អ្នកនាំពាក្យរបស់ក្រសួងប្រេងកាតអ៊ីរ៉ង់ លោកអាលីរឺហ្សា នីកហ្សាដ ថ្លែងកាលពីថ្ងៃទី១៩ កុម្ភៈ ថា អ៊ីរ៉ង់បញ្ឈប់ការលក់ប្រេងកាតឱ្យដល់បណ្តាក្រុមហ៊ុនប្រេងបារាំង និងអង់គ្លេស។ លោកនីកហ្សាដ បញ្ជាក់ថា បន្ទាប់ពីការសម្រេចចិត្តជាផ្លូវការប្រកាសដោយក្រសួងការបរទេស ក្រសួងប្រេងកាតអ៊ីរ៉ង់ បានបញ្ឈប់ការលក់ប្រេងកាតឱ្យដល់បណ្តាក្រុមហ៊ុនប្រេងអង់គ្លេស និងបារាំង។ អ្នកនាំពាក្យរូបនេះបញ្ជាក់ថា យើងនឹងលក់ប្រេងឱ្យដល់ប្រទេសដទៃៗទៀត។
លោក JEAN LOUIS SCHILANSKY ប្រធានសហភាពនៃឧស្សាហកម្មប្រេងបារាំង UFIP និយាយថា ការសម្រេចចិត្តនេះរបស់អ៊ីរ៉ង់នឹងពុំប៉ះពាល់ធ្ងន់ធ្ងរដល់ការនាំចូលប្រេងឆៅរបស់បារាំងឡើយ ដែលការនាំចូលនេះមានការកើនឡើងក្នុងឆ្នាំ២០១១ ដល់៥៨.០០០ធុង ក្នុងមួយថ្ងៃសម្រាប់ប្រេងឆៅអ៊ីរ៉ង់គឺ ប្រមាណជា៣% នៃសេចក្តីត្រូវការប្រេងបារាំង។ ការសម្រេចចិត្តនេះរបស់អ៊ីរ៉ង់ពុំផ្តល់ផលវិបាកដោយផ្ទាល់នានាឡើយ ។
ប្រទេសអង់គ្លេសក៏មានប្រតិបត្តិកម្មប្រហាក់ប្រហែលគ្នានេះដែរ។ ការសម្រេចចិត្តនេះហាក់ដូចជាការសងសឹករបស់អ៊ីរ៉ង់ចំពោះការហ៊ុមព័ទ្ធលើការនាំចូលប្រេងឆៅមកពីអ៊ីរ៉ង់ដែលនឹងចូលជាធរមានចាប់ពីថ្ងៃទី១ កក្កដា ទៅនៅសហភាពអឺរ៉ុប ។ បណ្តាប្រទេសជាសមាជិកសហភាពអឺរ៉ុបបានព្រមព្រៀងគ្នាកាលពីថ្ងៃទី២៣ មករា ដាក់ការហ៊ុមព័ទ្ធប្រេងអ៊ីរ៉ង់ជាបន្តបន្ទាប់ ព្រមទាំងទណ្ឌកម្មលើធនាគារកណ្តាលអ៊ីរ៉ង់ ដើម្បីធ្វើឱ្យអ៊ីរ៉ង់ខ្វះប្រាក់សម្រាប់ផ្គត់ផ្គង់ដល់កម្មវិធីនុយក្លេអ៊ែររបស់ខ្លួន៕
ចែករំលែកព័តមាននេះ