រាជធានីភ្នំពេញ ៖ លោកអ៊ាង ណារិន អនុប្រធានមន្ទីរសាធារណការ និងដឹកជញ្ជូន ត្រូវបានប្រកាសតែងតាំងថ្ងៃនេះជំនួសលោកញ៉ែម សារ៉ន នាយកមន្ទីរសាធារណការ និងដឹកជញ្ជូនរាជធានីភ្នំពេញ ដែលចូលនិវត្តន៍ ។ លោកញ៉ែម សារ៉ន ពេលនេះត្រូវបានគេដឹងថា កំពុងមានជំងឺស្ថិតក្នុងការសង្គ្រោះបន្ទាន់នៅមន្ទីរពេទ្យ ឯប្រទេសថៃក្រោយពីចូលសំរាកព្យាបាល និងសង្គ្រោះបន្ទាន់នៅមន្ទីរពេទ្យកាល់ម៉ែត ។ លោកបានចូលនិវត្តន៍កាលពីថ្ងៃទី១ មករា ឆ្នាំ២០១១ ហើយនៅយប់ថ្ងៃទី៦ មករា ដោយសារមានជំងឺធ្ងន់ធ្ងរក៏បានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែតទាំងយប់ ។
លោកញ៉ែម សារ៉ន ត្រូវបានរាជរដ្ឋាភិបាលដាក់ឱ្យចូលនិវត្តន៍ ខណៈលោកមានអាយុ៦០ឆ្នាំ តាមច្បាប់ដែលបានកំណត់ ។ លោកត្រូវបានប្រកាសតែងតាំងជាប្រធានមន្ទីរសាធារណការ និងដឹកជញ្ជូនរាជធានីភ្នំពេញ កាលពីឆ្នាំ២០០០ ដែលរហូតមកដល់ពេលនេះមានរយៈពេល១០ឆ្នាំគត់ ។ ពេលលោកញ៉ែម សារ៉ន ចូលនិវត្តន៍ក៏បានតែងតាំងលោកអ៊ាន ណារិន អនុប្រធានមន្ទីរ ជាប្រធានស្តីទីមន្ទីរសាធាណរការ និងដឹកជញ្ជូនរាជធានីបណ្តោះអាសន្ន ។ អ្វីដែលជាការកត់សំគាល់នោះ គឺលោកប្រធានមន្ទីរស្តីទីនេះក៏ស្ថិតក្នុងវ័យចំណាស់ប្រហាក់ប្រហែលលោកញ៉ែម សារ៉ន ដែរ ដែលតាមប្រភពព័ត៌មានច្បាស់ការឱ្យដឹងថា លោកអ៊ាន ណារិន ក៏នឹងចូលនិវត្តន៍នៅអំឡុងពាក់កណ្តាលឆ្នាំ២០១១ នេះ ។
គួរកត់សំគាល់ថា គ្រាន់តែឮដំណឹងថាលោកញ៉ែម សារ៉ន ចូលនិវត្តន៍ មានបេក្ខភាពច្រើនណាស់ចង់ធ្វើនាយកមន្ទីរនេះដែលតាមដឹងត្រួសៗ គឺមានជិត២០នាក់ឯណោះ ព្រោះគេកំណត់ថា ជាជំនាញត្រូវប៉ាន់ ទោះបីជាយ៉ាងណារហូតមកដល់ពេលនេះការសំរេចតែងតាំងប្រធានមន្ទីរថ្មីនៅមិនទាន់ច្បាស់ការ ឬមានការតែងតាំងទាំងជាផ្លូវការនៅឡើយទេ ។ ប៉ុន្តែបើតាមដឹងក្នុងរយៈពេលប៉ុន្មានខែចុងក្រោយនេះ អ្វីដែលជាការលំបាក គឺកូនចៅក្រោមឱវាទមួយចំនួន ដែលជំនាញខាងអែបអប នាំគ្នារត់ឈូចុះ ឈូឡើង ទិញបាច់ផ្កាយកទៅជូនដល់ផ្ទះអ្នកនេះ ឬអ្នកនោះ ខណៈគ្រាន់តែឮល្ហិចល្ហៀងថា នឹងត្រូវតែងតាំងនោះ ៕
ចែករំលែកព័តមាននេះ