កីឡាករអូស្ត្រាលីហេនរីច ហូសស្ល៊័របានសម្តែងនូវក្តីរីករាយជាខ្លាំងបន្ទាប់ពីរូបគេបានយកឈ្នះដំណាក់ទី២នៃការប្រណាំងកង់នៅលើទឹកដីសាធារណរដ្ឋប្រជាមានិតចិន Tour of Beijingកាលពីថ្ងៃព្រហស្បតិ៍ទី៦ខែតុលាកន្លងមកនេះ។ ហូសស្ល៊័រដែលជិះកង់ឲ្យក្រុមTeam Garmin -Cervelo បានបញ្ចប់ដំណាក់
កីឡាករអូស្ត្រាលីហេនរីច ហូសស្ល៊័របានសម្តែងនូវក្តីរីករាយជាខ្លាំងបន្ទាប់ពីរូបគេបានយកឈ្នះដំណាក់ទី២នៃការប្រណាំងកង់នៅលើទឹកដីសាធារណរដ្ឋប្រជាមានិតចិន Tour of Beijingកាលពីថ្ងៃព្រហស្បតិ៍ទី៦ខែតុលាកន្លងមកនេះ។
ហូសស្ល៊័រដែលជិះកង់ឲ្យក្រុមTeam Garmin -Cervelo បានបញ្ចប់ដំណាក់លើចម្ងាយផ្លូវ១៣៧គីឡូម៉ែត្រចេញដំណើរពីពហុកីឡដ្ឋានសំបុកចាបទៅកាន់ស្រុក Mentougou ភាគខាងលិចទីក្រុងប៉េកាំងប្រទេសចិនដោយប្រើអស់ថិរវេលា៣ម៉ោង៣នាទីនិង៣០វិនាទីយកឈ្នះកីឡាកររុស្ស៊ីដេនីស ហ្គាលីមហ្ស៊ីយ៉ាណូវជិះឲ្យក្រុមKatusha Teamនិងឈ្នះកីឡាករហូឡង់ទីអូ បូសជិះឲ្យក្រុម Rabobank Cycling Teamដែលអ្នកទាំង២បានប្រើថិរវេលាច្រើនជាងស្មើៗគ្នា។
ចំណែកកីឡាករជាក្តីសង្ឃឹមរបស់ម្ចាស់ផ្ទះឈ្មោះហៃយុន ម៉ាដែលជិះឲ្យក្រុម National Cycling Teamបានបញ្ចប់ការប្រណាំងក្នុងលំដាប់ទី៤៤បន្ទាប់ពីបានប្រើថិរវេលាច្រើនជាងជាមួយកីឡាករបូស។
សម្រាប់កីឡាករហូសស្ល៊័រ ជ័យជម្នះលើកនេះពិតជាបានធ្វើឲ្យរូបគេសប្បាយចិត្តជាខ្លាំងបើទោះបីជាវាមិនអាចជួយឲ្យរូបគេនាំមុខនៅលើតារាងជើងឯកក៏ដោយ។ គេបាននិយាយថា ៖ «រដូវកាលប្រណាំងឆ្នាំនេះខ្ញុំមានហេងមានស៊យ។ វាចាប់ផ្តើមហេងនៅពេលដែលខ្ញុំបានយកឈ្នះចំនួន២ដំណាក់នៅក្នុងកម្មវិធី Tour of Qatar។ ប៉ុន្តែចាប់តាំងពីពេលនោះមកខ្ញុំមិនសូវជាកាក់កបទេ។ រហូតមកដល់ថ្ងៃនេះគឺគ្មានអ្វីពិសេសឡើយ។ ការប្រណាំងនៅប្រទេសអេស្ប៉ាញមិនបានល្អទេសម្រាប់ខ្ញុំ ។ ដោយឡែកចូលរួមនៅទីនេះមានកីឡាករខ្លាំងៗជាច្រើន ដូច្នេះការយក ឈ្នះក្នុងថ្ងៃនេះពិតជាសំខាន់និងពិសេសខ្លាំងណាស់»។
ឆ្លងកាត់ប្រណាំងអស់២ដំណាក់មកនេះ កីឡាករអាល្លឺម៉ង់តូនី ម៉ាទីននៅតែបន្តនាំមុខគេនៅលើតារាងជើងឯកជាដដែល ។ បន្ទាប់ពីបញ្ចប់ដំណាក់នេះ ម៉ាទីនប្រើអស់ថិរវេលាសរុបតិចជាងគេគឺ៣ម៉ោង១៧នាទីនិង០៣វិនាទីនាំមុខកីឡាករអង់គ្លេសដេវីដ មីលល័រដែលប្រើអស់ថិរវេលាច្រើនជាង១៧វិនាទីនិងឈ្នះកីឡាករអង់គ្លេសម្នាក់ទៀតអាឡិច ដូសេតដែលប្រើអស់ថិរវេលាច្រើនជាង២៤វិនាទី។
ការប្រណាំងកង់កម្មវិធី Tour of Beijingមាន៥ដំណាក់និងមានចម្ងាយផ្លូវសរុប៦១៤,៣គីឡូម៉ែត្រគឺជាការប្រណាំងលើកដំបូងដែលរៀបចំដោយសហព័ន្ធប្រណាំងកង់ពិភពលោកUCI។ ការប្រណាំងនឹងត្រូវបញ្ចប់នៅថ្ងៃទី៩ខែតុលាខាងមុខ។ ដោយឡែកដំណាក់ទី៣ដែលជាដំណាក់បន្តមានចម្ងាយផ្លូវ១៦២គីឡូម៉ែត្រចេញដំណើរពីស្រុក Mentougou ភាគខាងលិចទីក្រុងប៉េកាំងទៅកាន់ទីប្រជុំជនយ៉ុងនីងប្រទេសចិន ៕
ចែករំលែកព័តមាននេះ