រាជធានីភ្នំពេញ ៖ បុរសចំនួន៣នាក់សុទ្ធតែជាមេការនៅក្រុមហ៊ុនថ្នាំលាប និងម៉ាស៊ីនត្រជាក់ បានរងរបួសធ្ងន់ ហើយត្រូវបញ្ជូនទៅព្យាបាលនៅមន្ទីរពេទ្យព្រះកុសុមៈភ្លាមៗ បន្ទាប់ពីបើករថយន្តទៅបុកដើមក្ងោកនៅលើចិញ្ចើមផ្លូវ ត្រង់ចំណុចផ្លូវលេខ២៧១ កែងផ្លូវទេពផន ស្ថិតក្នុងក្រុមទី៣៩ ភូមិ១៣ សង្កាត់ទឹកល្អក់ទី២ ខណ្ឌទួលគោក កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៧ តុលា ២០១១។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ គេបានឃើញរថយន្តម៉ាកលូស៊ីតា ពណ៌ត្រីឆ្លូញ ពាក់ស្លាកលេខ ភ្នំពេញ 2F-1293 ជារថយន្តរបស់ក្រុមហ៊ុនថ្នាំលាប និងម៉ាស៊ីនត្រជាក់ ដែលមានទីតាំងស្ថិតនៅទួលគោក បើកបរតាមបណ្តោយផ្លូវលេខ២៧១ ក្នុងទិសដៅពីជើងទៅត្បូង។ ខណៈមកដល់ផ្លូវកែង អ្នកបើកបរមិនស្គាល់ភូមិសាស្ត្រស្មានតែផ្លូវត្រង់មិនព្រមបន្ថយល្បឿន បានបើកបោះពួយទៅបុកគល់ដើមក្ងោកយ៉ាងពេញទំហឹងបណ្តាលឱ្យបាក់មែកក្ងោក ឯរថយន្តបុកជាប់នឹងគល់ដើមក្ងោក របើកទ្វារស្តាំធ្លាក់អ្នកជិះក្នុងរថយន្តម្នាក់ចុះមកលើដី។
ប្រភពព័ត៌មានបន្តថា បន្ទាប់ពីបានឃើញរថយន្តបុកជាមួយដើមក្ងោក លាន់ដូចរន្ទះនោះពួកគេបាននាំគ្នារត់មកមើលស្រាប់តែឃើញមានមនុស្សប្រុសចំនួន៣នាក់ ២នាក់កៀបជាប់ក្នុងរថយន្ត ហើយម្នាក់របើកទ្វារធ្លាក់ចេញក្រៅ ឃើញដូចនេះ ពួកគាត់ក៏នាំគ្នាជួយទាញជនរងគ្រោះចេញមកក្រៅ ហើយហៅរថយន្តសាមុយដឹកយកទៅព្យាបាលនៅមន្ទីរពេទ្យព្រះកុសុមៈតែម្តង។
ជនរងគ្រោះទាំង៣នាក់នោះមាន ១-ឈ្មោះថ្លាង ចំណាន អាយុ២៣ឆ្នាំ ជាអ្នកបើកបររថយន្ត មានទីលំនៅភូមិព្រែកស្លែង ឃុំព្រែកស្លែង ស្រុកកណ្តាលស្ទឹង ខេត្តកណ្តាល រងរបួសបែកក្បាល និងបុកទ្រូងជាប់ចង្កូតរថយន្ត ២-ឈ្មោះលីន សំណាង អាយុ៣០ឆ្នាំ មានទីលំនៅ ភូមិលីម៉ា ឃុំតាភេម ស្រុកត្រាំកក់ខេត្តតាកែវ ស្នាក់នៅផ្ទះជួលសង្កាត់ទឹកថ្លា ខណ្ឌសែនសុខ រងរបួសផុងលលាដ៍ក្បាល និងបាក់ឆ្អឹងកងខ្នង និង៣-ឈ្មោះហង្ស តុលា អាយុ៤៧ឆ្នាំ រងរបួសក្បាល និងទ្រូង ចំណែកឯរថយន្តបង្កហេតុខូចខាតផ្នែកខាងមុខស្ទើរទាំងស្រុង៕
ចែករំលែកព័តមាននេះ