អាមេរិក៖ អ្នកជំនាញសេដ្ឋកិច្ចអាមេរិកព្រមានថា ប្រតិបត្តិការ Epic Fury អាចបង្កឱ្យមានការខាតបង់សរុបលើសពី២០០ពាន់លានដុល្លារ ប្រសិនបើភាពតានតឹងបន្តអូសបន្លាយ ។ ខណៈដែលភ្លើងសង្គ្រាមកំពុងគ្របដណ្តប់សឹងតែពាសពេញដែនអាកាសនៃតំបន់មជ្ឈិមបូព៌ា សំណួរដ៏ចាក់ដោតបំផុតបានលេចឡើងថា…
អាមេរិក៖ អ្នកជំនាញសេដ្ឋកិច្ចអាមេរិកព្រមានថា ប្រតិបត្តិការ Epic Fury អាចបង្កឱ្យមានការខាតបង់សរុបលើសពី២០០ពាន់លានដុល្លារ ប្រសិនបើភាពតានតឹងបន្តអូសបន្លាយ ។
ខណៈដែលភ្លើងសង្គ្រាមកំពុងគ្របដណ្តប់សឹងតែពាសពេញដែនអាកាសនៃតំបន់មជ្ឈិមបូព៌ា សំណួរដ៏ចាក់ដោតបំផុតបានលេចឡើងថា តើសហរដ្ឋអាមេរិកកំពុងចំណេញ ឬខាតបង់ នៅក្នុងល្បែងសង្គ្រាមដ៏គ្រោះថ្នាក់មួយនេះ?
លោក Kent Smetters អ្នកវិភាគហិរញ្ញវត្ថុឈានមុខគេម្នាក់របស់អាមេរិក និងជាអតីតមន្ត្រីជាន់ខ្ពស់នៃក្រសួងរតនាគារអាមេរិក បានបញ្ចេញតួលេខដ៏គួរឱ្យរន្ធត់មួយថា សហរដ្ឋអាមេរិកបានចំណាយសម្រាប់ប្រតិបត្តិការ Epic Fury ដែលជាប្រតិបត្តិការយោធាខ្នាតយក្ស ដោយសហការជាមួយអ៊ីស្រាអែល ដើម្បីវាយប្រហារអ៉ីរ៉ង់ គឺមានចំនួនច្រើនលើសលប់ ដែលនាំឱ្យសេដ្ឋកិច្ចអាមេរិកអាចនឹងរងការខាតបង់សរុបរហូតដល់ទៅ២១០ពាន់លានដុល្លារ ។
លោក Kent Smetters បច្ចុប្បន្នកាន់តំណែងជានាយកនៃកម្មវិធីគំរូថវិកា Penn Wharton ហើយជាអ្នកបង្កើតគំរូសម្រាប់វិភាគផលប៉ះពាល់ហិរញ្ញវត្ថុ និងម៉ាក្រូសេដ្ឋកិច្ចនៃគោលនយោបាយសហព័ន្ធ ដែលត្រូវបានប្រើប្រាស់នៅក្នុងអង្គភាពជាច្រើនក្នុងទីក្រុងវ៉ាស៊ីនតោន បានព្រមានថា តួលេខនេះ មិនមែនគ្រាន់តែជាការចំណាយលើគ្រាប់រំសេវនោះទេ ប៉ុន្តែវាគឺជា ដំបៅសេដ្ឋកិច្ច ដែលកើតចេញពីផលប៉ះពាល់អវិជ្ជមានលើពាណិជ្ជកម្មសកល តម្លៃថាមពល និងទីផ្សារហិរញ្ញវត្ថុ ។
១. ចំណាយយោធាផ្ទាល់ ៖ គិតត្រឹមពេលនេះ ប្រតិបត្តិការ Epic Fury ដែលលោក Trump បានបញ្ជាឱ្យវាយប្រហារលើមូលដ្ឋានមីស៊ីល និងកម្មវិធីនុយក្លេអ៊ែរអ៉ីរ៉ង់ កាលពីថ្ងៃទី២៨ កុម្ភៈ បានចំណាយអស់ទឹកប្រាក់ចន្លោះពី៤០ ទៅ៩៥ ពាន់លានដុល្លារ រួចស្រេចទៅហើយ ។ ចំនួននេះរួមបញ្ចូលទាំងការចំណាយលើការវាយប្រហារផ្ទាល់ និងការជួសជុលគ្រាប់រំសេវដែលបានប្រើប្រាស់ ។
២. ការខាតបង់ដែលមើលមិនឃើញ ៖ ក្រៅពីលុយដែលធ្លាក់ទៅក្នុងសមរភូមិ សេដ្ឋកិច្ចជាតិអាមេរិកត្រូវបានគេរំពឹងថា នឹងរងការប៉ះទង្គិចបន្ថែមចំនួន ១១៥ពាន់លានដុល្លារទៀត ។
លោក Smetters កត់សម្គាល់ថា ប្រសិនបើសង្គ្រាមនេះអូសបន្លាយលើសពី ២ខែ តួលេខខាតបង់នឹងហក់ឡើងខ្ពស់ហួសពីការស្មាន ។
៣. តម្លៃដែលត្រូវបង់ដោយឈាម និងបំណុល ៖ មិនមែនមានតែតួលេខជាលុយដុល្លារនោះទេ សហរដ្ឋអាមេរិកបានបង់ថ្លៃដោយជីវិតទាហានយ៉ាងហោចណាស់៦នាក់រួចទៅហើយ នៅក្នុងការសងសឹកវិញពីសំណាក់អ៉ីរ៉ង់ ។
ទន្ទឹមនឹងនេះ រដ្ឋាភិបាលអាមេរិកក៏កំពុងប្រឈមនឹងការសងប្រាក់ពន្ធចំនួន១៧៩ពាន់លានដុល្លារ ត្រឡប់ទៅឱ្យធុរកិច្ចវិញ ក្រោយតុលាការកំពូលសម្រេចថា ការប្រមូលពន្ធក្រោមច្បាប់ IEEPA កន្លងមក គឺជាអំពើខុសច្បាប់ ។
ទោះជាយ៉ាងណាក៏ដោយ លោក Smetters ក៏បានផ្ដល់ជាទស្សនៈម្ខាងទៀតថា ប្រសិនបើអាមេរិកមិនធ្វើសកម្មភាពនៅពេលនេះ ហើយទុកឱ្យអ៉ីរ៉ង់ផលិតអាវុធនុយក្លេអ៊ែរបានជោគជ័យ នោះចំណាយនាពេលអនាគតដើម្បីទប់ទល់នឹងមហាអំណាចនុយក្លេអ៊ែរមួយនេះ អាចនឹងខ្ពស់ជាងនេះរាប់រយដង ។
បច្ចុប្បន្ន មតិសាធារណៈនៅសហរដ្ឋអាមេរិក នៅតែបែងចែកគ្នា ខណៈការគាំទ្រចំពោះប្រតិបត្តិការនេះមានកម្រិតទាប ។ សំណួរថា «តើវាមានសមតម្លៃដែរឬទេ?» កំពុងក្លាយជាប្រធានបទពិភាក្សាដ៏ក្តៅគគុកនៅវ៉ាស៊ីនតោន៕
ចែករំលែកព័តមាននេះ