ការចាត់វិធានការប្រឆាំងឧក្រិដ្ឋកម្មស្កេមអនឡាញ បានរុញច្រានឲ្យវិស័យសំណង់នៅកម្ពុជា ដែលកាលពីឆ្នាំ២០២៥ កម្រើកបន្តិច ឥឡូវដាំក្បាលចុះវិញ ។ តាមរបាយការណ៍ព្យាករណ៍ដែលប្រកាស នៅក្នុងឯកសារក្របខណ្ឌហិរញ្ញវត្ថុរយៈពេលមធ្យម ឆ្នាំ២០២៧ ដល់២០២៩…
ការចាត់វិធានការប្រឆាំងឧក្រិដ្ឋកម្មស្កេមអនឡាញ បានរុញច្រានឲ្យវិស័យសំណង់នៅកម្ពុជា ដែលកាលពីឆ្នាំ២០២៥ កម្រើកបន្តិច ឥឡូវដាំក្បាលចុះវិញ ។
តាមរបាយការណ៍ព្យាករណ៍ដែលប្រកាស នៅក្នុងឯកសារក្របខណ្ឌហិរញ្ញវត្ថុរយៈពេលមធ្យម ឆ្នាំ២០២៧ ដល់២០២៩ បានឲ្យដឹងថា វិស័យសំណង់នៅឆ្នាំ២០២៥ កម្រើកបន្តិចដល់១,៣ភាគរយ ដោយសារតែសំណង់លំនៅស្ថានមានតម្រូវការខ្លះនៅក្នុងស្រុក និងសំណង់បម្រើឲ្យវិស័យឧស្សាហកម្ម ដូចជា កសាងរោងចក្រ ឃ្លាំង និងហេដ្ឋារចនាសម្ព័ន្ធជាដើម ។
ប្រភពដដែលបានបន្តថា ដល់ឆ្នាំ២០២៦នេះ គេព្យាករណ៍ថា វិស័យសំណង់នេះមិនកើនទេ ផ្ទុយទៅវិញ វាថយចុះមកវិញ ដោយទទួលកំណើនត្រឹម០,៧ភាគរយប៉ុណ្ណោះ ។
ប្រភពដដែលបានអះអាងថា ការថយចុះនេះ គឺដោយសារតែរដ្ឋាភិបាលបង្ក្រាបប្រភពសេដ្ឋកិច្ចខ្មៅ ពោលគឺស្កេមអនឡាញ ដែលជាអតិថិជនចម្បងមួយ នៅតាមអគារមួយចំនួននៅក្នុងប្រទេស ។ ការបង្ក្រាបស្កែម នឹងជាផលប្រយោជន៍រយ:ពេលវែងសម្រាប់កម្ពុជា តាមរយ:ការស្តារទំនុកចិត្តក្នុងចំណោមវិនិយោគបរទេស ។
ជាការពិតមកដល់ពេលនេះ អគារមួយចំនួនដែលសាងសង់នៅកម្ពុជា គឺត្រូវបានគេជួលឲ្យទៅក្រុមឧក្រិដ្ឋជននៅក្នុងសង្គមងងឹតនេះ ហើយក្រោយបង្ក្រាបអគារខ្លះត្រូវស្ថិតនៅក្នុងការត្រួតពិនិត្យ ហើយអគារខ្លះមិនមានអតិថិជននៅឡើយ ៕
ចែករំលែកព័តមាននេះ