រាជធានីភ្នំពេញ ៖ កិច្ចប្រជុំជំរុញការអភិវឌ្ឍន៍វិស័យទេសចរណ៍បានរៀបចំធ្វើឡើងនៅទីស្តីការក្រសួងទេសចរណ៍ កាលពីថ្ងៃទី១៤ ធ្នូ ក្រោមអធិបតីភាពលោកថោង ខុន រដ្ឋមន្ត្រីក្រសួងទេសចរណ៍ ដោយមានការចូលរួមពីក្រុមមន្ត្រីមកពីក្រសួងស្ថាប័នពាក់ព័ន្ធ រួមជាមួយផ្នែកឯកជនជាច្រើនរូបទៀត ។ កិច្ចប្រជុំនេះទាំងមន្ត្រីរាជរដ្ឋាភិបាល និងផ្នែកឯកជនបានលើកឡើងនូវចំណុចសំខាន់ៗមួយចំនួនពាក់ព័ន្ធវិស័យទេសចរណ៍ ពិសេសជំរុញការអភិវឌ្ឍន៍វិស័យនេះក្រោយដំណាក់កាលនៃវិបត្តិសេដ្ឋកិច្ចពិភពលោក ។
ក្នុងនោះរួមមាន ទី១-ជំរុញឱ្យមានការហោះហើរឱ្យបានកាន់តែច្រើនថែមទៀតមកកាន់ព្រះរាជាណាចក្រកម្ពុជា ក៏ដូចជាការហោះហើរក្នុងស្រុក ពិសេសរវាងខេត្តព្រះសីហនុជាមួយខេត្តសៀមរាប ។ ទី២-រៀបចំក្រុមប្រឹក្សាទីផ្សារ និងការផ្សព្វផ្សាយទេសចរណ៍ដែលជាយន្តការជំរុញការផ្សព្វផ្សាយ «កម្ពុជា ព្រះរាជាណាចក្រអច្ឆរិយៈ» ដើម្បីទាក់ទាញទេសចរ ។ ទី៣-ពង្រឹងសន្តិសុខ សុវត្ថិភាពទេសចរណ៍បន្ថែមទៀត ដែលកិច្ចការនេះត្រូវមានការចូលរួមពីប៉ូលិស ពីផ្នែកសណ្តាប់ធ្នាប់ និងពីផ្នែកឯកជននៅតាមបណ្តាភោជនីយដ្ឋាន សណ្ឋាគារ ធ្វើជាបណ្តាញសន្តិសុខរបស់ប៉ូលិស រួមចំណែកការពារផ្ទាល់នៅកន្លែងអាជីវកម្មរបស់ពួកគាត់តែម្តង ។ ទី៤-ជំរុញការដឹកជញ្ជូន និងការធ្វើដំណើររបស់អ្នកទេសចរនៅតាមព្រំដែន ធ្វើយ៉ាងណាឱ្យមានភាពប្រសើរឡើងថែមទៀត ពិសេសការធ្វើដំណើរពីតំបន់មួយទៅតំបន់មួយ ត្រូវធ្វើឱ្យប្រសើរទាំងបដិសណ្ឋារកិច្ច និងរបៀបរបបផ្សេងៗ ធ្វើយ៉ាងណាបង្កការទុកចិត្ត ភាពកក់ក្តៅ សំរាប់ភ្ញៀវទេសចរ ។ ទី៥-អង្គប្រជុំបានលើកឡើងពីការត្រៀមរៀបចំធ្វើវេទិកាទេសចរណ៍អាស៊ាន (ATF) ដែលកម្ពុជាយើងត្រូវធ្វើជាម្ចាស់ផ្ទះនៅខែមករា ឆ្នាំ២០១១ ខាងមុខនេះ ។
កម្មវិធី ATF នេះ មានភ្ញៀវអន្តរជាតិមកពីបណ្តាប្រទេសនានា ប្រមាណ២ពាន់នាក់ និងមានការចូលរួមពីផ្នែកឯកជនផងដែរ ។ សូមបញ្ជាក់ថា សំរាប់រយៈពេល១១ខែឆ្នាំ២០១០ នេះ កម្ពុជាទទួលបានភ្ញៀវទេសចរចំនួន២,២០លាននាក់ កើនឡើងប្រមាណ១៧% និងរំពឹងថា នៅដំណាច់ឆ្នាំ២០១០ យើងនឹងទទួលបាន២,៥០លាននាក់ ៕
ចែករំលែកព័តមាននេះ