រាជធានីភ្នំពេញ ៖ នគរបាលព្រហ្មទណ្ឌក្រសួងមហាផ្ទៃ បាននាំខ្លួនឧក្រិដ្ឋជនហង្ស វុទ្ធី ហៅយមរាជ ទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី១១ មេសា ដែលការនាំខ្លួន ឈ្មោះយមរាជ ទៅសាលាដំបូងបែបនេះ លោកឧត្តមសេនីយ៍ឯកម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ បានអះអាងថា គឺជាការអនុវត្តតាមនីតិវិធីតុលាការ ព្រោះយមរាជមានដីកា
រាជធានីភ្នំពេញ ៖ នគរបាលព្រហ្មទណ្ឌក្រសួងមហាផ្ទៃ បាននាំខ្លួនឧក្រិដ្ឋជនហង្ស វុទ្ធី ហៅយមរាជ ទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី១១ មេសា ដែលការនាំខ្លួន ឈ្មោះយមរាជ ទៅសាលាដំបូងបែបនេះ លោកឧត្តមសេនីយ៍ឯកម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ បានអះអាងថា គឺជាការអនុវត្តតាមនីតិវិធីតុលាការ ព្រោះយមរាជមានដីកាចាប់ខ្លួនរបស់លោកង៉ែត សារ៉ាត់ ក្នុងអំឡុងថ្ងៃទី១៤ មិថុនា ២០០៦ ដោយជាប់ពាក់ព័ន្ធបទល្មើសហែកគុកព្រៃសរត់គេចខ្លួន ។
បើទោះបីពេលនេះ យមរាជ បានចូលខ្លួន មកសារភាពយ៉ាងណាក៏ដោយ ដែលការសារភាពនេះ គឺជាការទាល់ច្រក ឬហៅថា ជាកម្មពៀរ ឬឈាមស្រែកស្បែកហៅរបស់យមរាជដែលបានប្រព្រឹត្ត ព្រោះព្រលឹងអ្នកស្លាប់ទៅ ឬក៏ឈាមមនុស្សស្លូតត្រង់បានស្រក់លើធរណី ដោយគ្រាប់កាំភ្លើងយមរាជកន្លងមក បានអន្ទងយមរាជឱ្យមកចូលដេកគុកមួយជីវិត ជាមួយមេខ្លោង ឬអ្នកបញ្ជាផ្ទាល់គឺហេង ពៅ និងបក្សពួកខ្លួនសុទ្ធសឹង ជាឃាតករកំពុងរស់ក្នុងគុកព្រៃសអស់មួយជីវិតដូចគ្នា ។
អនុញ្ញាតឱ្យក្រុមគ្រួសារចូលជួបយមរាជពេលសមត្ថកិច្ចនគរបាលក្រសួងមហាផ្ទៃ បញ្ជូនទៅដល់សាលាដំបូងរាជធានីភ្នំពេញ គេបានសង្កេតឃើញឪពុកម្តាយបង្កើត ដែលមានវ័យចាស់ជរា បងប្អូនស្រីៗ និងកូន២នាក់ ប្រុសម្នាក់ ស្រីម្នាក់ បាននាំគ្នាឈូឆរទៅជួប ព្រោះបានព្រាត់ប្រាស់គ្នាជិត៧ឆ្នាំមកហើយ ។ សាលាដំបូងដែលមានលោកលី សុផាណា ព្រះរាជអាជ្ញារងទទួលចាត់ការលើ សំណុំរឿងយមរាជនេះ បានអនុញ្ញាតឱ្យឪពុកម្តាយ បងប្អូន និងកូនជួបយមរាជ នៅក្នុងបន្ទប់រង់ចាំមួយយ៉ាងសមរម្យចាត់ទុកថា ជាបណ្តាំចុងក្រោយមុនពេលយមរាជទៅដេកគុកវិញ ។
កូនទាំង២ បានបង្ហូរទឹកភ្នែកយំ អោបឪពុក តែឪពុកវិញ យំអត់ចេញ ទឹកភ្នែកទេ ដោយបាបកម្មរបស់គេបានសាងមានទំហំធំធេងពេក បានត្រឹមតែពោលថា ឪពុក លែងស្លាប់ហើយ តែឪពុកត្រូវដេកក្នុងគុកមួយជីវិត ។ ក្នុងស្ថានភាពរូបរាងកាយស្គមស្គាំងស្លេកស្លាំង សក់ស្កូវល្បាយអាចម៍ខ្លា មកដល់ពេលនេះ យមរាជអាយុ៤៣ឆ្នាំ ហើយ ។ ឪពុកឈ្មោះហង្ស ឈាង ម្តាយឈ្មោះង៉ែត ឆិល ប្រពន្ធឈ្មោះស សុភ័ក្រ និងមានកូន៤នាក់ ។ ប៉ុន្តែការជួបគ្នាដំណាក់កាលចុងក្រោយនៅសាលាដំបូងរាជធានីភ្នំពេញ ព្រឹកថ្ងៃទី២១ មេសា ឃើញវត្តមានតែកូន២នាក់ទេ ។ ចំណែកប្រពន្ធមិនបានមកជួបយមរាជទេ ដែលព័ត៌មានខ្លះនិយាយថា ប្រពន្ធយមរាជបានយកប្តីថ្មីបាត់ទៅហើយ ហើយក៏គេលែងនឹកនាដល់ឈ្មោះហង្ស វុទ្ធី ហៅយមរាជ នោះដែរ ព្រោះយមរាជ ជាឃាតករបាតដៃប្រឡាក់ដោយឈាមច្រើនពេក ។
ព្រះរាជអាជ្ញាសួរចប់បញ្ជូនទៅគុកវិញចាប់តាំងពីម៉ោង៩ព្រឹក រហូតដល់ម៉ោង១ និង៣០នាទីរសៀលថ្ងៃទី២១ មេសា លោកលី សុផាណា ព្រះរាជអាជ្ញារងបានសាកសួរយមរាជអំពីអង្គហេតុនៃសំណុំរឿង និងគូកនរួមគំនិតអារចំរឹងដែកបង្អួចបន្ទប់ឃុំឃាំងរត់គេចខ្លួនចេញពីពន្ធនាគារ ។ ក្រៅពីអង្គហេតុហែកគុករត់ លោកព្រះរាជអាជ្ញារងមិនបានសួរពាក់ព័ន្ធទេ ។ ក្រោយពីសួរចប់ លោកបានសម្រេចចេញដីកាឃុំខ្លួនយមរាជ ហើយតម្រូវឱ្យនគរបាលព្រហ្មទណ្ឌក្រសួងមហាផ្ទៃនាំខ្លួនយមរាជទៅកាន់គុកព្រៃសកន្លែងដើមតែម្តងទៅ ។
ប្រវត្តិសង្ខេបនៃស្នាដៃឃាតកម្មគួររំលឹកថា ឈ្មោះហង្ស វុទ្ធី ហៅយមរាជ មានរហស្សនាមទិវា១៦ ។ មុនចាប់ខ្លួន ជាមន្ត្រីនគរបាលជាតិ បម្រើការងារនៅការិយាល័យព្រហ្មទណ្ឌកម្រិតស្រាលរាជធានីភ្នំពេញ ជំនាន់ហេង ពៅ ជាមេខ្លោងធ្វើជាស្នងការដ៏មានអំណាចក្រោមមេឃលើដីមានតែអញ ។ យមរាជ ត្រូវបានសមត្ថកិច្ចការិយាល័យព័ត៌មាន និងសន្តិសុខ នៃទីបញ្ជាការកងរាជអាវុធហត្ថលើផ្ទៃប្រទេសចាប់ខ្លួនជាមួយបក្សពួក ៣នាក់ទៀត លើសំណុំរឿងឃាតកម្មរឿងឃាតកម្មជាច្រើន ក្នុងរាជធានីភ្នំពេញ ។ ដែលការស្រាវជ្រាវព័ត៌មានរហូតឈានដល់ការចាប់ខ្លួន ក្រុមយមរាជនោះ គឺជាស្នាដៃរបស់លោកឧត្តមសេនីយ៍សៀ សម្បត្តិ នៃកងរាជអាវុធហត្ថលើផ្ទៃប្រទេស ពេលនោះលោកនៅជាប្រធានការិយាល័យ ។ តែបច្ចុប្បន្នបានឡើងទៅជាស្នងការរងស្រាវជ្រាវ និងយុត្តិធម៌នៃកងរាជអាវុធហត្ថលើផ្ទៃប្រទេស ដោយគុណបំណាច់ លោកដឹកនាំបង្ក្រាបបានបទល្មើសធំៗ ជាច្រើនកន្លងមក ។ លោកវរសេនីយ៍ទោ អ៊ុង ដេប៉ូ នាយរងការិយាល័យស្រាវជ្រាវបទល្មើសព្រហ្មទណ្ឌបានឱ្យដឹងថា ក្រុមយមរាជត្រូវបានសមត្ថកិច្ចរបស់លោកចាប់ខ្លួន កាលពីថ្ងៃទី២៨ មករា ២០០៦ គឺចាប់ដំបូងគេនោះបាន២នាក់ ១-ឈ្មោះហង្ស វុត្ថា ហៅម៉ូវ ភេទប្រុស អាយុ៣៦ឆ្នាំ អតីតមន្ត្រីកងរាជអាវុធហត្ថ និងត្រូវជាប្អូនប្រុសបង្កើតរបស់យមរាជ ២-ឈ្មោះអំ សំខេង ហៅគង់ សុផល ភេទប្រុស អាយុ៣៧ឆ្នាំ ជាមន្ត្រីនគរបាលជាតិ បម្រើការងារនៅអង្គភាពការិយាល័យនគរបាលព្រហ្មទណ្ឌកម្រិតស្រាលក្រសួងមហាផ្ទៃ ។
លោកអ៊ុង ដេប៉ូ បានបន្តថា ពេលឃាត់ខ្លួន ជនជាប់ចោទទាំង២នាក់ខាងលើ ពាក់ព័ន្ធសង្ស័យទៅនឹងអំពើធ្វើមនុស្សឃាតបាញ់ សម្លាប់មនុស្សបានសម្រេចកាលពីថ្ងៃទី២៣ មេសា ២០០៣ នៅចំណុចផ្លូវលេខ៦៣ (ត្រសក់ផ្អែម) កែងនឹងផ្លូវព្រះសីហនុ សង្កាត់ចតុមុខ ខណ្ឌដូនពេញ រាជធានីភ្នំពេញ ដែលមានជនរងគ្រោះ គឺលោកសុខ សេដ្ឋាមុន្នី ចៅក្រមសាលាដំបូង ។
ក្រោយពីចាប់ខ្លួនមនុស្ស២នាក់នោះ បានសារភាពដូចគ្នាថា ករណីធ្វើមនុស្សឃាតលើរូបលោកសុក សេដ្ឋាមុន្នី គឺមានបក្សពួក៤នាក់ ១-ឈ្មោះហង្ស វុទ្ធី ហៅយមរាជ ២-ឈ្មោះហង្ស វុត្ថា ហៅម៉ូវ (ប្អូនយមរាជ) ៣-ឈ្មោះអំ សំខេង និង៤-ឈ្មោះព្រុំ សោភារិទ្ធ ។ បន្ទាប់ពីចាប់ជនជាប់ចោទទាំង៤នាក់ ការសាកសួរយកចម្លើយម្នាក់ម្តង ក៏ដូចជាទល់មុខគ្នា បានធ្លាយចេញបទល្មើសច្រើនករណីទៀត ដូចជាបាញ់ប៉ុនប៉ងសម្លាប់លោកគឹម ដារ៉ាវុធ ប្រធានសាខា អគ្គិសនីចាក់អង្រែក្រោម ការប៉ុនប៉ងធ្វើឃាតលោកអ៊ុក សាវុធ អគ្គព្រះរាជអាជ្ញាសាលាឧទ្ធរណ៍ ប៉ុនប៉ងតាមបាញ់សម្លាប់លោកនាយឧត្តមសេនីយ៍សៅ សុខា មេបញ្ជាការកងរាជអាវុធ ហត្ថលើផ្ទៃប្រទេស និងមានករណីជាច្រើនទៀត តាមការបង្គាប់បញ្ជាពីមេខ្លោង ហេង ពៅ ។ ពេលចាប់ខ្លួនជនជាប់ចោទ៤នាក់ នោះហើយ ពួកគេក៏បានឆ្លើយដាក់ទៅលើឈ្មោះលី រ៉ាស៊ី ម្នាក់ទៀត ដែលកាលណោះ ឈ្មោះលី រ៉ាស៊ី ហៅទិវា០៣ ជាអនុប្រធានការិយាល័យនគរបាលព្រហ្មទណ្ឌកម្រិតស្រាល និងជាដៃស្តាំជំនិត ហេង ពៅ ហើយអ្វីៗពួកគេបានអនុវត្តតាម តែការចង្អុលបញ្ជាពីឈ្មោះលី រ៉ាស៊ី ។ ដូច្នេះហើយបានជាក្រសួងមហាផ្ទៃ ឃាត់ខ្លួនលី រ៉ាស៊ី ឱ្យទៅសមត្ថកិច្ចកងរាជអាវុធហត្ថចាត់ការលើសំណុំរឿងឃាតកម្មទាំងអស់នោះ ។
ចម្លើយសារភាពនៃក្រុមឧក្រិដ្ឋកម្មយោងលើចម្លើយសារភាព៤ករណីខាងលើបានឱ្យដឹងថា កាលពីវេលាព្រឹកថ្ងៃទី២៣ មេសា ២០០៣ ក្រុមឃាតករមានគ្នា៤នាក់បានធ្វើសកម្មភាពបាញ់សម្លាប់លោកសុក សេដ្ឋាមុន្នី ចៅក្រមសាលាដំបូង ក្នុងនោះមានហង្ស វុទ្ធី ហៅយមរាជ ,ហង្ស វុត្ថា ហៅម៉ូវ ប្អូនយមរាជ, អំ សំខេង ហៅគង់ សុផល និងមិត្តភក្តិអំ សំខេង ម្នាក់ទៀត ។
អំពើមនុស្សឃាតលើលោក សុក សេដ្ឋាមុន្នី ឈ្មោះហង្ស វុត្ថា ហៅម៉ូវ បានឌុបឈ្មោះអំ សំខេង ដោយម៉ូតូសេ១២៥ ពណ៌ខ្មៅ១គ្រឿង ទៅឃ្លាំមើលលោកសុក សេដ្ឋាមុន្នី ចេញពីផ្ទះនៅស្ពានដែកក្រុងតាខ្មៅ ខេត្តកណ្តាល ។ ឈ្មោះហង្ស វុទ្ធី ហៅយមរាជ និងអំ សំខេង ជិះម៉ូតូ១គ្រឿងនៅចាំស្ទាក់ម្តុំវិមានឯករាជ្យ ។ លុះពេលលោកសុខ សេដ្ឋាមុន្នី បើករថយន្តទៅដល់ចំណុចភ្លើងស្តុបត្រសក់ផ្អែម ឈ្មោះអំ សំខេង បានលោតចុះពីលើម៉ូតូទៅវាយកញ្ចក់ទ្វាររថយន្តពីមុខបំបែក រួចបាញ់ជាច្រើនគ្រាប់ទៅលើលោកសុក សេដ្ឋាមុន្នី ដោយកាំភ្លើងម៉ាក K59 បណ្តាលឱ្យលោកស្លាប់ក្នុងរថយន្ត ហើយពួកគេបានគេចខ្លួនដោយសុវត្ថិភាព ។ លុះរំលងបាន១សប្តាហ៍ពួកគេបានទៅជុំគ្នានៅក្បែរវត្តបទុមវតី ពេលនោះឈ្មោះហង្ស វុទ្ធី ហៅយមរាជ ដែលទទួលប្រាក់ពីមេក្ខោងបញ្ជាយកទៅចែកគ្នាបានម្នាក់ជាង១ពាន់ដុល្លារ ។
ចំពោះករណីប៉ុនប៉ងធ្វើឃាតលោកអ៊ុក សាវុធ កាលនៅជាព្រះរាជអាជ្ញាសាលាដំបូងរាជធានីភ្នំពេញ ឈ្មោះហង្ស វុទ្ធី ហៅយមរាជ សារភាពថា ខ្លួនមិនបានចាំខែថ្ងៃទេ ក៏ប៉ុន្តែនៅក្នុងអំឡុងឆ្នាំ ២០០៤ វេលាម៉ោងប្រមាណ៨យប់ មុនពេលធ្វើសកម្មភាពពួកគេមានឈ្មោះ៤នាក់ខាងលើ បានជួបជុំគ្នានៅស្ថានីយ៍ប្រេងកាល់តិចពេទ្យចិន និងបានដាក់ផែនការរួចអស់ហើយ។ ពេលទៅដល់ផ្ទះលោកអ៊ុក សាវុធ ឱ្យឈ្មោះព្រំ សោភារិទ្ធ អតីតប្រធានផ្នែកមជ្ឈិម១ នៃការិយាល័យនគរបាលព្រហ្មទណ្ឌកម្រិតស្រាល និងឈ្មោះអំ សំខេង ហៅគង់ សុផល ចូលទៅក្នុងបរិវេណផ្ទះមុន ចំណែកយមរាជ នៅខាងក្រៅចាំមើលសភាពការណ៍ ។ ពេលឈ្មោះព្រំ សោភារិទ្ធ និងអំ សំខេង ចូលដល់ក្នុងផ្ទះលោកអ៊ុក សាវុធ ឆ្កែបានព្រូសខ្លាំងពេក ពួកគេក៏ផ្លោះរបងចេញមកវិញ និងផ្ទុះអាវុធ៣ទៅ៤គ្រាប់ទៀតផង ។ ដូច្នេះការប៉ុនប៉ងធ្វើឃាតលោកអ៊ុក សាវុធ មិនបានសម្រេចឡើយ បើទោះបីជាការព្យាយាមលើកក្រោយៗទៀតក៏ដោយ ។
ករណីប៉ុនប៉ងសម្លាប់លោកសៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក្រុមឃាតករបានសារភាពថា បានដាក់គ្នាឃ្លាំចាំមើល លោកសៅ សុខា ចេញពីផ្ទះនៅក្បែរផ្សារដេប៉ូទៅកន្លែងធ្វើការ ឬទៅទីណានោះ ក៏តាមរហូតដែរ ប៉ុន្តែពុំមានឱកាសនឹងធ្វើឃាតលោកបានទេ ។ យមរាជសារភាពទៀតថា ផែនការសម្លាប់មនុស្សទាំងអស់ខ្លួនបានធ្វើសកម្មភាពតាមបញ្ជាពី លី រ៉ាស៊ី និងហេង ពៅ ដោយគេបានប្រាប់វិញថា ការងារបានសម្រេចជាថ្នូរមកវិញឱ្យឡើងតួនាទីឡើងស័ក្តិ ។ ជាក់ស្តែងដូចសម្លាប់លោកសុក សេដ្ឋាមុន្នី ឈ្មោះព្រំ សោភារិទ្ធ បានឡើងជាប្រធានផ្នែក ហើយខ្លួនបានជាអនុប្រធានផ្នែក ។ ក្រៅពីនេះឈ្មោះហង្ស វុត្ថា (ប្អូន) និង អំ សំខេង មិត្តភក្តិគេម្នាក់ទៀតឱ្យលុយខ្លះ កុហកខ្លះ ដើម្បីបោកឱ្យជួយចូលរួមធ្វើសកម្មភាពជាមួយ ព្រោះថា ពេលនេះលោកទិវា០៣ លី រ៉ាស៊ី មានអំណាច និងឥទ្ធិពលខ្លាំងណាស់ បន្ទាប់ពីហេង ពៅ ។
ករណីបាញ់ប៉ុនប៉ងសម្លាប់លោកគឹម ដារ៉ាវុធ ប្រធានសាខាអគ្គិសនីចាក់អង្រែក្រោម នៅក្នុងរថយន្តលើដងវិថីក្បែរវិទ្យាល័យចតុមុខ ដែលលោកទៅទទួលយកកូនចេញពីសាលារៀន ក៏ជាក្រុមរបស់យមរាជនេះដែរ ។ សមាសភាពប្រព្រឹត្តផ្ទាល់មាន២នាក់ជាជនដៃដល់ ដែលបានជិះម៉ូតូទៅបាញ់នោះឈ្មោះហង្ស វុត្ថា និងអំ សំខេង ។ ប៉ុន្តែករណីនេះ ក៏មានការចូលរួមពីសំណាក់ឈ្មោះព្រំ សោភារិទ្ធ ដែរ ដែលជាអ្នកទៅតាមឃ្លាំមើល ជនរងគ្រោះដល់ផ្ទះ និងទៅធ្វើជាអ្នកសួររកទិញរថយន្តទៀតផង ។
ករណីបាញ់លោកគឹម ដារ៉ាវុធនេះ មិនស្លាប់ ទេ ។ ប៉ុន្តែបណ្តាលឱ្យពិការភាពរហូតដល់សព្វថ្ងៃ សំណុំរឿង គឺនៅនាយកដ្ឋាននគរបាលព្រហ្មទណ្ឌក្រសួងមហាផ្ទៃ ជាអ្នកកសាង និងស្រាវជ្រាវ លើករណីនេះ ។ និយាយរួមទៅ ឧក្រិដ្ឋជន១ក្រុម ក្រោមបទបញ្ជាទិវា០៣ លី រ៉ាស៊ី ការចាប់ឃាត់ខ្លួនជាស្នាដៃនគរបាលក្រសួងមហាផ្ទៃ និងកងរាជអាវុធហត្ថលើផ្ទៃប្រទេស សហការដុតដៃដុតជើងស្រាវជ្រាវ និងចាប់ខ្លួនឃាតករទាំងអស់នោះ ។ យោងទៅលើឯកសារវត្ថុតាង និងចម្លើយគ្រប់គ្រាន់ហើយ សាលាដំបូង រាជធានីភ្នំពេញ បានលើកសំណុំរឿងនោះបើកសវនាការជំនុំជម្រះ និងផ្តន្ទាទោសជនជាប់ចោទម្តងមួយរឿងៗ ខណៈចន្លោះពេលឈ្មោះហង្ស វុទ្ធី ហៅយមរាជ ហែកគុករត់ ។
សំណុំរឿង៤សាលក្រមកាត់ទោស៥១ឆ្នាំ ការផ្តន្ទាទោសចំពោះហង្ស វុទ្ធី ហៅយមរាជ គឺធ្វើឡើងដោយកំបាំងមុខតាំងពីសាលាដំបូង រហូតដល់សាលាឧទ្ធរណ៍មានចំនួន៤សំណុំរឿងគឺ៖
១-រឿងបាញ់សម្លាប់លោកសុក សេដ្ឋាមុន្នី ចៅក្រមសាលាដំបូងផ្តន្ទាទោសដាក់ពន្ធនាគាររយៈពេល១៨ឆ្នាំ ។
២-សំណុំរឿងប៉ុនប៉ងធ្វើមនុស្សឃាតលើរូបលោកគឹម ដារ៉ាវុធ ប្រធានសាខាអគ្គិសនីចាក់អង្រែក្រោម ផ្តន្ទាទោសដាក់ពន្ធនាគាររយៈពេល១៦ឆ្នាំ ។
៣-លើសំណុំរឿងប៉ុនប៉ងធ្វើមនុស្សឃាតលើលោកសៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសផ្តន្ទាទោសដាក់ពន្ធនាគាររយៈពេល១៥ឆ្នាំ ។
៤-សំណុំរឿងហែកគុករត់ផ្តន្ទាទោសឱ្យជាប់ពន្ធនាគាររយៈពេល២ឆ្នាំ ។
សរុបជាក់ស្តែងមានចំនួន៥១ឆ្នាំ ។ ចំណែកសំណុំរឿងលោកអ៊ុក សាវុធ ក៏បានផ្តន្ទាទោសឈ្មោះយមរាជ នេះហើយដែរ ប៉ុន្តែសាលក្រមមិនទាន់ត្រូវបានធ្លាក់ដល់ដៃសមត្ថកិច្ចនៅឡើយ ដែលទោសយមរាជមានប្រហាក់ប្រហែលហេង ពៅ គឺជិត១០០ឆ្នាំ។
ពេលចូលសារភាព យមរាជបដិសេធនៅសាលាដំបូងរាជធានីភ្នំពេញ យមរាជបានបដិសេធរាល់ការចោទប្រកាន់ និងសាលក្រមរបស់សាលាដំបូងក៏ដូចជាសាលាឧទ្ធរណ៍ចោលទាំងអស់ ។ យមរាជបានជំរាបជូនលោកលី សុផាណា ព្រះរាជអាជ្ញារងថា ខ្លួននឹងរកមេធាវីការពារក្តីប្តឹងទាស់ឱ្យជំនុំជំរះទោសរឿងទាំងអស់នេះឡើងវិញ ព្រោះខ្លួនយល់ឃើញថា ជាសាលក្រមកំបាំងមុខ ។ យមរាជបានទាមទារនៅចំពោះមុខមេធាវីកៅ ស៊ូផា ថា សុំឱ្យតុលាការជួយរកយុត្តិធម៌ឱ្យ ។ យមរាជបន្តថា គ្មានកំហុស និងមិនបានប្រព្រឹត្តអំពើដូចអ្វីដែលតុលាការចោទប្រកាន់នោះឡើយ ហើយក៏គេបានប្រាប់ឪពុកម្តាយបងប្អូន កូនប្រុសស្រីរបស់ខ្លួន ថា ដោយសារខ្លួនគ្មានកំហុសនោះហើយទើបបានជាហ៊ានចេញមុខសារភាពដើម្បីចង់បានភាពយុត្តិធម៌ ។ លោកមេធាវីកៅ ស៊ូផា បានប្រាប់ឱ្យដឹងថា លោកមិនទាន់បានក្លាយទៅជាមេធាវីការពារក្តីឱ្យជនជាប់ចោទឈ្មោះហង្ស វុទ្ធី ហៅយមរាជ ជាផ្លូវការនៅឡើយទេ ប៉ុន្តែបើហង្ស វុទ្ធី ពឹងពាក់លោកក៏ស្ម័គ្រចិត្តដែរ ព្រោះសព្វថ្ងៃលោកជាមេធាវីការពារក្តីឱ្យឈ្មោះហង្ស វុត្ថា ប្អូនហង្ស វុទ្ធី ។ រឿងអញ្ចឹងហើយបានជាម្តាយហង្ស វុត្ថា មកពឹងឱ្យលោកជួយការពារអាយុជីវិត និងខ្លាចធ្វើទារុណកម្មនៅពេលហង្ស វុទ្ធី ហៅយមរាជចូលសារភាព ។
ពេលឃើញមុខលាន់មាត់ថា អាយមរាជមែនមជ្ឈដ្ឋានជាច្រើនបានដាក់ចម្ងល់ថា រយៈពេល៦ជិត៧ឆ្នាំក្រោយយមរាជរត់ចេញពីគុកព្រៃ.ស គ្មាននរណាម្នាក់ជឿជាក់ថា យមរាជនៅមានជីវិតនោះទេ ខ្លះថា យមរាជទៅជាស្នូលដី ពុកផុយទៅហើយ ។ ខ្លះថា យមរាជក្លាយជាចំណីក្រពើបាត់ទៅហើយ ។ នៅពេលមានព័ត៌មានថា យមរាជសុំអង្គការលីកាដូជួយការពារអាយុជីវិត ដើម្បីចូលសារភាព គ្មាននរណាម្នាក់ជឿជាក់ទាល់តែសោះ សូម្បីមន្ត្រីជាន់ខ្ពស់ក្រសួងមហាផ្ទៃខ្លះ ក៏ស្ទើរតែមិនជឿដែរ ប៉ុន្តែដោយបានឃើញផ្ទាល់ភ្នែក ទើបបានស្រឡាំងកាំង ហើយលាន់មាត់ថា អាយមរាជមែន ។
នៅមានចម្ងល់ទៀតថា យមរាជ បានរួចផុតពីភ្នែកច្រមុះសមត្ថកិច្ចដែលតាមប្រមាញ់អស់រយៈពេលជាច្រើនឆ្នាំហើយ បូកទាំងការជ្រកកោនស្នាក់នៅគ្មានអ្នកណាស្គាល់ទៀតផង និងហាក់បីដូចជាមានសេចក្តីសុខដែរ តែហេតុថា បានជាយមរាជស្ម័គ្រចិត្តចូលសារភាពមកដេកគុក១ជីវិតវិញនោះ គឺមិនខុសពីមេក្លោងរបស់គាត់ គឺហេង ពៅ ធ្លាប់បាននិយាយកាលពីសមត្ថកិច្ចនាំខ្លួនពីក្រៅប្រទេសមកដល់សាលាដំបូងរាជធានីភ្នំពេញ ភ្លាមៗបានប្រាប់គេឯងថា លើលោកនេះ ពិតជាមានបាបបុណ្យមែន ។
អំពើដែលបានប្រព្រឹត្ត ជននោះនឹងត្រូវទទួលមកវិញ នូវកម្មពៀរទាន់ហន់មិនចាំបាច់ចាំជាតិក្រោយឡើយ ។ យមរាជសាងបាបកម្មច្រើនណាស់ សម្លាប់មនុស្សធ្វើឱ្យគេជរាពិការ ព្រាត់ប្រាស់ និរាសប្រពន្ធកូន នោះហើយកម្មតាមផ្តន្ទា ។ ព្រលឹងអ្នកដែលស្លាប់តាមអន្លងនាំយមរាជឱ្យចូលគុកវិញ ទោះបីទៅរស់នៅដល់ទីណាក៏គ្មានសេចក្តីសុខដែរ ៕
ចែករំលែកព័តមាននេះ