រាជធានីភ្នំពេញ ៖ ដោយសារតែការបើកបរមិនគោរពសិទ្ធិគ្នាទៅវិញទៅមកទើបបណ្ដាលឱ្យរថយន្ដពីរគ្រឿង បុកគ្នាពេញទំហឹងនៅកណ្ដាលថ្នល់ ហើយជ្រុលទៅបុករានទេវតាមុខហាងគុយទាវរួចបន្ដទៅបុកបង្គោលដងគោមបំភ្លឺផ្លូវទៅមុខលែងរួច។ គ្រោះថ្នាក់ចរាចរណ៍នេះកើតឡើងកាលពីវេលាម៉ោង១និង១៣នាទី រំលងអធ្រាត្រ ថ្ងៃទី៦ វិច្ឆិកា នៅចំណុចផ្លូវលេខ៣១០ កែង១៤៣ មុខហាងគុយទាវ «ព្រឹកថ្មី ល្ងាចស្រស់» ស្ថិតក្នុងសង្កាត់បឹងកេងកងទី២ ខណ្ឌចំការមន ប៉ុន្ដែមិនបណ្ដាលឱ្យរងរបួសធ្ងន់ធ្ងរទេ។
ប្រភពព័ត៌មាននៅកន្លែងកើតហេតុបានឱ្យដឹងថា មានរថយន្ដកាមរីឆ្លាម ស៊េរី២០០៧ ពណ៌ទឹកមាស ពាក់ស្លាក លេខ ភ្នំពេញ ២M-៨៣៨៣ មានអ្នកជិះក្នុងរថយន្ដ៣នាក់ ដោយបើកតាមបណ្ដោយផ្លូវលេខ១៤៣ ពីត្បូងទៅជើង ខណៈមកដល់ផ្លូវកែងលេខ៣១០ ស្រាប់តែមានរថយន្ដតាក់ស៊ីម៉ែត្ររបស់ក្រុមហ៊ុនគ្លូប៊ល ពណ៌ស ពាក់ស្លាកលេខ ភ្នំពេញ២R-៥៤០៤ បើកមកពីផ្លូវលេខ៣១០ ក្នុងទិសដៅពីលិចទៅកើត ក្នុងល្បឿនលឿនដូចគ្នា មិនគោរពសិទ្ធិគ្នា មកដល់ផ្លូវកែងមិនបន្ថយ ល្បឿនដូចគ្នា ដណ្ដើមគ្នាទៅមុន ទើបធ្វើឱ្យរថយន្ដតាក់ស៊ីម៉ែត្របើកបុករថយន្ដកាមរីឆ្លាមទទឹងខ្លួនពេញទំហឹងតែម្ដង បណ្ដាលឱ្យខ្ទាតទៅចិញ្ចើមផ្លូវ។ ចំណែករថយន្ដតាក់ស៊ីបានជ្រុលទៅបុករានទេវតានៅពីមុខហាងគុយទាវដួលរលំ រួចជ្រុលទៅបុកបង្គោលដងគោមបំភ្លឺផ្លូវគៀបជាប់ទៅមុខលែងរួច។
រថយន្ដតាក់ស៊ីម៉ែត្រត្រូវក្រពឹតមួយចំហៀងខាងស្ដាំ និងរបើកដំបូលខាងមុខខ្ទេច ចំណែករថយន្ដកាមរីឆ្លាមធ្លាក់កាងមុខក្រពឹតបើកទៅមុខលែងរួចដូចគ្នា ត្រូវបានប៉ូលិសចរាចរស្ទួចយកទៅរក្សាទុកនៅការិយាល័យនគរបាលចរាចរជើងគោកដើម្បីធ្វើការដោះស្រាយ៕
ចែករំលែកព័តមាននេះ