ខេត្តកំពង់ចាម ៖ សត្វឈ្លូសឈ្មោល១ក្បាលមានទម្ងន់ប្រហែល២០គីឡូក្រាម បានរត់ទាំងត្រហេបត្រហប ដែលសង្ស័យរត់គេចពីការតាមប្រមាញ់របស់ព្រានព្រៃ ចូលស្នាក់ការគយ និងរដ្ឋាករប្រចាំច្រកទ្វារត្រពាំងផ្លុង ស្រុកពញាក្រែក ។ ហេតុការណ៍ភ្ញាក់ផ្អើលកម្រជួបនេះកើតឡើងកាលពីវេលាម៉ោង៨ព្រឹកថ្ងៃទី១៦ ឧសភា ២០១២ ហើយត្រូវសមត្ថកិច្ចគយចាប់រក្សាទុក និងត្រៀមប្រគល់ឱ្យទៅអង្គការអភិរក្សសត្វព្រៃយកទៅរក្សាការពារ ។
លោកសំរិទ្ធ សុខហួន អនុប្រធានស្នាក់ការគយត្រពាំងផ្លុង ឱ្យដឹងថា ខណៈពេលរូបលោកកំពុងធ្វើការនៅក្នុងការិយាល័យ ស្រាប់តែឮសូរសំឡេងគេភ្ញាក់ផ្អើលឆោឡោនៅខាងក្រៅ ។ ពេលចេញទៅមើលស្រាប់តែឃើញសត្វឈ្លូស១ក្បាលបោលចូលក្នុងបរិវេណស្នាក់ការរបស់លោក ។ បន្ទាប់មកសត្វឆ្កែរត់ដេញខាំឈ្លូសនោះបណ្តាលឱ្យវារងរបួសត្រង់ជើងខាងក្រោយ ។ ប្រហែលជា៥នាទីទើបដេញចាប់ឈ្លូសនោះបាន ហើយយកទៅចងទុកនៅខាងក្រោមដើមឈើ ដែលមានម្លប់រង់ចាំប្រគល់ឱ្យអង្គការអភិរក្សសត្វព្រៃមកពីភ្នំពេញ ។
ប្រជាពលរដ្ឋប្រាប់ថា មុននេះ១ថ្ងៃ គឺនៅថ្ងៃទី១៥ ឧសភា ក៏មានសត្វឈ្លូសញី១ក្បាលមានទម្ងន់ប្រហែលឈ្លូសឈ្មោលនោះដែរ ត្រូវប្រជាជនចាប់បាន ហើយយកទៅធ្វើម្ហូបទទួលទានអស់ទៅហើយ ។លោកសំរិទ្ធ សុខហួន អនុប្រធានស្នាក់ការគយត្រពាំងផ្លុងបញ្ជាក់ថា ឈ្លូស១ក្បាលដែលរត់ចូលក្នុងបរិវេណស្នាក់ការគយរបស់លោក មិនមែនជារបស់អ្នកចិញ្ចឹមទេ គឺរត់ចេញពីក្នុងព្រៃកម្ពុជា ហើយសង្ស័យថា វារត់គេចពីការតាមប្រមាញ់របស់ព្រានព្រៃ ។
រហូតមកដល់ម៉ោង១សៀលថ្ងៃដដែល មន្ត្រីរដ្ឋបាលព្រៃឈើទៅដល់ ហើយសហការជាមួយអង្គការអភិរក្សសត្វព្រៃទទួលយកឈ្លូសនោះ ។ គេនិយាយថា ប្រសិនបើឈ្លូសឈ្មោល១ក្បាលនោះចូលខុសពីកន្លែងគយ អាចនឹងក្លាយទៅជាម្អូបអាហារមិនខាន៕
ចែករំលែកព័តមាននេះ