ខេត្តសៀមរាប ៖ ប្រជាពលរដ្ឋប្រមាណជាង៣០០នាក់មកពីសហគមន៍ដីធ្លីត្បែង និងស្គន់ ក្នុងស្រុកបន្ទាយស្រី រួមទាំងសហគមន៍ដីធ្លីចំនួន៤ផ្សេងទៀត កាលពីព្រឹកថ្ងៃទី៦ តុលា ២០១១ បានលើកគ្នាទៅឈរនៅមុខសាលាដំបូងខេត្ដសៀមរាប ដើម្បីចាំលើទឹកចិត្ដដល់តំណាងអ្នកភូមិស្គន់ចំនួន៤រូប ដែលត្រូវចៅក្រមស៊ើបសួរចេញដីកាបង្គាប់ឱ្យចូលខ្លួនក្រោមបទចោទ ប្រកាន់
ខេត្តសៀមរាប ៖ ប្រជាពលរដ្ឋប្រមាណជាង៣០០នាក់មកពីសហគមន៍ដីធ្លីត្បែង និងស្គន់ ក្នុងស្រុកបន្ទាយស្រី រួមទាំងសហគមន៍ដីធ្លីចំនួន៤ផ្សេងទៀត កាលពីព្រឹកថ្ងៃទី៦ តុលា ២០១១ បានលើកគ្នាទៅឈរនៅមុខសាលាដំបូងខេត្ដសៀមរាប ដើម្បីចាំលើទឹកចិត្ដដល់តំណាងអ្នកភូមិស្គន់ចំនួន៤រូប ដែលត្រូវចៅក្រមស៊ើបសួរចេញដីកាបង្គាប់ឱ្យចូលខ្លួនក្រោមបទចោទប្រកាន់ «កាន់កាប់ថ្មីលើអចលនវត្ថុរបស់បុគ្គលឯកជនគ្មានប័ណ្ណ» ប្រព្រឹត្តនៅភូមិស្គន់ ឃុំត្បែង ស្រុកបន្ទាយស្រី ខេត្ដសៀមរាប កាលពីថ្ងៃទី១៥ កក្កដា ឆ្នាំ២០០៨។
នេះជាការលើកគ្នាទៅកាន់តុលាការជាលើកទី៣ ហើយសម្រាប់អ្នកភូមិក្នុងរឿងជម្លោះដីធ្លីនៅភូមិស្គន់ ប៉ុន្ដែពេលនេះគេមិនសូវឃើញមានអានុភាពដូចគ្រាមុនៗទេ ហើយសមត្ថកិច្ចក៏មិនបញ្ជូនទៅកាន់កន្លែងកើតហេតុច្រើនដូចមុនដែរ លើកលែងតែមន្ដ្រីសង្គមស៊ីវិលដែលចាំឃ្លាំមើលការអនុវត្ដច្បាប់។
ស្ដ្រីឈ្មោះចិ សំបូរ មកពីភូមិស្គន់ ដែលរូបគាត់ត្រូវតុលាការចាប់ឃុំខ្លួនក្នុងពន្ធនាគាររយៈពេលមួយខែកន្លះរួចមកហើយក្នុងរឿងជម្លោះនោះ ពេលនេះបានមកកាន់បរិវេណមុខសាលាដំបូងខេត្ដ ដើម្បីលើកទឹកចិត្ដតំណាងរបស់ពួកគាត់ទាំងបួនរូបដែលត្រូវដីកាបង្គាប់ឱ្យចូលខ្លួននោះ។ គាត់រៀបរាប់ប្រាប់ថា ប្រជាពលរដ្ឋដែលលើកគ្នាមកកាន់សាលាដំបូងខេត្ដនេះមានចំនួន៣៥០នាក់មកពីសហគមន៍ចំនួន៦ រួមមានសហគមន៍ស្គន់ សហគមន៍ត្បែង ក្នុងស្រុកបន្ទាយស្រី រួមទាំងសហគមន៍ចំនួន៤ផ្សេងទៀតដែលសុទ្ធសឹងតែជាអ្នករងគ្រោះ ដោយសារការរំលោភដីធ្លីដូចគ្នា។
ស្ដ្រីរូបនោះបញ្ជាក់ពីគោលបំណងរបស់អ្នកភូមិថា ការលើកគ្នាមកកាន់សាលាដំបូងនេះ គឺដើម្បីលើកទឹកចិត្ដដល់តំណាងអ្នកភូមិទាំងបួនរូប ក្នុងនោះក៏មានប្ដីគាត់ម្នាក់ដែរ ដែលត្រូវចៅក្រមចេញដីកាបង្គាប់ឱ្យចូលខ្លួន។
យោងតាមដីកាបង្គាប់ឱ្យចូលខ្លួនចំនួន៤ ចុះថ្ងៃទី១១ សីហា ឆ្នាំ២០១១ របស់ចៅក្រមស៊ើបសួរ កូយ សៅ បង្ហាញថា តំណាងអ្នកភូមិដែលត្រូវឱ្យចូលខ្លួនបំភ្លឺនៅតុលាការមាន១-ឈ្មោះវ៉ិច វី ភេទប្រុស អាយុ៤៤ឆ្នាំ ២-ឈ្មោះណៃ ខ្លិក ភេទប្រុស អាយុ៤៦ឆ្នាំ ៣-ឈ្មោះអិុន ស៊ិនភេទប្រុស អាយុ៦១ឆ្នាំ និង៤-ឈ្មោះប៉ក់ រិន ភេទប្រុស អាយុ៤៧ឆ្នាំ។ អ្នកទាំងបួនរូបត្រូវបានចោទប្រកាន់ពីបទ «កាន់កាប់ថ្មីលើអចលនវត្ថុរបស់បុគ្គលឯកជនគ្មានប័ណ្ណ» ប្រព្រឹត្តនៅភូមិស្គន់ ឃុំត្បែង ស្រុកបន្ទាយស្រី ខេត្ដសៀមរាប កាលពីថ្ងៃទី១៥ កក្កដា ឆ្នាំ២០០៨ បទល្មើសមានចែងឱ្យផ្ដន្ទាទោសតាមបញ្ញត្តិមាត្រា៣៤ និងមាត្រា២៥៩ នៃច្បាប់ភូមិបាលចុះថ្ងៃទី៣០ សីហា ឆ្នាំ២០០១ ។
ប្រជាពលរដ្ឋអះអាងថា ដីដែលកើតមានជម្លោះដ៏រាំុរ៉ៃនោះជាដីកាន់កាប់ដោយស្របច្បាប់របស់ពួកគាត់ដែលមានទំហំសរុប១៧០ហិកតា ស្មើនឹង២២២គ្រួសារ ក្នុងនោះភូមិស្គន់ ១១៧គ្រួសារ និងភូមិត្បែង១០៥គ្រួសារ ដែលត្រូវលោកមេភូមិស្គន់ ឈ្មោះកែវ រឿន បែងចែកឱ្យពួកគាត់ត្រឹមត្រូវតាំងពីអំឡុងឆ្នាំ១៩៩៧ មក នៅគ្រាពួកគាត់ធ្វើសមាហរណកម្ម ដោយមួយគ្រួសារបានចំណែករៀងៗខ្លួនទំហំដីក្បាល៥០ម៉ែត្រ បណ្ដោយ២០០ម៉ែត្រ។ អ្នកភូមិបានបង្កបង្កើនផលលើដីនោះរហូតមកមិនដែលខានទេ ប៉ុន្ដែធ្វើបានតែចំការព្រោះរដូវប្រាំងអត់ទឹក ។ នៅអំឡុងឆ្នាំ២០០៨ ស្រាប់តែពួកគាត់ឃើញបង្គោលបេតុងជាច្រើនបោះឡោមព័ទ្ធលើដីទាំងនោះ ហើយរកម្ចាស់បង្គោលទាំងនោះមិនឃើញទេ ។
មន្ដ្រីស៊ើបអង្កេតសមាគមការពារសិទ្ធិមនុស្សអាដហុកប្រចាំខេត្ដសៀមរាប ដែលស្ថិតនៅមុខអគាររដ្ឋបាលបំរើការសាលាដំបូងខេត្ដកាលពីព្រឹកថ្ងៃទី៦ តុលា បានថ្លែងថា ការចេញដីកាបង្គាប់ឱ្យតំណាងអ្នកភូមិស្គន់ ទាំង៤នាក់ ចូលខ្លួនរបស់ចៅក្រមស៊ើបសួរ កូយ សៅ នេះវាជាករណីថ្មីទាក់ទិនរឿងជម្លោះដីធ្លីដែលមានអាយុកាលតាំងពីអំឡុងឆ្នាំ២០០៨ មកម៉្លេះ ធ្វើឱ្យក្រុមប្រជាពលរដ្ឋមានការព្រួយបារម្ភ ព្រោះពួកគាត់ធ្លាប់មានបទពិសោធន៍កន្លងមក ឱ្យតែតុលាការបង្គាប់ឱ្យចូលខ្លួនច្រើនតែចាប់ដាក់គុក។
លោកបន្ដថា ប្រជាពលរដ្ឋព្រួយបារម្ភជារឿងត្រឹមត្រូវបំផុត ប៉ុន្ដែចំពោះចំណាត់ការរបស់តុលាការដែលលោកបានទទួលព្រឹកនេះគឺពុំមានការឃុំខ្លួនតំណាងពលរដ្ឋទាំង៤នាក់នោះទេ ។ ប្រជាពលរដ្ឋមកលើកទឹកចិត្ដ ក៏ដូចជាសង្គមស៊ីវិលមានការពេញចិត្ដណាស់ ព្រមទាំងរំពឹងថាតុលាការនឹងប្រឹងប្រែងស្វែងរកយុត្ដិធម៌នៅក្នុងរឿងក្ដីដ៏ចម្រូងចម្រាសនេះ។
លោកបញ្ជាក់ទាក់ទិនទៅនឹងប្រវត្ដិនៃជម្លោះដីធ្លីនៅភូមិស្គន់ថា ជម្លោះដីធ្លីដ៏រាំុរ៉ៃរវាងអ្នកសហគមន៍ស្គន់ ជាមួយក្រុមអ្នកមានអំណាចបុណ្យស័ក្ដិ និងមានលុយដែលមានគ្នាប្រមាណបួនទៅប្រាំនាក់នោះ វាចាប់ផ្ដើងតាំងពីអំឡុងឆ្នាំ២០០៨ មក។ ក្នុងចន្លោះពេលនោះប្រជាពលរដ្ឋបានលើកគ្នាទៅតវ៉ានៅតុលាការចំនួន៣លើករួចមកហើយ ខណៈដែលតំណាងអ្នកភូមិចំនួនពីរនាក់ ប្ដីប្រពន្ធ ឈ្មោះចិ សំបូរ និងប្ដីឈ្មោះវ៉ិច វី ត្រូវតុលាការចាប់ដាក់ពន្ធនាគារម្ដងរួចមកហើយ។
មន្ត្រីអាដហុករូបនោះនិយាយថា ចំពោះរឿងវិវាទដីធ្លីនេះក្នុងនាមសង្គមស៊ីវិលសំណូមពរយ៉ាងទទូចដល់តុលាការធ្វើយ៉ាងណាស្រាវជ្រាវអង្គហេតុនៃរឿងដីធ្លីឱ្យបានច្បាស់មុននឹងចោទប្រកាន់ពីបទព្រហ្មទណ្ឌទៅលើពួកអ្នកភូមិ ព្រោះបើតាមអនុសាសន៍របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាថា «មិនឱ្យមានប្រជាពលរដ្ឋណាម្នាក់ត្រូវចាប់ខ្លួនដោយសាររឿងជម្លោះដីធ្លីនោះទេ» ដូច្នេះយើងត្រូវធ្វើយ៉ាងណាឱ្យប្រជាពលរដ្ឋមានជំនឿទុកចិត្ដទៅលើប្រព័ន្ធច្បាប់របស់យើង។
នារសៀលថ្ងៃដដែលគេមិនអាចស្វែងរកភាគីជម្លោះម្ខាងទៀត ដើម្បីសុំការបំភ្លឺជុំវិញរឿងកាន់កាប់ដីដែលកំពុងកើតមានរឿងក្ដីក្ដាំជាមួយអ្នកភូមិស្គន់ និងភូមិត្បែងនោះបានទេ ដោយគេមិនបង្ហើបប្រាប់ភាគីដើមបណ្ដឹងឱ្យបានដឹងជាចំហ។
ចំណែកលោកកូយ សៅ ចៅក្រមស៊ើបសួរសាលាដំបូងខេត្ដសៀមរាបដែលកាន់សំណុំរឿងក្ដីនោះ ក៏មិនអាចទាក់ទងសំុការពន្យល់បន្ថែមជុំវិញរឿងនោះដែរ ដោយលោកទើបតែកាន់តំណែងថ្មីគ្មានអ្នកស្គាល់លេខទូរស័ព្ទរបស់លោកទេ៕
ចែករំលែកព័តមាននេះ