយៈពេល៦ខែ ហើយប្រសិនបើមាតាគ្រប់រូបបំបៅដោះកូនរហូតដល់១២ខែ កាន់តែល្អសម្រាប់ទារក ធ្វើឱ្យកូនរបស់លោកអ្នកមានបញ្ញាឈ្លាសវៃទៀតផង ។
ជាទូទៅសារប្រយោជន៍ដែលបានមកពីទឹកដោះម្តាយសម្រាប់ទារកមានដូចជា៖
១-ការបំបៅដោះកូនមានប្រយោជន៍ជួយទប់ទល់ជំងឺឆ្លងតាមរយៈប្រព័ន្ធការពារដែលគេហៅថា «អង់ទីគ័រ» ដែលមាននៅក្នុងទឹកដោះម្តាយ។ វាអាចការពារជំងឺឆ្លងបានច្រើនយ៉ាងដូចជាជំងឺរលាកត្រចៀក ជំងឺរាក ជំងឺរលាកផ្លូវដង្ហើម និងកាត់បន្ថយជំងឺរលាកស្រោមខួរក្បាល ។
២-ការពារទប់ទល់អាលែកហ្ស៊ី ការពារជំងឺហឺត ជំងឺទឹកនោមផ្អែម ជំងឺធាត់តិចជាងកុមារដែលបៅទឹកដោះគោ ។
៣-ទឹកដោះម្តាយផ្តល់នូវសារធាតុចិញ្ចឹមគ្រប់គ្រាន់ ហើយទឹកដោះម្តាយងាយស្រួលរំលាយ និងស្រូបយកបានល្អជាងទឹកដោះគោ ដែលមិនធ្វើឱ្យឈឺពោះ ហើមពោះ ឬរាកនោះទេ ។
៤-ទឹកដោះម្តាយមានរសជាតិគ្រប់បែបយ៉ាង ធ្វើឱ្យកុមារទទួលបានវីតាមីន និងថាមពលគ្រប់គ្រាន់ ។ ហើយរសជាតិនៃទឹកដោះម្តាយនោះបានផ្លាស់ប្តូរគ្រប់រសជាតិទៅតាមចំណីអាហារដែលម្តាយទទួលទាន ។
៥-មានលក្ខណៈងាយស្រួលក្នុងការបំបៅកូនដោយទឹកដោះម្តាយ មិនចាំបាច់មានកំប៉ុង មិនចាំបាច់មានក្បាលដោះជ័រ និងមិនចាំបាច់លាងសម្អាត ដោយស្ងោរឡើយ គ្រាន់តែលាងដោះឱ្យស្អាតជាញឹកញាប់ជាការស្រេច ។
៦-ទឹកដោះម្តាយការពារមិនឱ្យកើតជំងឺធាត់ទៅលើទារកផងដែរ ។
៧-ទារកដែលបំបៅដោះម្តាយមានបញ្ញាឈ្លាសវៃជាងទារកដែលបៅទឹកដោះគោ ។ មិនតែប៉ុណ្ណោះសុខភាពផ្លូវចិត្តរបស់ទារកល្អ និងបង្កើតភាពស្និទ្ធស្នាលរវាងម្តាយនិងកូនបានល្អថែមទៀតផង។
៨-ទារកដែលបៅដោះម្តាយជួយឱ្យម្តាយកាត់បន្ថយអត្រាគ្រោះថ្នាក់ពីជំងឺបេះដូង និងកាត់បន្ថយអត្រាគ្រោះថ្នាក់ឡើងទម្ងន់ ព្រមទាំងផ្តល់ឱ្យម្តាយនូវមធ្យោបាយពន្យារកំណើតពីការឆាប់មានផ្ទៃពោះ និងកាត់បន្ថយអត្រាជំងឺមហារីកមាត់ស្បូន ជំងឺក្រពេញ និងកាត់បន្ថយជំងឺមហារីកផ្សេងទៀត ។
៩-បៅទឹកដោះម្តាយមិនចំណាយប្រាក់ ហើយជួយសន្សំប្រាក់ពីការចំណាយលើជំងឺផ្សេងៗ ព្រោះទឹកដោះម្តាយជួយកាត់បន្ថយជំងឺបានច្រើន ។
ប៉ុន្តែការបំបៅកូនដោយទឹកដោះម្តាយក៏មានគុណវិបត្តិតិចតួចផងដែរ ដូចជា ៖
១-អាចធ្វើឱ្យម្តាយពិបាកងើប អង្គុយ បំបៅនៅពេលទារកយំម្តងៗ បណ្តាលឱ្យម្តាយឈឺឆ្អឹងឆ្អែង ចុកខ្នង មិនស្រួលខ្លួន ។
២-បំបៅដោះម្តាយត្រូវបំបៅញឹកញាប់ជាងទឹកដោះគោម្សៅ ។
៣-ម្តាយដែលបំបៅដោះកូនដោយទឹកដោះត្រូវតែទទួលទានអាហារដោយមានការប្រុងប្រយ័ត្ន មិនអាចទទួលទានផ្តេសផ្តាសទេ ព្រោះអាចបណ្តាលឱ្យទារកមានជំងឺផ្សេងៗ ។
៤-ទារកជួបផលលំបាកនៅពេលដែលម្តាយមានជំងឺ ដូចជាពេលប្រើប្រាស់ថ្នាំច្រើន គឺធ្វើឱ្យទារកមិនអាចបៅទឹកដោះពីម្តាយបានឡើយ ព្រោះវាអាចបង្កបញ្ហាគ្រោះថ្នាក់ដល់ទារក ៕
ចែករំលែកព័តមាននេះ