សម្ព័ន្ធអារ៉ាប់ បានប្រកាសពីផែនការកាត់ផ្តាច់ទំនាក់ទំនងពាណិជ្ជកម្មជាមួយរដ្ឋាភិបាល លោកប្រធានាធិបតីស៊ីរី Bashar Al Assad និងបានបង្កកទ្រព្យរបស់ខ្លួនដើម្បីឆ្លើយតបនឹងអំពើហិង្សាក្នុងប្រទេសស៊ីរី ដែលបណ្តាលឱ្យសកម្មជនចំនួន៤២នាក់ស្លាប់ និងយោធាជាច្រើននាក់ទៀតស្លាប់។ ការដាក់ទណ្ឌកម្មនោះ បានជំរុញឱ្យប្រទេសស៊ីរីធ្លាក់កាន់តែជ្រៅចូលក្នុងវិបត្តិសេដ្ឋកិច្ច និងក្លាយជារដ្ឋឯកោ។
គណៈកម្មាធិការសេដ្ឋកិច្ចក្រុមសម្ព័ន្ធអារ៉ាប់ ដែលមានទីតាំងក្នុងទីក្រុងគែរ ប្រទេសអេហ្ស៊ីប បានប្រកាសពីការដាក់ទណ្ឌកម្មនេះកាលពីថ្ងៃសៅរ៍ ទី២៦ វិច្ឆិកា ហើយវិធានការនេះត្រូវបានអនុម័តដោយរដ្ឋមន្ត្រីការបរទេសនៅថ្ងៃអាទិត្យ ទី២៧ វិច្ឆិកា មុនពេលចូលជាធរមាន។ ទណ្ឌកម្មទាំងនោះរួមបញ្ចូលទាំងបម្រាមការធ្វើដំណើរសម្រាប់មន្ត្រីជាន់ខ្ពស់ស៊ីរី និងផ្អាកការហោះហើរទៅកាន់ប្រទេសស៊ីរីផងដែរ។ នេះបើតាមឯកសាររបស់សម្ព័ន្ធអារ៉ាប់។
កិច្ចព្រមព្រៀងជាមួយធនាគារកណ្តាលនៃប្រទេសស៊ីរី នឹងត្រូវផ្អាក ប៉ុន្តែតម្រូវការជាមូលដ្ឋានចាំបាច់របស់ប្រជាជនស៊ីវិល នឹងត្រូវលើកលែងពីការដាក់ទណ្ឌកម្មនេះ។ ការសម្រេចដាក់ទណ្ឌកម្មនេះធ្វើឡើងបន្ទាប់ពីប្រទេសស៊ីរីមិនអនុញ្ញាតឱ្យអ្នកសង្កេតការណ៍ចូលក្នុងប្រទេស និងជាផ្នែកមួយនៃការជួយចូលរួមបញ្ចប់ការបង្ក្រាបការធ្វើបាតុកម្មដែលបានធ្វើឡើងអស់រយៈពេល៨ខែមកហើយ។ អង្គការសហប្រជាជាតិនិយាយថា ចំនួនអ្នកស្លាប់ដោយសារការបង្ក្រាបមានចំនួន៣.៥០០នាក់។
បើទោះបីជាប្រទេសស៊ីរីសន្យាថា នឹងដកកងទ័ពចេញពីទីក្រុង និងអនុញ្ញាតឱ្យអ្នកសង្កេតការណ៍ចូលក្តី តែអំពើហិង្សានៅតែបន្ត។ មានប្រជាជនស៊ីវិល និងកងទ័ពត្រូវបានគេរាយការណ៍ថា ស្លាប់ក្នុងប្រទេសស៊ីរីនៅក្នុងខែនេះ។ បាតុកម្មក្នុងប្រទេសស៊ីរី ធ្វើឡើងបន្ទាប់ពីមានភាពចលាចលក្នុងការទម្លាក់មេដឹកនាំក្នុងប្រទេសទុយនីស៊ី អេហ្ស៊ីប និងលីប៊ី ៕
ចែករំលែកព័តមាននេះ