ខេត្តរតនគិរី ៖ ជនជាតិចារាយចំនួន៤នាក់ ដែលធ្វើសកម្មភាពដឹកជញ្ជូនឈើប្រណីតប្រភេទធ្នង់តាម ម៉ូតូនៅពេលយប់ឆ្លងដែនខុសច្បាប់ទៅប្រទេសវៀតណាម ក្នុងតំបន់ឃុំញ៉ាង ស្រុកអណ្តូងមាស ត្រូវបានកម្លាំងសហការរវាងរដ្ឋបាលព្រៃឈើនិងប៉ូលិស សេដ្ឋកិច្ចខេត្តបង្ក្រាបនិងឃាត់ខ្លួនបានកាលពីយប់ថ្ងៃទី ២៧ ធ្នូ នៅវេលា
ខេត្តរតនគិរី ៖ ជនជាតិចារាយចំនួន៤នាក់ ដែលធ្វើសកម្មភាពដឹកជញ្ជូនឈើប្រណីតប្រភេទធ្នង់តាមម៉ូតូនៅពេលយប់ឆ្លងដែនខុសច្បាប់ទៅប្រទេសវៀតណាម ក្នុងតំបន់ឃុំញ៉ាង ស្រុកអណ្តូងមាស ត្រូវបានកម្លាំងសហការរវាងរដ្ឋបាលព្រៃឈើនិងប៉ូលិសសេដ្ឋកិច្ចខេត្តបង្ក្រាបនិងឃាត់ខ្លួនបានកាលពីយប់ថ្ងៃទី២៧ ធ្នូ នៅវេលាម៉ោង២រំលងអធ្រាត្ររួចបញ្ជូនមកកាន់ស្នងការដ្ឋានដើម្បីកសាងសំណុំរឿងបញ្ជូនទៅសាលាដំបូងខេត្ត ។
តាមប្រភពព័ត៌មានបានឱ្យដឹងថា មនុស្ស៤នាក់ដែលត្រូវកម្លាំងសហការចាប់ខ្លួននោះ ១-ឈ្មោះរចំ ហួន ភេទប្រុស អាយុ២២ឆ្នាំ ២-ឈ្មោះសល់ ថេន ភេទប្រុស អាយុ២៥ឆ្នាំ ៣-ឈ្មោះសល់ ប៉ុល ភេទប្រុស អាយុ១៨ឆ្នាំ និង៤-ឈ្មោះរចំ ហ៊ត់ ភេទប្រុស អាយុ១៥ឆ្នាំ ។ អ្នកទាំង៤នាក់ជាជនជាតិចារាយ រស់នៅក្នុងភូមិញ៉ាង ឃុំញ៉ាង ស្រុកអណ្តូងមាស។
ប្រភពព័ត៌មានបានបន្តទៀតថា មុនពេលចាប់ខ្លួនអ្នកទាំង៤នាក់ គឺពួកគេបានធ្វើសកម្មភាពដឹកជញ្ជូនឈើប្រណីតប្រភេទធ្នង់តាមម៉ូតូពីក្នុងព្រៃនៅតំបន់ភូមិមុយ ឃុំញ៉ាង ដែលម៉ូតូមួយគ្រឿងដឹកឈើមួយដុំទំហំ៤តឹកបួនជ្រុងប្រវែង២ម៉ែត្រ២តឹក ក្នុងបំណងយកទៅលក់នៅប្រទេសវៀតណាម ហើយក៏ត្រូវសមត្ថិច្ចចាប់បានរួចដាក់ខ្នោះដៃជាប់គ្នាពីរៗនាក់មកឃុំខ្លួននៅបន្ទប់ការិយាល័យប៉ូលិសសេដ្ឋកិច្ចខេត្តដើម្បីសួរនាំ និងកសាងសំណុំរឿងបញ្ជូនទៅសាលាដំបូង ខេត្ត ។ រហូតមកដល់រសៀលថ្ងៃទី២៩ ធ្នូ គេសង្កេតឃើញជនដែលត្រូវចាប់ខ្លួននោះនៅអង្គុយនៅលើកៅអីថ្មដោយជាប់ខ្នោះ និងមានប៉ូលិសយាមនៅមុខមន្ទីរតុលាការ រួមទាំងសាច់ញាតិបងប្អូនកំពុងទន្ទឹងរង់ចាំចំណាត់ការពីតុលាការនៅឡើយ ។
ប៉ុន្តែចំណុចដែលគួរឱ្យចាប់អារម្មណ៍នោះគឺបងប្អូនសាច់ញាតិបាននាំគ្នាជាច្រើននាក់មានស្រីមានប្រុសនិងកូនផងដែរ បានមកចងអង្រឹងដេកទាំងយប់ទាំងថ្ងៃនៅមុខការិយាល័យប៉ូលិសសេដ្ឋកិច្ចចំនួន២យប់មកហើយ ។
ជនជាប់ចោទទាំង៤នាក់បាននិយាយប្រាប់អ្នកកាសែតឱ្យដឹងថា បានជាពួកខ្លួននាំគ្នាដឹកឈើតាមម៉ូតូនេះ ដោយសារនៅយប់មុនថ្ងៃចាប់ខ្លួនពួកគេនោះ ឃើញមានម៉ូតូដឹកជញ្ជូនឈើទៅប្រទេសវៀតណាមជាង១០០គ្រឿង តែពុំមានការបង្ក្រាបទេ លុះដល់យប់ថ្ងៃបន្ទាប់ពួកខ្លួនដឹកស្រាប់តែមានសមត្ថកិច្ចចាប់ខ្លួនតែម្តង ។ ពួកគេបន្តថា ឈើដែលពួកខ្លួនដឹកទោះបីយកទៅលក់ដល់ស្រុកយួននោះក៏ពុំចំណេញបានច្រើនដែរ ព្រោះត្រូវបង់ជូនសមត្ថកិច្ចច្រើនកន្លែងក្នុងមួយកន្លែង១០ម៉ឺនដុង ។
អ្នកទាំង៤នាក់នោះនិយាយទាំងអស់សង្ឃឹមថា ពួកខ្លួនស្មានថាយកឈើនោះទៅលក់ក្រែងបានកម្រៃខ្លះចិញ្ចឹមក្រុមគ្រួសារ មិននឹកស្មានថា ត្រូវជាប់ខ្នោះបែបនេះទេ ។ បើសិនជាពួកខ្លួនដឹងមុនថាខុសច្បាប់ត្រូវជាប់ខ្នោះបែបនេះ ទោះជាចំណេញកប់ក្តោងក៏ខ្លួនមិនធ្វើដែរ ។ ការចាប់ខ្លួនអ្នកទាំង៤នេះ មជ្ឈដ្ឋានខ្លះបានរិះគន់ថា មិនគួរចាប់ដាក់ខ្នោះបញ្ជូនមកតុលាការនោះទេ ព្រោះកន្លងមកមានរហូតដល់រថយន្តធុនធំដឹកយ៉ាងគគ្រឹកគគ្រេងជារៀងរាល់យប់ ហេតុអ្វីមិនចាប់បែរជាមកអារ.កខ្យងយកឈាមយ៉ាងនេះទៅវិញ ។ ចំណែកមន្ត្រីសមត្ថកិច្ចខិលខូចមួយចំនួនដែលអង្គុយចាំយកលុយពីម៉ូតូនានាដែលដឹកជញ្ជូនឈើនាពេលកន្លងទៅនៅឃុំញ៉ាង ពីភូមិមុយទៅច្រកតាង៉ា ព្រំដែនវៀតណាមនោះ ហេតុដូចម្តេចត្រូវរួចខ្លួនទៅវិញ ឬពួកគេនោះមានខ្នងបង្អែកទេដឹង ។
ទាក់ទិននឹងករណីចាប់ខ្លួនអ្នកដឹកឈើតាមម៉ូតូកាលពីថ្ងៃទី២៧ ធ្នូ កន្លងទៅនោះ មិនអាចសុំការបំភ្លឺពីសមត្ថកិច្ចដែលពាក់ព័ន្ធនិងមន្ត្រីជំនាញបានទេ ៕
យក្សឡោម
ចែករំលែកព័តមាននេះ