រាជធានីភ្នំពេញ ៖ ជំនឿរបស់ជនជាតិចិន ចំពោះការលោតម៉ុងសាយ គឺគេជឿថានឹងធ្វើឱ្យការរកស៊ីលក់ដូររបស់គេមានការរីកចំរើន ហើយនិងនាំមកនូវសិរីសួស្ដីសុភមង្គល នៅក្នុងក្រុមគ្រួសាររបស់គេទៀតផង។ ម្យ៉ាងវិញទៀតការលោតម៉ុងសាយនេះគឺជាប្រពៃណីរបស់ជនជាតិចិន ដែលមានរាប់ពាន់ឆ្នាំមកហើយ ។
តាមការអះអាងបន្ថែមពីចាស់ៗមួយចំនួនបានឱ្យដឹងថា ការលោតម៉ុងសាយនេះមិនមែនចេះតែធ្វើនោះទេ មុននឹងហៅក្រុមម៉ុងសាយឱ្យមកលោត ឬសំដែងនៅមុខហាងរបស់គេ គឺគេត្រូវមើលថ្ងៃណាដែលមានហុងស៊ុយសំរាប់គេសិន ។
លោកគួច ណាវ នាយកមជ្ឈមណ្ឌលនាឡិកាស្វ៉ីស បានមានប្រសាសន៍ថា លោកតែងតែហៅក្រុមម៉ុងសាយឱ្យមកលោតសម្ដែងនៅមុខមជ្ឈមណ្ឌលនាឡិកាស្វ៉ីសរប់សលោកជារៀងរាល់ឆ្នាំ មិនដែលខានឡើយ ហើយឆ្នាំនេះ លោកបានជ្រើសរើសយកថ្ងៃទី២ បន្ទាប់ពីថ្ងៃសែន នៅវេលាម៉ោង៧ព្រឹក ព្រោះថាជាពេលដែលល្អសំរាប់លោក ។ លោកក៏បានគិតឃើញ ដូចគ្នានឹងអ្នករកស៊ីដទៃទៀតដែរថា ការលោតម៉ុងសាយគឺជាការធ្វើឡើងដើម្បីបញ្ចេញឱ្យអស់នូវអ្វីដែលជាភាពចង្រៃ ភាពមិនល្អសំរាប់ឆ្នាំចាស់កន្លងមក និងនាំមកវិញ នូវសិរីសួស្ដីសុភមង្គល សំរាប់ក្រុមគ្រួសារ របស់លោកនៅក្នុងឆ្នាំថ្មីនេះ ។
ម្យ៉ាងទៀតការលោតម៉ុងសាយដែលជាពិធីប្រពៃណី របស់ជនជាតិចិនរាប់ពាន់ឆ្នាំមកហើយនេះ ត្រូវបានកូនចៅស្រករក្រោយនាំគ្នាប្រតិបត្ដិតាមរហូតមកទល់សព្វថ្ងៃ ជាពិសេសនៅទីណាក៏ដោយ ឱ្យតែមានជនជាតិចិនរស់នៅ គេតែងតែឃើញកូនចៅជំនាន់ក្រោយនាំគ្នាប្រតិបត្ដិតាមរហូត ។
ចែករំលែកព័តមាននេះ