ខេត្តបាត់ដំបង ៖ បុរសជនជាតិវៀតណាមម្នាក់ជាម្ចាស់ ភោជនីយដ្ឋានមួយបានចាក់សោទ្វាររបងហាង ហើយយកកាំបិតប័ុងតោគំរាមអារ.កប៉ងសម្លាប់ខ្លួនឯង និងគំរាមសម្លាប់កម្មករក្នុងហាង២នាក់ទៀត ដោយសារខឹងប្រពន្ធរត់ចោល ប៉ុន្តែត្រូវបានកម្លាំងនគរបាលព្រហ្មទណ្ឌខេត្ត និងកម្លាំងកងអន្តរាគមន៍ពិសេសផ្លោះរបងឆ្មក់ចូលទៅបង្ក្រាបបាន កាលពីវេលាម៉ោង១០និង៤៥នាទី ព្រឹកថ្ងៃទី២៣ មីនា ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ។
បុរសជនជាតិវៀតណាមខាងលើត្រូវគេស្គាល់ថា ឈ្មោះង្វៀង វ៉ាន់ឌឹក អាយុ២៧ឆ្នាំ និងប្រពន្ធឈ្មោះឡេ ធិហ៊្វូ អាយុ៣១ឆ្នាំ ។ សមត្ថកិច្ចបាននិយាយថា ប្តីប្រពន្ធនេះជាអ្នកគ្រប់គ្រងភោជនីយដ្ឋានមួយយីហោ «ថាងថាង២៣៤» អតីតយីហោ «លីម៉ី» ដែលទទួលបានការផ្ទេរសិទ្ធិពីម្តាយ ។ សមត្ថកិច្ចបំភ្លឺថា ជននេះតែងវាយដំធ្វើទារុណកម្មលើប្រពន្ធរាល់ថ្ងៃ ។ លុះនៅ ព្រឹកថ្ងៃទី២៣មីនា ដោយប្រពន្ធទ្រាំមិនបានក៏រត់ចេញពីហាងបាត់ធ្វើឱ្យជននេះក្តៅក្រហាយក៏បិទទ្វារហាង រួចវាយកម្ទេចទ្រព្យសម្បត្តិអស់គ្មានសល់ ។ សមត្ថកិច្ចប្រាប់ថា បុរសដ៏ឃោរឃៅនេះបានយកកាំបិតប័ុងតោភ្ជង់.កគំរាមសមា្លប់ខ្លួនឯង និងកម្មករក្នុងហាង២នាក់ទៀត ។ ប៉ុន្តែត្រូវបានកម្លាំងនគរបាលព្រហ្មទណ្ឌខេត្ត និងកម្លាំងកងអន្តរាគមន៍ពិសេសផ្លោះរបងចូលទៅសង្កត់.ក ជាប់ដកហូតបានកាំបិតនិងរំដោះកម្មករក្នុងហាងនោះបានដោយជោគជ័យ ។
ង្វៀង វ៉ាន់ដឹក យំបណ្តើរនិយាយបណ្តើរថា មូលហេតុដែលខ្លួនធ្វើបែបនេះ ព្រោះខឹង និងប្រពន្ធរត់ចោល ហើយយកប្រាក់ទៅអស់ជាង៥.០០០ដុល្លារ ។ ជនកំណាចនេះបញ្ជាក់ថា «ខ្ញុំចង់សម្លាប់ខ្លួនឯង ព្រោះតែរឿងនេះ» ប៉ុន្តែជនម្នាក់នេះមិនបានបញ្ជាក់លម្អិតអំពីមូលហេតុដែលនាំឱ្យមានអំពើហិង្សារាល់ថ្ងៃទៅលើប្រពន្ធនោះទេ ៕
ចែករំលែកព័តមាននេះ