ខេត្តកណ្តាល ៖ បុរសជាកសិករម្នាក់បានរងរបួសយ៉ាងធ្ងន់ បន្ទាប់ពីបុរសរូបនេះបានចេញពីស៊ីការគេនៅក្នុងភូមិ ហើយស្រវឹងធ្លាក់ភ្នែកបានជិះម៉ូតូក្នុងល្បឿនលឿន ស្រាប់តែជ្រុលទៅបុកចំក្បាលរថយន្ដកូរ៉េផ្ទុកអេតចាយ១គ្រឿងដែលចតបញ្ជ្រាសទិសទុកចោលនៅលើផ្លូវ ។ គ្រោះថ្នាក់ចរាចរណ៍នេះកើតឡើងកាលពីវេលាម៉ោង៦និង៣០នាទីល្ងាចថ្ងៃទី២៣ វិច្ឆិកា នៅលើកំណាត់ផ្លូវលេខ១១៨ ក្នុងភូមិពពាល ឃុំពពាល ស្រុកលើកដែក ខេត្ដកណ្ដាល។
ក្រុមគ្រួសាររបស់ជនរងគ្រោះបានប្រាប់ឱ្យដឹងថា មុនពេលកើតហេតុជនរងគ្រោះឈ្មោះប៉ិន ជាតិ អាយុ៣៧ឆ្នាំ ជាកសិករនៅភូមិ-ឃុំខាងលើបានជិះម៉ូតូមា៉កសេ១២៥ ពណ៌ខ្មៅ ស៊េរី២០១០ ក្នុងទិសដៅពីជើងទៅត្បូងដោយល្បឿនលឿន ហើយមានសភាពស្រវឹងជោកផង ក៏ទៅបុកក្បាលរថយន្ដកូរ៉េ១គ្រឿងយ៉ាងពេញទំហឹង បណា្ដលឱ្យម៉ូតូចូលទៅក្រោមរថយន្ដ ចំណែកជនរងគ្រោះបានបោកនិងក្បាលរថយន្ដ ត្រូវក្បាលខាងក្រោយរងរបួសធ្ងន់ ហើយត្រូវបានបញ្ជូនមកមន្ទីរពេទ្យបង្អែកស្រុកលើកដែក ប៉ុន្ដែដោយសារស្ថានភាពជំងឺជនរងគ្រោះធ្ងន់ធ្ងរពេក ក៏បញ្ជូនបន្ដមកមន្ទីរពេទ្យមិត្តភាពកម្ពុជា-សូវៀត។ ហេតុការណ៍ខាងលើត្រូវបាននគរបាលស្រុកលើកដែក ខេត្ដកណ្ដាល ចុះទៅត្រួតពិនិត្យ និងបានរឹបអូសយករថយន្ដដែលចតខុសច្បាប់ចរាចរ ហើយបង្កគ្រោះថ្នាក់ដល់អ្នកដទៃយកទៅរក្សាទុកនៅការិយាល័យដើម្បីដោះស្រាយតាមនីតិវិធី៕
ចែករំលែកព័តមាននេះ