រាជធានីភ្នំពេញ ៖ ជនជាតិចិនម្នាក់ ចូលអុកឡុក បំផ្លាញទំនិញខូចខាតអស់ជាច្រើន ក្នុងហាងទំនិញពលរដ្ឋមួយកន្លែង ខណៈពេលសមត្ថកិច្ចចុះអន្តរាគមន៍ បែរជាជនជាតិចិនខាងលើ ខាំដៃ នគរបាល…
រាជធានីភ្នំពេញ ៖ ជនជាតិចិនម្នាក់ ចូលអុកឡុក បំផ្លាញទំនិញខូចខាតអស់ជាច្រើន ក្នុងហាងទំនិញពលរដ្ឋមួយកន្លែង ខណៈពេលសមត្ថកិច្ចចុះអន្តរាគមន៍ បែរជាជនជាតិចិនខាងលើ ខាំដៃ នគរបាល ០២រូប បណ្តាលអោយរងរបួសធ្ងន់ស្រាល ។
ករណីនេះកើតឡើងកាលពីវេលាម៉ោង ០៦ព្រឹកថ្ងៃទី ០៦ ខែឧសភា ឆ្នាំ២០២៦ ចំណុចហាងទំនិញ« Smile Mini Marts » តាមបណ្តោយផ្លូវជាតិលេខ ២ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
តានការបញ្ជាក់ពីប្រជាពលរដ្ឋបានអោយដឹងថា មានជនជាតិចិនម្នាក់ ដើរដោះអាវ តាមបណ្តោយផ្លូវជាតិលេខ ២ ខណៈមកដល់ចំណុចហាងលក់ទំនិញខាងលើ ក៏បានដើរចូលទៅអុកឡុក និងបំផ្លាញទំនិញ និងឥវ៉ាន់ ហើយថែមទាំងទាញដបស្រាដេញគប់បុគ្គលិក ក្នុងហាងតែម្តង ដោយមិនដឹងមានបញ្ហាអ្វីនោះឡើយ ។ ដោយឃើញបែបនេះ បុគ្គលិកក្នុងហាងមានភាពភ័យខ្លាច ទើបប្រញាប់រាយការណ៍ជូនសមត្ថកិច្ច ដើម្បីមកអន្តរាគមន៍ជួយ ។
ប្រភពដដែលបានបន្តថា បន្ទាប់ពីសមត្ថកិច្ចប៉ុស្តិ៍ចុះមកដល់ និងកម្លាំងអាវុធហត្ថខណ្ឌមានជ័យបានសហការគ្នា ចុះដល់ទីតាំង និងបានដើរចូលទៅក្បែរជនជាតិចិនខាងលើ ដើម្បីព្យាយាមហាមឃាត់ បុរសខាងលើកុំអោយ បង្កការអុកឡុក និងបំផ្លាញបន្តទៀត ។ ប៉ុន្តែបែរជាបុរសជនជាតិខាងលើ ហក់ស្ទុះមកខាំម្រាមដៃនគរបាល បណ្តាលអោយដាច់ម្រាមដៃ ធ្ងន់ធ្ងរ ហើយ ក៏ទៅខាំដៃនគរបាលម្នាក់ បណ្តាលអោយឈាមរងរបួសស្រាលម្នាក់ទៀត ទើបសមត្ថកិច្ច និងពលរដ្ឋឃាត់បាន ។
យោងតាមការបញ្ជាក់ពីនគរបាល បានអោយដឹងបន្ថែមថា នគរបាល ០២នាក់ដែលរងរបួស រួមមានលោកនាយប៉ុស្តិ៍ចាក់អង្រែលើរបួសដាច់សាច់ម្រាមដៃ ធ្ងន់ និងមន្ត្រីនគរបាលប៉ុស្តិ៍ បណ្ដាលឲ្យរបួសដៃស្រាល ។
ក្រោយកើតហេតុ ជនជាតិចិននោះត្រូវបាន កម្លាំងជំនាញ បញ្ជូនទៅកាន់ប៉ុស្តិ៍ចាក់អង្រែលើ ដើម្បីបន្តនីតិវីធីច្បាប់ ៕
ចែករំលែកព័តមាននេះ