រាជធានីភ្នំពេញ ៖ យុវជន និងយុវនារីមួយក្រុមនាំគ្នាជិះម៉ូតូ៧គ្រឿង ទៅលេងនៅភ្នំឧដុង្គ ក្នុងថ្ងៃបុណ្យភ្ជុំបិណ្ឌ ទើបតែជិះម៉ូតូចេញពី ផ្ទះបាន១០នាទី ស្រាប់តែត្រូវជនមិនស្គាល់មុខជិះម៉ូតូគ្នា២នាក់ បាញ់៣គ្រាប់ផ្ញុចដីបណ្តាលឱ្យប្លាតគ្រាប់ត្រូវជើងនារីពីរនាក់ ម្នាក់រងរបួសស្រាល និងម្នាក់ទៀតរបួសធ្ងន់ កំពុងព្យាបាលនៅមន្ទីរពេទ្យព្រះកុសុមៈ ដែលករណីបាញ់បោះនេះកើតឡើងនៅជិតសាលាមេតូឌីសកម្ពុជា ស្ថិតក្នុងសង្កាត់បឹងកក់ទី២ ខណ្ឌទួលគោក វេលាម៉ោង១និង១០នាទីរសៀលថ្ងៃទី២៧ កញ្ញា។
នារីរងគ្រោះដោយសារគ្រាប់កាំភ្លើងប្លាតត្រូវភ្លៅខាងឆ្វេង(បៀមគ្រាប់) មានឈ្មោះសូ រតនា អាយុ១៨ឆ្នាំ មានទីលំនៅសង្កាត់បឹងកក់ ទី២ ខណ្ឌទួលគោក បានឱ្យដឹងថា នៅថ្ងៃកើតហេតុនេះ ចំថ្ងៃបុណ្យភ្ជុំបិណ្ឌរូបនាងនិងមិត្តភក្តិប្រុសស្រីជាច្រើននាក់ បានបបួលគ្នាជិះម៉ូតូទៅ លេងនៅភ្នំឧដុង្គ។ ពេលចេញទៅនោះ មានអ្នកខ្លះទៅមុន ដោយឡែកសល់ម៉ូតូ៧គ្រឿងទៀតជិះគ្នា១៨នាក់ ទៅជាមួយគ្នា តាមផ្លូវលេខ៥៩៨ ដោយជិះវ៉ាគ្នាម្តងម្នាក់ហាក់ប្រសេចប្រសាចពេញផ្លូវផងដែរ។ ស្របពេលនោះមានម៉ូតូម៉ាក សេ១២៥ ស៊េរីឆ្នាំ២០១០ ពណ៌ខ្មៅ មិនចាំស្លាកលេខ មានគ្នា២នាក់ បានជិះមកជាមួយដែរ ប្រហែលជាគេខឹងម៉ូតូប្រសេចប្រសាចហើយមើលទៅ ស្រាប់តែដកកាំភ្លើងពីចង្កេះបាញ់៣គ្រាប់ផ្ញុចដី ក៏ប្លាតគ្រាប់ត្រូវជើងរបស់នាង បណ្តាលឱ្យរងរបួសធ្ងន់ ប៉ុន្តែត្រូវគ្រូពេទ្យធ្វើការវះកាត់យកគ្រាប់ចេញរួចរាល់ហើយ។
ចំណែកនារីរងគ្រោះម្នាក់ទៀតឈ្មោះអេ ពីន អាយុ១៦ឆ្នាំ នៅផ្ទះជិតគ្នាបានឱ្យដឹងផងដែរថា នាងជិះម៉ូតូអ៊ែរប្ល៊ែតគ្នា៣នាក់ នាងជិះពីក្រោយគេ ចំណែកករណីបាញ់បោះនេះមិនដឹងមូលហេតុអ្វីពិតប្រាកដទេ ទំនងជាគេខឹងនឹងក្រុមរបស់នាងជិះម៉ូតូពេញផ្លូវ ឬបែបណាក៏មិនដឹង? ប៉ុន្តែពេលដែលបាញ់ហើយជន២នាក់នោះធ្វើឫកព្រងើយមិនខ្លាចអ្វីទាំងអស់ ហើយជិះម៉ូតូចេញទៅបាត់ ចំណែកពួកនាងមុនដំបូងស្មានតែគេដុតផាវទេ មិនដឹងថាគេបាញ់ឡើយ ទាល់តែឃើញជើងហូរឈាមទើបដឹងថា មានរងរបួស ដោយសារគេបាញ់មុននេះ៕
ចែករំលែកព័តមាននេះ