រាជធានីភ្នំពេញ ៖ ស្រឺត គឺជាភាសាសាមញ្ញមួយដែលប្រជាជនខ្មែរច្រើនតែប្រើនៅពេលដែលមានអារម្មណ៍ស្លុត ឬក៏រន្ធត់ ខណៈជួបនឹងស្ថានភាព ឬហេតុការណ៍អាក្រក់ណាមួយ។ ជំងឺស្រឺតអាចធ្វើឱ្យលោកអ្នកមានការរន្ធត់ខ្លាំង បេះដូងដើរញាប់ ត្រជាក់ចុងដៃចុងជើង ឈានទៅដល់ងងឹតមុខស្រវាំងភ្នែក ហើយអាចដួលសន្លប់តែម្តង ។ ជំងឺនេះអាចបង្កឱ្យមានផលប៉ះពាល់ជាច្រើនដល់អ្នកជំងឺនិងអ្នកដែលនៅជុំវិញខ្លួនផងដែរ ។
លោកសាស្ត្រាចារ្យវេជ្ជបណ្ឌិត យឹម សុបុត្រា ឯកទេសវិកលវិទ្យានៃគ្លីនិកសាន់រ៉ាយបានប្រាប់កោះសន្តិភាពឱ្យដឹងថា សម្រាប់អ្នកឯកទេសពាក្យថា ស្រឺតគឺមានន័យថា ជាជំងឺមួយក្នុងចំណោមជំងឺថប់អារម្មណ៍ផ្សេងៗទៀត ហើយនៅក្នុងចំណោមនៃជំងឺថប់អារម្មណ៍នេះវាមានជំងឺច្រើនណាស់ ប៉ុន្តែនៅក្នុងចំណោមនោះវាក៏មានជំងឺមួយដែលលោកអ្នកហៅថា ជំងឺស្រឺត ឬស្លន់ស្លោ ។ បុគ្គលម្នាក់ជួបនឹងមនុស្សច្រើន ភ័យខ្លាចខ្លាំងអាចធ្វើឱ្យស្លន់ស្លោ ភ័យខ្លាច បេះដូងដើរញាប់ ត្រជាក់ចុងដៃចុងជើង ហើយបង្កឱ្យទៅជាស្រឺតតែម្តង ។ ជំងឺនេះវាចាប់ផ្តើមភ្លាមៗគ្មានការព្រៀងទុកនោះទេ ធ្វើឱ្យបុគ្គលនោះចាប់ផ្តើមរន្ធត់ បេះដូងដើរញាប់ ត្រជាក់ចុងដៃចុងជើង ហើយក៏ដួលតែម្តង ។ ជំងឺស្រឺតនេះអាចចែកជាច្រើនកម្រិត គឺកម្រិតស្រាល កម្រិតមធ្យម និងកម្រិតធ្ងន់ធ្ងរ ទៅតាមសភាពរបស់អ្នកជំងឺ។ ជំងឺនេះអាចកើតមានញឹកញាប់ជាងគេភាគច្រើនទៅលើស្ត្រីភេទហើយមូលហេតុដែលបណ្តាលឱ្យកើតជំងឺនេះមានដូចជា ៖
១-បញ្ហាសង្គម ៖ ជួបជាមួយបញ្ហាភ័យរន្ធត់តក់ស្លុតដែលតែងកើតមាននៅក្នុងជីវិតរបស់អ្នកជំងឺផ្ទាល់ ហើយរឿងភ័យរន្ធត់តក់ស្លុតនេះតែងតែកើតមានញឹកញាប់ជាហូរហែ ទោះបីជាហេតុការណ៍នេះវាកន្លងផុតទៅច្រើនឆ្នាំក៏ដោយ ប៉ុន្តែខួរក្បាលបានថតទុកគ្រប់សកម្មភាព គ្រប់រូបភាពអាក្រក់ៗដែលកើតមានចំពោះបុគ្គលនេះរហូត ។ ជួនកាលនៅពេលដែលបុគ្គលម្នាក់នេះ ជួបនឹងហេតុការណ៍ភ័យរន្ធត់អ្វីមួយនោះ អារម្មណ៍ក៏គិតទៅរកហេតុការណ៍ពីអតីតដូចនេះវាងាយនឹងបង្កឱ្យកើតមានស្រឺតបំផុត ។
២-កត្តាជីវសាស្ត្រ ៖ ដោយសារកត្តាជីវសាស្ត្រនៅក្នុងខួរក្បាល មានបំលាស់ប្តូរនៅក្នុងប្រព័ន្ធខួរក្បាល និងដោយសារជាតិគីមី ឬក៏អតុល្យភាពនៃសារជាតិគីមីនៅក្នុងប្រព័ន្ធប្រសាទក៏ជាដើមហេតុ បណ្តាលឱ្យមានលក្ខណៈស្រឺតបានដែរ ។
៣-កត្តាចិត្តសាស្ត្រ ៖ បុគ្គលខ្លះមានកត្តាចិត្តសាស្ត្រទន់ខ្សោយ ដោយសារការលូតលាស់ផ្នែកចិត្តសាស្ត្រពីនាយមិនប្រក្រតី ។ ដូចនេះធ្វើឱ្យបុគ្គលប្រភេទនេះឆាប់ភ័យខ្លាច រន្ធត់ ឆាប់ស្រឺត និងឆាប់តក់ស្លុតជាដើម ។
លោកសាស្ត្រាចារ្យវេជ្ជបណ្ឌិត បានបន្ថែមទៀតថា ចំពោះរោគសញ្ញានៃជំងឺស្រឺតនេះមានពីប្រភេទដូចជា ៖
១-ផ្នែករាងកាយ ៖ វាស្តែងឱ្យដឹងតាមរយៈអាការដូចជាឈឺក្បាល ស្រវាំងភ្នែក រោយ.ក ស្ងួតមាត់ ថប់ដង្ហើម បេះដូងដើរញាប់ ត្រជាក់ចុងដៃចុងជើង តឹងណែនដើមទ្រូង ជួនកាលចុកឆ្អល់នៅក្នុងពោះ ហើយសញ្ញានេះវាកើតឡើងយ៉ាងរហ័សបំផុត ។
២-អារម្មណ៍ ៖ ធ្វើឱ្យអារម្មណ៍អ្នកជំងឺភាំងៗមួយរំពេច ធ្វើឱ្យអ្នកជំងឺលែងស្គាល់លែងស្តាប់អ្នកដែលនៅជុំវិញខ្លួន ធ្វើឱ្យការតាំងអារម្មណ៍មិនបានល្អ ចងចាំក៏មិនបាន បាត់បង់ការប្រុងប្រយ័ត្ន ធ្វើឱ្យភ័យរន្ធត់ខ្លាំងរហូតដល់គិតថា ខ្លួនឯងអាចនឹងស្លាប់ ដែលនេះគឺជាសញ្ញាដែលទាក់ទងទៅនឹងអារម្មណ៍ ។
ជាការពិតណាស់ជំងឺស្រឺតនេះពិតជាមានផលប៉ះពាល់ជាច្រើនដល់អ្នកជំងឺដូចជា ៖
-បើសិនជាអ្នកកើតជំងឹស្រឺតញឹកញាប់នោះអាចជាដើមហេតុបង្កឱ្យកើតមានជំងឺបេះដូង នៅពេលដែលជួបរឿងរន្ធត់អ្វីមួយ អ្នកជំងឺអាចមានគ្រោះថ្នាក់ដល់ជីវិត ។
-ចំពោះក្រុមគ្រួសារ ឬបងប្អូនដែលតែងតែឃើញអ្នកជំងឺស្រឺតរហូតដល់ដួលសន្លប់បែបនេះ អ្នកដែលនៅជុំវិញអ្នកជំងឺ អាចមានការភ័យស្លន់ស្លោរន្ធត់តាមអ្នកជំងឺដែរ ហើយក៏អាចកើតមានជំងឺស្រឺតដូចគ្នាបានផងដែរ ។
ដូច្នេះយើងត្រូវដឹងថា បញ្ហាជំងឺផ្លូវចិត្តកើតចេញពីបញ្ហាសង្គម បញ្ហាជីវីសាស្ត្រ និងបញ្ហាចិត្តសាស្ត្រ ។ ដើម្បីការពារខ្លួនឱ្យចៀសផុតពីការកើតមានជំងឺស្រឺតនេះ លោកអ្នកត្រូវដឹងថា ស្រឺតកើតឡើងដោយសារបុព្វហេតុអ្វី? គឺកើតឡើងដោយសារជួបរឿងអាក្រក់ ជួបរឿងភ័យរន្ធត់តក់ស្លុតនៅក្នុងជីវិត ។ ដូច្នេះបើជាលោកអ្នកអាចចៀសវាងបាន គួរតែចៀសវាងដើម្បីកុំឱ្យអារម្មណ៍ប្រឈមទៅនឹងភាពតក់ស្លុត រន្ធត់ញឹកញាប់ពេក ។ ជាពិសេសបើសិនជាកើតមានអាការស្រឺតញឹកញាប់ ឬជាប្រចាំត្រូវតែប្រញាប់ទៅជួបពិភាក្សាជាមួយអ្នកជំនាញឱ្យបានទាន់ពេលវេលា ទើបជាការប្រសើរ ៕
ចែករំលែកព័តមាននេះ