ខេត្តកណ្តាល ៖ នគរបាលច្រកទ្វារជ្រៃធំកម្ពុជា និងនគរបាលច្រកទ្វារព្រំដែន៩៣៣ ឡុងប៊ិន ខេត្តអាងយ៉ាង ប្រទេសវៀតណាម កាលពីថ្ងៃទី២៣ ខែវិច្ឆិកា ឆ្នាំ២០១១ បានបើកកិច្ចប្រជុំស្តីពីការពង្រឹងការងារទប់ស្កាត់ និងបង្ក្រាបបទល្មើសគ្រឿងញៀននៅតាមតំបន់ព្រំដែននៃប្រទេស ទាំងពីរ ។
ខេត្តកណ្តាល ៖ នគរបាលច្រកទ្វារជ្រៃធំកម្ពុជា និងនគរបាលច្រកទ្វារព្រំដែន៩៣៣ ឡុងប៊ិន ខេត្តអាងយ៉ាង ប្រទេសវៀតណាម កាលពីថ្ងៃទី២៣ ខែវិច្ឆិកា ឆ្នាំ២០១១ បានបើកកិច្ចប្រជុំស្តីពីការពង្រឹងការងារទប់ស្កាត់ និងបង្ក្រាបបទល្មើសគ្រឿងញៀននៅតាមតំបន់ព្រំដែននៃប្រទេសទាំងពីរ ។
កិច្ចប្រជុំនេះ ធ្វើឡើងនៅប៉ុស្តិ៍នគរបាលច្រកទ្វារជ្រៃធំកម្ពុជា ក្រោមអធិបតីភាពលោកវរសេនីយ៍ឯក លន់ សុផាត ស្នងការរងនគរបាលខេត្ត និងជាប្រធានលេខាធិការដ្ឋានប្រយុទ្ធប្រឆាំងគ្រឿងញៀននៃគណៈកម្មាធិការត្រួតពិនិត្យគ្រឿងញៀនខេត្ត និងមានការចូលរួមពីមន្ត្រីនគរបាលស្រុកកោះធំ ប៉ុស្តិ៍នគរបាលច្រកទ្វារជ្រៃធំ និងមន្ត្រីនគរបាលច្រកទ្វារព្រំដែន៩៣៣ ឡុងប៊ិន ខេត្តអាងយ៉ាង ជាច្រើននាក់ទៀតផង ។
លោកវរសេនីយ៍ឯកលន់ សុផាត បានមានមតិនៅក្នុងអង្គប្រជុំដោយគូសបញ្ជាក់ថា គោលបំណងនៃកិច្ចប្រជុំគឺដើម្បីសិក្សាស្វែងយល់អំពីសភាពការណ៍គ្រឿងញៀនតាមព្រំដែន និងបន្តការទំនាក់ទំនងរវាងមន្ត្រីការិយាល័យទំនាក់ទំនងព្រំដែនវៀតណាម និងកម្ពុជាឱ្យកាន់តែជិតស្និទ្ធ។
លោកស្នងការរងក៏បានថ្លែងឱ្យដឹងទៀតថា ក្នុងនាមតំណាងឱ្យលោកប្រធានគណៈកម្មាធិការប្រយុទ្ធប្រឆាំងគ្រឿងញៀនខេត្ត និងលោកឧត្តមសេនីយ៍ស្នងការ លោកសូមថ្លែងអំណរគុណចំពោះនគរបាលច្រកទ្វារជ្រៃធំ និងការិយាល័យទំនាក់ទំនងព្រំដែន(BLO)អានភូ ខេត្តអាងយ៉ាង និងមន្ត្រីប៉ុស្តិ៍ព្រំដែនខាងភាគីវៀតណាមដែលបានចូលរួមបើកកិច្ចប្រជុំ ។ សូមកោតសរសើរចំពោះលទ្ធផលដែលសមត្ថកិច្ចនៃច្រកព្រំដែនទាំងពីរ បង្ក្រាបបទល្មើសគ្រឿងញៀននៅក្នុងឆ្នាំ២០១១នេះ បានចំនួន១០ករណី ឃាត់ខ្លួនជនសង្ស័យបានចំនួន៣៥នាក់ ដកហូតវត្ថុតាងថ្នាំញៀនប្រភេទមេតំហ្វេតាមីន(ice) ទម្ងន់ជាង៦០ក្រាម ប្រភេទហេរ៉ូអ៊ីនចំនួន១តែម កញ្ឆាក្រៀមចំនួន២ដុំ ប្រាក់២០០.០០០រៀល និង៦០០.០០០ដុង ម៉ូតូ២គ្រឿង ទូរស័ព្ទ៦គ្រឿង និងសម្ភារវេចខ្ចប់ធ្វើការចែកចាយនិងប្រើប្រាស់គ្រឿងញៀនមួយចំនួនទៀត ។
លោកស្នងការរងក៏បានក្រើនរំលឹកផងដែរដល់មន្ត្រីនគរបាលស្រុកកោះធំ និងប៉ុស្តិ៍រដ្ឋបាលនៅតំបន់ព្រំដែន ឱ្យយកចិត្តទុកដាក់ក្តាប់ស្ថិតិអ្នកប្រើប្រាស់និងអ្នកចែកចាយគ្រឿងញៀនឱ្យបានច្បាស់លាស់ ព្រោះវាជាការងារស្នូលមួយយ៉ាងសំខាន់ បើប៉ុស្តិ៍រដ្ឋបាលក្តាប់ពុំបានទេ យើងពុំអាចសម្រេចផែនការកាត់បន្ថយបទល្មើសគ្រឿងញៀនបានទេ ។ លោកអធិការ អធិការរង ត្រូវយកចិត្តទុកដាក់លើបញ្ហានេះ ព្រោះវាជាគន្លឹះនៃប្រសិទ្ធភាពការងារ ត្រូវសិក្សាវិធានការញុះញង់ឱ្យទទួលបានលទ្ធផលល្អ និងស្របតាមនីតិវិធី ។ ចំណុចមួយទៀតត្រូវពង្រឹងកិច្ចសហប្រតិបត្តិការរវាង BLO ខេត្តអាងយ៉ាង និង BLO ជ្រៃធំឱ្យបានល្អ ពិសេសទំនាក់ទំនងគ្នាជាប្រចាំក្នុងការផ្តល់ព័ត៌មានឱ្យគ្នាទៅវិញទៅមក ។ ចំពោះមន្ត្រី BLO ត្រូវខិតខំគ្រប់គ្រងសារធាតុផ្សំគ្រឿងញៀនដែលឆ្លងកាត់តាមព្រំដែននៃប្រទេសទាំងពីរ ។
លោកស្នងការរងបានគូសបញ្ជាក់ថា ចំពោះលទ្ធផលដែលសមត្ថកិច្ចច្រកព្រំដែនទាំងពីរធ្វើការទប់ស្កាត់និងបង្ក្រាបកន្លងមក គឺបានឆ្លើយតបនឹងកម្មវិធីនយោបាយ និងយុទ្ធសាស្ត្រចតុកោណដំណាក់កាលទី២ របស់រាជរដ្ឋាភិបាលអាណត្តិទី៤ ជាពិសេសរាល់អនុសាសន៍និងបទបញ្ជារបស់ប្រមុខរាជរដ្ឋាភិបាល និងបទបញ្ជារបស់នាយឧត្តមសេនីយ៍អគ្គស្នងការនគរបាលជាតិ កាលពីថ្ងៃទី៥ ខែមេសា ឆ្នាំ២០១១ ក្នុងកិច្ចប្រជុំផ្ទាល់ជាមួយមន្ត្រីទទួលបន្ទុកគ្រឿងញៀនខេត្ត និងរាជធានី ៕
ចែករំលែកព័តមាននេះ