ខេត្តព្រះសីហនុ ៖ ថ្ងៃទី១៦ មករា ឆ្នាំ២០១២ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ អមដំណើរដោយលោកអ៊ិត ណូឌី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកចាយ សាមិត្ត ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានរដ្ឋបាល
ខេត្តព្រះសីហនុ ៖ ថ្ងៃទី១៦ មករា ឆ្នាំ២០១២ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ អមដំណើរដោយលោកអ៊ិត ណូឌី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកចាយ សាមិត្ត ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានរដ្ឋបាល ការពារ និងអភិរក្សធម្មជាតិ នៃក្រសួងបរិស្ថាន និងលោក លោកស្រី នៃក្រុមប្រឹក្សាស្តារអភិវឌ្ឍន៍ កសិកម្ម និងជនបទ និងរដ្ឋបាលព្រៃឈើនៃក្រសួងកសិកម្ម បានចុះពិនិត្យមើល និងស្វែងយល់ពីកិច្ចដំណើរការកសិដ្ឋានដាំដើមអាកាស្យារបស់ក្រុមហ៊ុនខេម៉ាហ្ក្រា (CamAgra) ដែលជាក្រុមហ៊ុនវិនិយោគបរទេសមកពីប្រទេសអ៊ីស្រាអែល នៅក្នុងភូមិសាស្ត្រស្រុកកំពង់សិលា ។
លោកបណ្ឌិត នា អាតម៉ុន (Dr.Nir Aizmon) អ្នកចាត់ចែងទូទៅប្រចាំកសិដ្ឋាននៃក្រុមហ៊ុនខេម៉ាហ្ក្រា បានជម្រាបជូនគណៈប្រតិភូថា ក្រុមហ៊ុនខេម៉ាហ្ក្រាជាក្រុមហ៊ុនដែលមានការប្តេជ្ញាចិត្តក្នុងការវិនិយោគដាំដើមអាកាស្យា និងដើមប្រេងខ្យល់ (Eucalyptus) នៅកម្ពុជា សម្រាប់រយៈពេលវែង ព្រមជាមួយនឹងការបណ្តុះបណ្តាលបច្ចេកទេសដល់កម្មករកម្ពុជា និងប្រជាជនដែលចាប់អារម្មណ៍ដាំដើមអាកាស្យានូវជំនាញក្នុងការដាំដើមអាកាស្យា ការបង្កាត់ពូជ និងបណ្តុះកូនដើមអាកាស្យា ។ ក្រុមហ៊ុនខេម៉ាហ្ក្រា បានចាប់ផ្តើមធ្វើការវិនិយោគការដាំដុះដើមអាកាស្យានៅប្រទេសកម្ពុជាតាំងពីឆ្នាំ២០០៨ នៅលើផ្ទៃដី៨.០០០ហិកតា ក្នុងភូមិសាស្ត្រខេត្តព្រះសីហនុ និងផ្ទៃដីមួយចំនួនទៀត នៅក្នុងភូមិសាស្ត្រខេត្តកោះកុង និងខេត្តកំពត ។ ការដាំដើមអាកាស្យានេះមានគោលបំណងធ្វើការនាំចេញទៅលក់នៅបរទេស តាមរយៈការកិនកម្ទេចឈើអាកាស្យានៅក្នុងរោងចក្រ ដែលក្រុមហ៊ុនបានសាងសង់នៅក្រុងព្រះសីហនុ ដើម្បីនាំចេញទៅរោងចក្រនៅបរទេសផលិតក្រដាស ។
លោកឧបនាយករដ្ឋមន្ត្រី យឹម ឆៃលី មានប្រសាសន៍ថា ក្នុងនាមរាជរដ្ឋាភិបាលកម្ពុជា សូមអបអរសាទរ និងលើកទឹកចិត្តដល់ការខិតខំចូលរួមវិនិយោគរបស់ក្រុមហ៊ុនខេម៉ាហ្ក្រាលើវិស័យកសិកម្ម ដែលជាវិស័យអាទិភាពមួយរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត និងបទពិសោធន៍សំបូរបែបរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការពន្លឿននូវកំណើនសេដ្ឋកិច្ច និងការកាត់បន្ថយភាពក្រីក្ររបស់ប្រជាជន ។ លោកឧបនាយករដ្ឋមន្ត្រីបានបញ្ជាក់ថា ធនធានព្រៃឈើបានផ្តល់សារប្រយោជន៍យ៉ាងច្រើនក្រៃលែងដល់សង្គមជាតិតាំងពីដើមរៀងមក ក្នុងនោះយើងទាំងអស់គ្នាបានមើលឃើញព្រៃឈើ មិនគ្រាន់តែមានតម្លៃខាងសេដ្ឋកិច្ច និងសង្គមប៉ុណ្ណោះទេ តែនៅមានតម្លៃខ្ពស់មិនអាចប៉ាន់ប្រមាណបានក្នុងការជួយថែរក្សាលំនឹងបរិស្ថានធម្មជាតិ ធ្វើឱ្យធាតុអាកាសមានភាពកាន់តែប្រសើរឡើង រក្សាបាននូវប្រភពទឹក ការពារទីជម្រាល និងការពារជីវចម្រុះផ្សេងៗនៅក្នុងសហគមន៍ ។
បន្ទាប់មក លោកឧបនាយករដ្ឋមន្ត្រី និងគណៈប្រតិភូអមដំណើរបានអញ្ជើញពិនិត្យមើលសកម្មភាពបង្កាត់បណ្តុះពូជ និងថែទាំកូនដើមអាកាស្យា ការកែច្នៃកាកសំណល់ដែលជាសកម្មភាពផលិតជីកំប៉ុស្តសម្រាប់ជួយបង្កើនគុណភាពដីដើម្បីដាំដើមអាកាស្យា និងបានអញ្ជើញចូលរួមដាំកូនអាកាស្យាជានិមិត្តរូប ។ លោកឧបនាយករដ្ឋមន្ត្រីបានសំណូមពរឱ្យក្រុមហ៊ុនខេម៉ាហ្ក្រា ជួយផ្តល់បច្ចេកទេសដល់ប្រជាពលរដ្ឋ និងកម្មករដែលបម្រើការនៅទីនោះឱ្យចេះដាំបន្លែបន្ថែមទៀត ដើម្បីបំពេញបន្ថែមនូវតម្រូវការប្រាក់ចំណូលរបស់ពួកគាត់ ។ នាឱកាសនោះដែរ លោកឧបនាយករដ្ឋមន្ត្រីបានអញ្ជើញទស្សនារោងចក្រម៉ាសីុនកិនកម្ទេចឈើអាកាស្យា ដែលមានទីតាំងនៅសង្កាត់លេខ៣ ក្រុងព្រះសីហនុ ដើម្បីវេចខ្ចប់ដឹកទៅកាន់បណ្តារោងចក្រឧស្សាហកម្មនានានៅក្រៅប្រទេស ។ រោងចក្រម៉ាសីុនកិនកម្ទេចឈើអាកាស្យានេះ មានសមត្ថភាពអាចកិនកម្ទេចឈើបាន៦០តោនក្នុងមួយម៉ោង ។ លោកឧបនាយករដ្ឋមន្ត្រីក៏បានសំណូមពរបន្ថែមទៀតដល់ក្រុមហ៊ុនខេម៉ាហ្ក្រា ជួយទិញយកផលិតផលដើមអាកាស្យារបស់ប្រជាពលរដ្ឋដែលដាំដុះបានជាលក្ខណៈគ្រួសារ សម្រាប់យកមកកិនកម្ទេចនៅក្នុងរោងចក្រនេះ និងនាំទៅលក់នៅក្រៅប្រទេស៕
ចែករំលែកព័តមាននេះ