រាជធានីភ្នំពេញ ៖ រថយន្តម៉ាកអាតុស(ATOZ) ពណ៌ខ្មៅ លាយប្រផេះ ពាក់ស្លាកលេខ ភ្នំពេញ 2F-2751 មួយគ្រឿង បើកបរដោយស្ត្រីម្នាក់បានបើកបុករថយន្តម៉ាកកូរ៉ូឡា ពណ៌ស្ករ ពាក់ស្លាកលេខ សៀមរាប 2A-1467 មួយគ្រឿងពីក្រោយ ក្នុងទិសដៅស្របគ្នា ហើយជ្រុលចង្កូតទៅបុកបង្គោលភ្លើងពេញទំហឹង បណ្តាលឱ្យរថយន្តខូចខាតធ្ងន់ធ្ងរ ហើយអ្នកបើកបរបានរងរបួសត្រូវបញ្ជូនទៅកាន់មន្ទីរពហុព្យាបាលតុសិត។
នៅក្នុងហេតុការណ៍នេះធ្វើឱ្យខូចខាតសម្ភារធ្វើពីដីឥដ្ឋមួយចំនួនដូចជាក្អម ឆ្នាំងដី និងកូនជ្រូក ដែលគេដាក់លក់នៅចិញ្ចើមផ្លូវផងដែរ។ គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៧និង១៥នាទីយប់ថ្ងៃទី៦ តុលា នៅតាមផ្លូវលេខ៦A ក្នុងភូមិកៀនឃ្លាំង សង្កាត់ជ្រោយចង្វា ខណ្ឌឫស្សីកែវ។
តាមសាក្សីនៅកន្លែងកើតហេតុ បានឱ្យដឹងថា នៅមុនពេលកើតហេតុ រថយន្តម៉ាកអាតុសខាងលើបានបើកបរដោយស្ត្រីម្នាក់ធ្វើដំណើរតាមផ្លូវជាតិលេខ៦A ក្នុងទិសដៅចូលមករាជធានីភ្នំពេញ។ នៅពេលធ្វើដំណើរមកដល់ចំណុចកើតហេតុ រថយន្តនេះក៏បានជ្រុលចង្កូតទៅបុុករថយន្តម៉ាកកូរ៉ូឡា ពណ៌ស្ករ ខាងលើ ពីក្រោយបណ្តាលឱ្យរងការខូចខាត។
តាមសាក្សីបន្តទៀតថា បន្ទាប់ពីបើកបុករថយន្តកូរ៉ូឡានោះ ហើយរថយន្តម៉ាកអាតុស ក៏បានរេចង្កូតទៅខាងឆ្វេងដៃឡើងចិញ្ចើមផ្លូវ ទៅបុកបង្គោលភ្លើងពេញទំហឹង ក្រពឹតមុខរថយន្តខ្ទេចទៅមុខលែងរួច និងធ្វើឱ្យសម្ភារធ្វើអំពីដីឥដ្ឋនៅក្បែរនោះបានរងការខូចខាត។
បន្ទាប់ពីគ្រោះថ្នាក់នេះគេឃើញអ្នកបើកបរបានទាក់ទងបងប្អូនមកធ្វើការដោះស្រាយសងការខូចខាតភាគីរថយន្តម៉ាកកូរ៉ូឡាចំនួន១០០ដុល្លារ ព្រមទាំងសងការខូចខាតម្ចាស់សម្ភារធ្វើអំពីដីឥដ្ឋផងដែរ៕
ចែករំលែកព័តមាននេះ