រាជធានីភ្នំពេញ ៖ បនល្បែងស៊ីសងមួយកន្លែងស្ថិតនៅក្រុមទី៦ ភូមិទី៣ ក្នុងចំណតរថយន្តគីឡូម៉ែត្រលេខ៩ សង្កាត់ច្រាំងចំរេះទី១ ខណ្ឌឫស្សីកែវ ត្រូវគេបើកលេងយ៉ាងគគ្រឹកគគ្រេងកំពុងតែពង្វក់ក្រុមយុវជនឱ្យញៀននឹងល្បែង និងបង្កការក្តៅក្រហាយពីប្រជាពលរដ្ឋដែលជាអ្នកអាណាព្យាបាល បាននាំគ្នាសំណូមពរដល់មន្ត្រីប៉ូលិសក៏ដូចជាអាជ្ញាធរគ្រប់ជាន់ថ្នាក់ឱ្យជួយលុបបំបាត់បនល្បែងនេះផង ព្រោះវង់ល្បែងនេះកំពុងប្រឆាំងទៅនឹងការអនុវត្តនយោបាយភូមិ-សង្កាត់មានសុវត្ថិភាព ។
អ្វីដែលធ្វើឱ្យមានការចាប់អារម្មណ៍ ចំពោះការបើកល្បែងស៊ីសងនេះត្រូវប្រជាពលរដ្ឋឱ្យដឹងថា ជាមន្ត្រីប៉ូលិសប៉ុស្តិ៍ម្នាក់ ដែលបានបើកលេងល្បែងជាច្រើនឆ្នាំមកហើយ។
ប្រជាពលរដ្ឋម្នាក់ក្នុងចំណោម៦នាក់ដែលបានសុំឱ្យកោះសន្តិភាព ជួយផ្សាយពីវង់ល្បែងនេះ ដើម្បីឱ្យសមត្ថកិច្ចគ្រប់ជាន់ថ្នាក់ជួយចាត់វិធានការបំបាត់ឱ្យបាន ព្រោះកូនរបស់គាត់កំពុងតែញៀននឹងល្បែង ហើយលួចប្រាក់ឪពុកម្តាយ និងលក់របស់របរយកលុយទៅលេងល្បែងមិនគិតពីការរៀនសូត្រ។ ប្រជាពលរដ្ឋរូបនេះបានបន្តថា កន្លងមកពួកគាត់រស់នៅសង្កាត់ច្រាំងចំរេះទី១ ខណ្ឌឫស្សីកែវ មានភាពសុខសាន្តណាស់ ទើបតែរយៈពេលប្រមាណជា៣ឆ្នាំនេះទេ ស្រាប់តែមន្ត្រីប៉ូលិសរូបនោះបានទៅជួលផ្ទះគេបើកលេងបៀ បុកប៊ីយែរនិងបើកតារាងបាល់លេងភ្នាល់ធ្វើឱ្យកូនរបស់គាត់ងប់ងុលនឹងល្បែង ថ្ងៃណាក៏ដូចថ្ងៃណា មិនគិតពីការរៀនសូត្រទេ។ មិនត្រឹមតែប៉ុណ្ណោះ ចេះលួចប្រាក់ និងលក់របស់របរដូចជាទូរស័ព្ទអស់ជិត១០គ្រឿង និងលក់កុំព្យូទ័រលេបថប ដើម្បីយកប្រាក់ទៅលេងល្បែងទៀត។
ស្ត្រីជាម្តាយរូបនេះបានបន្តទៀតថា តើឱ្យគាត់ទៅប្តឹងអ្នកណា បើមន្ត្រីប៉ូលិសប្រកបរបរបើកល្បែងទៅហើយនោះ ដូច្នេះមានតែរត់មករកកោះសន្តិភាព ដើម្បីឱ្យជួយផ្សព្វផ្សាយឱ្យអាជ្ញាធរ និងសមត្ថកិច្ចគ្រប់ជាន់ថ្នាក់ចុះទៅបង្ក្រាប ឬណែនាំឱ្យបញ្ឈប់ដើម្បីភូមិ-សង្កាត់មានសុវត្ថិភាព ។
ដោយឡែកនៅសង្កាត់ទួលសង្កែ មានវង់អាប៉ោងមួយកន្លែងតាមផ្លូវរទេះភ្លើង និងមន្ត្រីប៉ូលិសម្នាក់នៅភូមិទួលគោក បានបើកល្បែងស៊ីសងដែរ រួមទាំងមានល្បែងហ្គេមដែលលោកសយ កុសល ចៅសង្កាត់ទួលសង្កែ ធ្លាប់បានណែនាំឱ្យលោកនាយប៉ុស្តិ៍នោះបញ្ឈប់តែល្បែងនៅដដែល។ ការផ្សាយព័ត៌មានទាក់ទងនឹងល្បែងស៊ីសងប៉ុណ្ណេះមិនទាន់បញ្ចប់ទេ បើសិនជាគ្មានការអើពើពីអាជ្ញាធរយើង នឹងផ្សាយព័ត៌មាននេះតទៅទៀត តែសង្ឃឹមថា សមត្ថកិច្ច និងអាជ្ញាធរពិតជាលុបបំបាត់បាតុភាពអសន្តិសុខនេះមិនខាន ៕
ចែករំលែកព័តមាននេះ