ខេត្តពោធិ៍សាត់ ៖ យុវជនម្នាក់បានយកថ្នាំបំពុលសត្វកណ្តុរប្រឡាក់លាយជាមួយបាយទុកបំពុលកណ្តុរពេលយប់ លុះពេលត្រឡប់មកពីផឹកស្រវឹងភ្លេចខ្លួន ច្រឡំហូបក៏ពុលស្លាប់ខ្លួនឯងតែម្តង។ ហេតុការណ៍នេះបានកើតឡើងកាលពីវេលាម៉ោង៦ល្ងាច ថ្ងៃទី១០ តុលា ២០១១ នៅភូមិមាន់ចែ សង្កាត់ព្រៃញី។ ជនរងគ្រោះឈ្មោះស្រី ឃុនរី ភេទប្រុស អាយុ២២ឆ្នាំ មានទីលំនៅភូមិ-សង្កាត់ខាងលើ។
បើតាមស្ត្រីម្នាក់ដែលមានលំនៅឋានក្បែរគ្នាបានប្រាប់កោះសន្តិភាពថា ជនរងគ្រោះរស់នៅពីរនាក់ជាមួយជីដូនចាស់ជរា មានមុខរបរជាអ្នកបើកបររថយន្ត និងជាកម្មករសំណង់ ។ កន្លងមក ដោយសារនៅក្នុងផ្ទះសំបូរកណ្តុរច្រើនពេក ទើបនៅរសៀលថ្ងៃកើតហេតុ ជនរងគ្រោះបានយកថ្នាំបំពុលកណ្តុរប្រឡាក់លាយជាមួយនឹងបាយដាក់ចានទុកសម្រាប់បំពុលកណ្តុរពេលយប់ រួចហើយក៏ដើរទៅចូលរួមផឹកស៊ីយ៉ាងគគ្រឹកគគ្រេង ក្នុងកម្មវិធីរបស់អ្នកភូមិក្បែរនោះ រហូតដល់វេលាម៉ោង៥ល្ងាចទើបត្រឡប់មកវិញ ។
ស្ត្រីរូបនោះបន្តទៀតថានៅវេលាម៉ោងជិត៦ល្ងាច អ្នកភូមិឃើញជនរងគ្រោះដួលប្រកាច់បែកពពុះមាត់ ក្រោមផ្ទះតែម្នាក់ឯង ក៏នាំគ្នាទៅមើលស្រាប់តែ ឃើញចានបាយដែលលាយថ្នាំកណ្ដុរជិតអស់ទៅហើយ ទើបដឹងថា ជនរងគ្រោះច្រឡំហូបបាយលាយថ្នាំកណ្ដុរនោះ បណ្ដាលឱ្យពុលខ្លួនឯង។
ភ្លាមៗនោះក៏នាំគ្នាចិតក្រូចឆ្មារច្របាច់យកទឹកឱ្យផឹកដើម្បីបន្សាបស្រាប់តែក្អួតមកខ្មៅសុទ្ធតែថ្នាំកណ្ដុរ។ ដោយឃើញជនរងគ្រោះកាន់តែធ្ងន់ធ្ងរនោះក៏លើក ដាក់លើម៉ូតូយកទៅសង្គ្រោះនៅមន្ទីរពេទ្យ ប៉ុន្តែដោយសារតែឥទ្ធិពលថ្នាំពុលជ្រួតជ្រាបពេញខ្លួនខ្លាំងទៅហើយក៏ស្លាប់នៅមន្ទីរពេទ្យតែម្ដង៕
ចែករំលែកព័តមាននេះ