រដ្ឋាភិបាលឥណ្ឌូណេស៊ីបានលុបចោលការប្រកាសអាសន្នស៊ូណាមី កាលពីយប់ថ្ងៃទី១០ មករា ក្រោយការរញ្ជួយដីមានកម្លាំង៧,៣រីស្ទ័រ ក្នុងដែនទឹកនៃកោះស៊ូម៉ាត្រា។ យោងតាមមជ្ឈមណ្ឌលសិក្សាការរញ្ជួយដីអាមេរិក USGS ថា ការរញ្ជួយដីនេះកើតមានក្នុងមហាសមុទ្រឥណ្ឌានាវេលាម៉ោង២និង៣៧នាទីរំលងអធ្រាត្រម៉ោងក្នុងស្រុក នៅកន្លែងមួយចម្ងាយ៤២០គីឡូម៉ែត្រ ភាគនិរតីទីក្រុងបានដាអាសេ ។ ចំណុចកណ្តាលរបស់វាស្ថិតនៅជម្រៅ២៩គីឡូម៉ែត្រ ក្រោមដី ។ នៅទីក្រុងបានដា អាសេ ស្ថិតនៅចុងខាងជើងកោះស៊ូម៉ាត្រា មានភាពជ្រួលច្របល់ពេលមានការប្រកាសអាសន្នស៊ូណាមី ក្រោយការរញ្ជួយដីដ៏ខ្លាំងនេះ។
ប្រជាជននាំគ្នាប្រញាប់ប្រញាល់រត់ចាកចេញពីអគារទាំងឡាយ ។ ប្រជាជននៅតែមានអារម្មណ៍នឹកឃើញស៊ូណាមីយ៉ាងសែនទារុណកាលពីខែធ្នូ ឆ្នាំ២០០៤ ក្រោយការរញ្ជួយដីខ្លាំងមួយក្នុងដែនទឹកខេត្តអាសេ បណ្តាលឱ្យមនុស្សស្លាប់ជាង២២៥.០០០នាក់ នៅគ្រប់ទីកន្លែងស្ថិតនៅជាប់មហាសមុទ្រឥណ្ឌា ក្នុងនោះមនុស្សជិត១៧០.០០០ពាន់នាក់ស្លាប់ ក្នុងខេត្តអាសេ របស់ឥណ្ឌូណេស៊ីតែមួយគត់ ។ ពុំទាន់មានសេចក្តីរាយការណ៍ពីជនរងគ្រោះ ឬការខូចខាតនានានៅឡើយក្រោយការរញ្ជួយដីខ្លាំងនេះ ៕
ចែករំលែកព័តមាននេះ