មេបញ្ជាការកម្ពុជា-ថៃប្រចាំទិសតំបន់ព្រំដែនប្រាសាទព្រះវិហារឈរជើងនៅភ្នំទ្រព្យបានជួបពិភាក្សាគ្នាកាលពីវេលាព្រឹកថ្ងៃពុធ ទី១៦ កុម្ភៈ នេះ ដើម្បីសម្រួលស្ថានការណ៍ដែលនៅតែមានសភាពតានតឹង ខណៈពេលដែលទាហានសៀមនៅតែបន្តគប់គ្រាប់បែក និងបាញ់កាំភ្លើងធំក្នុងចេតនាបង្កសង្គ្រាមជាមួយកម្ពុជានោះ ។ នេះបើយោងតាមការបញ្ជាក់ប្រាប់តាមទូរស័ព្ទពីលោកឧត្តមសេនីយ៍ទោ ស្រី ឌឹក មេបញ្ជាការកងពលអន្តរាគមន៍លេខ៣ ប្រចាំទិសព្រំដែនប្រាសាទព្រះវិហារ ដែលប្រាប់កោះសន្តិភាពនៅប៉ុន្មាននាទីមុននេះ ។
លោកឧត្តមសេនីយ៍ទោ ស្រី ឌឹក បន្តថា កិច្ចប្រជុំនេះខាងកម្ពុជាដឹកនាំដោយលោកឧត្តមសេនីយ៍យឹម ពឹម ហើយការប្រជុំនេះបានធ្វើឡើងនៅចំណុចភ្នំទ្រព្យ ។ លោក ស្រី ឌឹក បន្ថែមថា កាលពីយប់មិញនេះ ទាហានថៃបានបាញ់កាំភ្លើងប្រភេទបេ៦០, ៧០ និង៨០មីល្លីម៉ែត្រ រួមនឹងការគប់គ្រាប់បែកដៃយ៉ាងច្រើនគិតទៅជិត១០០គ្រាប់ចូលតំបន់ភ្នំទ្រព្យ ប៉ុន្តែកម្ពុជាមិនតដៃនោះទេ ។ ការបាញ់ និងគប់គ្រាប់បែកដៃនេះ ទាហានថៃអះអាងថា ដោយសារខ្លាចខ្មោចទាហានសៀម ហើយថា នៅក្នុងកិច្ចប្រជុំនេះកម្ពុជាយើងក៏បានលើកយកបញ្ហាការបាញ់ និងគប់គ្រាប់បែកដៃទៅនិយាយជាមួយសៀមផងដែរ ដើម្បីឱ្យគេបញ្ឈប់ការបាញ់ និងគប់គ្រាប់បែកតទៅទៀត ។ នៅក្នុងកិច្ចប្រជុំនេះ ភាគីថៃបានឯកភាពលើបទឈប់បាញ់គ្នាទៀតហើយ ដូចជាមិនបន្ថែមកម្លាំងទ័ព មិនចល័តទ័ព និងបាញ់បោះផ្តេសផ្តាស ។
គួរបញ្ជាក់ថា នៅក្នុងលទ្ធផលនៃកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិនៅបុរីញូវយ៉ក សហរដ្ឋអាមេរិក កាលពីថ្ងៃចន្ទ ទី១៤ កុម្ភៈ កន្លងមក ស្ថាប័នកំពូលរបស់ពិភពលោកមួយនេះ បានតម្រូវឱ្យកម្ពុជា-ថៃឈប់បាញ់ជាអចិន្ត្រៃយ៍ និងអត់ធ្មត់ឱ្យដល់កំរិតខ្ពស់បំផុត ដើម្បីចៀសវាងការប្រយុទ្ធគ្នាជាថ្មីទៀតនោះ ។ ទោះជាយ៉ាងណា គេមិនដឹងថា តើកម្ពុជានឹងបន្តការអត់ធ្មត់ដល់កំរិតណាទៀតនោះទេ ខណៈពេលដែលទាហានសៀមនៅតែបន្តការគប់គ្រាប់បែក និងបាញ់កាំភ្លើងប្រភេទធុនធ្ងន់ ដើម្បីរំខានទាហានកម្ពុជានោះ ។ បើតាមអ្នកយកព័ត៌មានកោះសន្តិភាពប្រចាំតំបន់ព្រំដែនប្រាសាទព្រះវិហារ បានឱ្យដឹងដែរថា ចាប់តាំងពីវេលាម៉ោងជាង៦ល្ងាច ថ្ងៃអង្គារម្សិលមិញ រហូតដល់ម៉ោង៥ភ្លឺ ថ្ងៃពុធ ទី១៦ កុម្ភៈ នេះ ទាហានសៀមបានបាញ់កាំភ្លើងយន្តបាញ់បេប្រភេទ៦០, ៧០ និង៨០ និងគប់គ្រាប់បែកដៃប្រមាណជិត១០០គ្រាប់ចូលតំបន់ភ្នំទ្រព្យ ៕
ចែករំលែកព័តមាននេះ