ខេត្តស្ទឹងត្រែង ៖ ឧប្បទ្ទវហេតុគ្រោះថ្នាក់ចរាចរណ៍មួយបានកើតឡើងបណ្តាលឲ្យបុរសជនជាតិចិននិងខ្មែរចំនួនបីនាក់របួសធ្ងន់និងស្រាលដោយសារក្រឡាប់រថយន្តដោយឯកឯង ខណៈធ្វើដំណើរទៅកាន់ខេត្តរតនគិរីដើម្បីជួប ពិភាក្សាដាក់វិនិយោគទុនលើដំណាំចំការកៅស៊ូ។
គួរកត់សម្គាល់ថានេះជាឧប្បទ្ទវហេតុ ក្រឡាប់រថយន្តលើកទីពីរហើយ ដែលបានកើតឡើងក្នុងចំណុចតែមួយដែលកាលពីអំឡុងខែ កក្កដា ២០១១កន្លងមកហេតុការណ៍ក្រឡាប់នោះបណ្តាលឲ្យគ្រួសារអាណិកជនខ្មែររស់នៅប្រទេសបារាំងចំនួន៤នាក់ត្រូវបាត់បង់ជីវិត និងប្រាំនាក់ទៀតបានរងរបួសធ្ងន់ និងស្រាល ខណៈ វិលមកលេងស្រុកកំណើតជួបជុំបងប្អូនហើយធ្វើដំណើរទេសចរណ៍ដោយរថយន្តប្រាដូពណ៌ ទឹកប្រាក់ទៅខេត្តរតនគិរី។ ចំណែកឧប្បទ្ទវហេតុលើកនេះបានកើតឡើងលើជនជាតិចិនចំនួនពីរ នាក់និងខ្មែរម្នាក់ជាអ្នកបកប្រែភាសាឲ្យជនជាតិ ចិន។
ពួកគេបានធ្វើដំណើរដោយរថយន្តប្រាដូស៊េរី ២០០៨ពណ៌ខ្មៅ ចេញពីរាជធានីភ្នំពេញឆ្ពោះទៅខេត្តរតនគិរីក្នុងបំណងជួបពិភាក្សាដាក់វិនិ យោគទុនលើដំណាំចំកាកៅស៊ូ តែបានក្រឡាប់រថយន្តដោយខ្លួនឯង ខណៈធ្វើដំណើរដល់ចំណុចផ្លូវកែងភូមិអូរលាងគ្រួស ឃុំក្បាលរមាស ស្រុកសេសានតាមបណ្តោយផ្លូវជាតិលេខ៧៨អាបណ្តាលឲ្យជនជាតិចិនម្នាក់របួសធ្ងន់បាក់ដងកាំបិត និងបែកក្បាល។ រីឯម្នាក់ទៀតរបួសស្រាល ចំណែកខ្មែរជាអ្នកបកប្រែភាសាចិនមិនរងបួសធ្ងន់ធ្ងរទេ។
តាមព័ត៌មានពីមន្ត្រីប៉ុស្តិ៍ឃុំក្បាលរមាស បានឲ្យដឹងថា ហេតុការណ៍នេះបានកើតឡើងនៅវេលាម៉ោង៣ និង៤៥នាទីរសៀលថ្ងៃទី៩ វិច្ឆិកា ២០១១ ។ ជនជាតិចិនរងគ្រោះទីមួយឈ្មោះ ហួរ កឺស ភេទប្រុស អាយុ៤៤ឆ្នាំ រស់នៅប្រទេសចិនរបួសធ្ងន់ ទីពីរឈ្មោះឈៀង គឹមឈុន ភេទប្រុស អាយុ៣៤ឆ្នាំ ខ្មែររស់នៅភ្នំពេញជាអ្នកបកប្រែរបួសតិចតួចនិងបុរសជនជាតិចិនម្នាក់ទៀតមិនបានស្គាល់ឈ្មោះទេដោយសារអ្នកបកប្រែមិន ឆ្លើយប្រាប់។ អ្នកទាំងបីស្នាក់នៅខណ្ឌមានជ័យរាជធានីភ្នំពេញ។បន្ទាប់ពីគ្រោះថ្នាក់ចរាចរណ៍នេះកើតឡើងត្រូវបានប្រជាពលរដ្ឋជួយនាំទៅមណ្ឌលសុខភាពឃុំក្បាលរមាសរួចបញ្ជូនទៅមន្ទីរពេទ្យខេត្ត និងបន្តទៅភ្នំពេញនៅរសៀលនេះភ្លាមដែរ។ ចំណែករថយន្តត្រូវខូចខាតស្ទើរទាំងស្រុងត្រូវបានស្ទូចដាក់រថយន្តធុនធំមួយគ្រឿងដឹកទៅភ្នំពេញដែរ។
មូលហេតុបែបណានោះមិនមានការអះអាងជាផ្លូវការទេ តែសំរាប់ការកត់សំគាល់ចំណុចនេះជាផ្លូវកោងខ្លាំង ហើយបាំងភ្នំ ពេលដែលអ្នកបើកបរមិនស្គាល់ភូមិសាស្ត្រ និងមិនបង្អង់ល្បឿនគឺពិតជាជួបគ្រោះថ្នាក់ក្រឡាប់រថយន្តមិនខាន។ ដូច្នេះនៅចំណុចនោះគប្បីមន្ត្រីផ្នែកសាធារណការរៀបចំជាស្លាកសញ្ញាសំរាប់ផ្តល់ព័ត៌មានដល់អ្នកបើកបរផងដែរ ទើបអាចបញ្ចៀសគ្រោះថ្នាក់ជាយថាហេតុបាន ៕
ចែករំលែកព័តមាននេះ