ក្លឹបបិសាចក្រហម Man Utd ជើងឯកក្នុងក្របខណ្ឌប្រឺមីញេលីក១៩ជំនាន់ បានផ្តល់ឱកាសដល់ក្មេងប្រុសឆាលី ចនសុន កីឡាករវ័យក្មេងអាយុ៥ឆ្នាំ មកហ្វឹកហ្វឺននៅក្នុងក្លឹប ក្រោយពីមានចំណាប់អារម្មណ៍លើទម្រង់លេងកាលពី២ឆ្នាំមុន ប៉ុន្តែខុសត្រង់ថា ក្មេងប្រុសរូបនេះជាអ្នកគាំទ្រក្លឹបទូកក្តោង Man City ជាគូប្រជែង។
គ្រូបង្វឹកក្លឹប Man Utd មានក្តីរំភើបនៅពេលបានឃើញក្មេងប្រុសឆាលីលេងបាល់ជាលើកដំបូងក្នុងកម្មវិធីហ្វឹកហ្វឺនបាល់ទាត់កុមារក្នុងទីក្រុងម៉េនឆេស្ទ័រ កាលពី២ឆ្នាំមុន ខណៈពេលកុមាររូបនេះមានអាយុ៣ឆ្នាំ លុះឈានមកដល់អាយុគម្រប់៥ឆ្នាំ ទើបហៅមកហ្វឹកហ្វឺនក្នុងមជ្ឈមណ្ឌលហ្វឹកហ្វឺនរបស់ក្លឹប។ ចំណុចគួរឱ្យមានចំណាប់អារម្មណ៍មួយទៀត គឺក្រុមគ្រួសាររបស់ឆាលីជាអ្នកគាំទ្រដ៏ស្មោះត្រង់របស់ក្លឹប Man City ដោយលោកអេនឌី អាយុ៣៨ឆ្នាំ ជាឪពុកបង្ហើបឱ្យដឹងថា គេត្រូវការព្យាយាមលួងលោមរហូតធ្វើឱ្យកូនប្រុសយល់ព្រមពាក់អាវរបស់ក្លឹប Man Utd ។
លោកអេនឌី បាននិយាយពីកូនប្រុសរបស់ខ្លួនថា «ទឹកចិត្តរបស់គេគាំទ្រលើកីឡាករចូហាត និងមារីយ៉ូ បាឡូតេលី នៅក្នុងក្លឹប Man City ។ ខ្ញុំមានអារម្មណ៍ខ្មាសអៀនដែលកូនប្រុសឆាលីទៅហ្វឹកហ្វឺនជាមួយ Man Utd ប៉ុន្តែចាត់ទុកថា ជារឿងល្អដែលបច្ចុប្បន្នគេស្រឡាញ់ការហ្វឹកហ្វឺន និងឱកាសដែល Man Utd ប្រគល់ជូនគឺជារឿងល្អសម្រាប់គេ» ៕
ចែករំលែកព័តមាននេះ