ខេត្តកំពង់ចាម ៖ ក្រោមការយកចិត្តទុកដាក់ពីសំណាក់អាជ្ញាធរខេត្ត បានចាត់ឲ្យកម្លាំងមន្ត្រីរាជការគ្រប់លំដាប់ថ្នាក់រៀបចំបាវខ្សាច់ធ្វើជា របាំងទប់ការពារនៅតាមមាត់ទន្លេមេគង្គក្នុងសង្កាត់កំពង់ចាម ក្រុងកំពង់ចាម មិនឲ្យទឹកទន្លេហូរចូលមកលិចក្រុងកំពង់ចាមទេ រហូតមកដល់ថ្ងៃទី២៨ កញ្ញា ២០១១ ទោះបីជាទឹកទន្លេមេគង្គមានកម្ពស់ដល់១៥,៧៩ម៉ែត្រក៏ដោយ។ ទោះជាបែបនេះក្តី ស្រុកមួយចំនួនដែលនៅជាប់តាម
ខេត្តកំពង់ចាម ៖ ក្រោមការយកចិត្តទុកដាក់ពីសំណាក់អាជ្ញាធរខេត្ត បានចាត់ឲ្យកម្លាំងមន្ត្រីរាជការគ្រប់លំដាប់ថ្នាក់រៀបចំបាវខ្សាច់ធ្វើជារបាំងទប់ការពារនៅតាមមាត់ទន្លេមេគង្គក្នុងសង្កាត់កំពង់ចាម ក្រុងកំពង់ចាម មិនឲ្យទឹកទន្លេហូរចូលមកលិចក្រុងកំពង់ចាមទេ រហូតមកដល់ថ្ងៃទី២៨ កញ្ញា ២០១១ ទោះបីជាទឹកទន្លេមេគង្គមានកម្ពស់ដល់១៥,៧៩ម៉ែត្រក៏ដោយ។ ទោះជាបែបនេះក្តី ស្រុកមួយចំនួនដែលនៅជាប់តាមដងទន្លេមេគង្គបានទទួលរងការលិចលង់បង្កឲ្យប៉ះពាល់ដល់ស្រូវវស្សាសរុប២១.៣៧៤ហិកតា ក្នុងនោះលិចសន្ទូង ១.៥៨៨ហិកតា ហើយក៏មានប្រជាពលរដ្ឋចំនួន៣៥នាក់បានលង់ទឹក និងលិចទូកស្លាប់ផងដែរ ។
លោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្តមានប្រសាសន៍ប្រាប់ឲ្យដឹងថា ស្រុក-ក្រុងដែលទទួលរងគ្រោះដោយទឹកជំនន់ទន្លេមេគង្គមានចំនួន១១ ក្នុងនោះស្រុក-ក្រុងជាប់ដងទន្លេមេគង្គមាន៨ គឺស្រុកក្រូចឆ្មារ ស្ទឹងត្រង់ ត្បូងឃ្មុំ កំពង់សៀម ក្រុងកំពង់ចាម ស្រុកកោះសូទិន កងមាស ។ ឯស្រុកស្រីសន្ធរ និងស្រុកមិនស្ថិតនៅជាប់ដងទន្លេ តែទទួលរងគ្រោះដោយទឹកជំនន់ទន្លេមេគង្គមាន៣ គឺស្រុកបាធាយ ព្រៃឈរ និងស្រុកជើងព្រៃ។ លោកស្នងការនគរបាលខេត្តមានប្រសាសន៍បន្តថា ស្រុក-ក្រុងដែលនៅជាប់ដងទន្លេមេគង្គ មានទីទួលសុវត្ថិភាពសរុប៦៥កន្លែង ហើយប្រជាពលរដ្ឋចំនួន៥.៤៣៤គ្រួសារស្មើនឹង១៤.៧៣៣នាក់ និងសត្វពាហនៈចំនួន៨.០៥៣ក្បាល ត្រូវបានជម្លៀសទៅស្នាក់នៅទីនោះ ក្នុងនោះមាន ៖
១-ស្រុកក្រូចឆ្មារ ៖ ក្នុងចំនួន១២ឃុំ (លិចខ្លាំង៩ឃុំ) គ្មានទីទួលសុវត្ថិភាពទេ។ បានជម្លៀសប្រជាពលរដ្ឋទៅឃុំថ្មពេជ្រ ស្រុកត្បូងឃ្មុំ និងបឹងកេត ឃុំព្រែកកក់ ស្រុកស្ទឹងត្រង់ ក្រៅពីនោះ ប្រជាពលរដ្ឋបានធ្វើធ្នើរដាក់គោ និងចងគោលើផ្លូវថ្នល់។
២-ស្រុកស្ទឹងត្រង់ ៖ ក្នុងចំនួន១២ឃុំលិច៥ឃុំ មានទីទួលសុវត្ថិភាពចំនួន៥កន្លែង គឺនៅឃុំព្រះអណ្តូង៣កន្លែង និងឃុំពាមកោះស្នា ២កន្លែង។ ប្រជាពលរដ្ឋដែលបានជម្លៀសទៅកាន់ទីទួលសុវត្ថិភាពមាន៣៤៧គ្រួសារ និងសត្វពាហនៈចំនួន១.៥៧៤ក្បាល។
៣-ស្រុកត្បូងឃ្មុំ ៖ ក្នុងចំនួន១៤ឃុំលិច៤ឃុំ មានទីទួលសុវត្ថិភាពចំនួន១៦កន្លែង គឺនៅឃុំទន្លេបិទ៦កន្លែង ឃុំជីរោទ៍ទី១ មាន១កន្លែង ឃុំជីរោទ៍ទី២ មាន៥កន្លែង ឃុំថ្មពេជ្រ២កន្លែង និងឃុំបឹងព្រួល២កន្លែង។ ប្រជាពលរដ្ឋដែលបានជម្លៀសទៅកាន់ទីទួលសុវត្ថិភាពមាន២.២៣៣គ្រួសារស្មើនឹង៩.០៥៥នាក់និងសត្វពាហនៈចំនួន២.៦៤៩ក្បាល។
៤-ក្រុងកំពង់ចាម ៖ ពុំទាន់មានការលិចលង់ទេ ដោយសារតែអាជ្ញាធរមូលដ្ឋានបានចាត់វិធានការទាន់ពេលវេលា។
៥-ស្រុកកំពង់សៀម ៈ ក្នុងចំនួន១៥ឃុំលិច៩ឃុំ (ឃុំរអាងលិច៥០ភាគរយ) មានទីទួលសុវត្ថិភាព៣កន្លែង គឺនៅឃុំរអាង១កន្លែង ឃុំអំពិល២កន្លែង។ ប្រជាពលរដ្ឋដែលជម្លៀសទៅកាន់ទីទួលសុវត្ថិភាពមាន១.១៥០គ្រួសារសើ្មនឹង១.៩៧៨នាក់ និងសត្វពាហនៈចំនួន៦០០ក្បាល។
៦-ស្រុកកោះសូទិន ៖ ក្នុងចំនួន៨ឃុំលិចទាំងអស់ មានទីទួលសុវត្ថិភាពចំនួន៣៥កន្លែង ឃុំមហាលាភ៥កន្លែង គឺឃុំពង្រ៥កន្លែង ឃុំល្វេ៣កន្លែង ឃុំ ពាមប្រធ្នោះ៤កន្លែង ឃុំកោះសូទិន៥កន្លែង ឃុំមហាខ្ញូង៥កន្លែង ឃុំកំពង់រាប៤កន្លែង ឃុំព្រែកតានង់៤កន្លែង។ ប្រជាពលរដ្ឋដែលជម្លៀសទៅកាន់ទីទួលសុវត្ថិភាពមាន១.៥០៤គ្រួសារស្មើនឹង២.៩១១នាក់ និងសត្វពាហនៈចំនួន៣.២២៩ក្បាល។
៧-ស្រុកកងមាស ៖ ក្នុងចំនួន១១ឃុំលិចទាំងអស ់មានទីទួលសុវត្ថិភាព១កន្លែងគឺនៅលើដងផ្លូវក្នុងឃុំព្រែកក្របៅ។ ប្រជាពលរដ្ឋដែលបានជម្លៀសទៅកាន់ទីទួលសុវត្ថិភាព មាន៥៧ គ្រួសារស្មើនឹង២២៩នាក់។
៨-ស្រុកស្រីសន្ធរ ៖ ក្នុងចំនួន១៤ឃុំ (លិចខ្លាំង១២ឃុំ) មានទួលសុវត្ថិភាពចំនួន៥កន្លែង គឺនៅឃុំព្រែករំដេង១កន្លែង ឃុំបារាយណ៍១កន្លែង ឃុំព្រែកពោធិ៍១កន្លែង ឃុំមានជ័យ១កន្លែង និងឃុំទងត្រឡាច១កន្លែង។ ប្រជាពលរដ្ឋដែលបានជម្លៀសទៅកាន់ទីទួលសុវត្ថិភាពមាន១៤៣គ្រួសារស្មើនឹង៥៦០នាក់ ។
ចំពោះស្រុកមិននៅជាប់ដងទន្លេមេគង្គ មានទីទួលសុវត្ថិភាពចំនួន៤កន្លែង ប្រជាពលរដ្ឋដែលបានជម្លៀសទៅកាន់ទីទួលសុវត្ថិភាពមានចំនួន២៣៥គ្រួសារ ស្មើនឹង១.០៩០នាក់។ ក្នុងនោះ ស្រុកបាធាយ មានទីទួលសុវត្ថិភាពចំនួន៣កន្លែង គឺនៅឃុំត្រប់១កន្លែង ឃុំមេព្រីង១កន្លែង និងឃុំបាធាយ១កន្លែង។ ប្រជាពលរដ្ឋដែលជម្លៀសទៅកាន់ទីទួលសុវត្ថិភាពមាន៨៥គ្រួសារ ស្មើនឹង៤៧៩នាក់។ ស្រុកព្រៃឈរ មានទីទួលសុវត្ថិភាព១កន្លែង គឺនៅទួលបេង ឃុំមៀន។ ប្រជាពលរដ្ឋដែលបានជម្លៀសទៅកាន់ទីទួលសុវត្ថិភាពមាន១៥០គ្រួសារស្មើនឹង៦១១នាក់។ ឯស្រុកជើងព្រៃ ពុំមានការជម្លៀសប្រជាពលរដ្ឋទៅកាន់ទីទួលសុវត្ថិភាពទេ ។
លោកឧត្តមសេនីយ៍ត្រី ឆាយ គឹមសុន បញ្ជាក់ថា គ្រោះទឹកជំនន់ឆ្នាំនេះ បណ្តាលឲ្យខូចខាត និងគ្រោះថ្នាក់រួមមាននៅស្រុកកងមាស លង់ទឹកស្លាប់មនុស្ស២នាក់(ស្រ្តីម្នាក់) និងរលំផ្ទះ១ខ្នង, ស្រុកត្បូងឃ្មុំ រុះរើផ្ទះចំនួន១៦ខ្នង និងរលំផ្ទះ ប៉ើងតាមទឹក៧ខ្នង, ស្រុកកោះសូទិន លង់ទឹកស្លាប់មនុស្ស៣នាក់ និងរលំផ្ទះ១៤ខ្នង ស្រុកស្ទឹងត្រង់លង់ទឹកស្លាប់២នាក់ (ស្រ្តីទាំង២នាក់) និងរលំផ្ទះប៉ើងតាមទឹក៤ខ្នង, ស្រុកស្រីសន្ធរ លង់ទឹកស្លាប់២នាក់(ស្រី្តម្នាក់) និងរលំផ្ទះ៣ខ្នង, ស្រុកព្រៃឈរ លង់ទឹកស្លាប់មនុស្សម្នាក់, ស្រុកជើងព្រៃ លង់ទឹកស្លាប់មនុស្ស២នាក់ និងស្រុកបាធាយ លង់ទឹកស្លាប់ម្នាក់។
តាមតួលេខចំពោះអ្នកស្លាប់ដោយលង់ទឹកគិតចាប់ពីថ្ងៃទី១០ សីហា រហូតដល់ថ្ងៃទី២៨ កញ្ញា ២០១១ បានកើនដល់ចំនួន៣៥នាក់ហើយ។ សម្រាប់ទិសដៅបន្ត គឺបានត្រៀមកម្លាំងនគរបាលចំនួន២០០នាក់ សម្រាប់ជួយអន្តរាគមន៍បន្ទាន់ ក្នុងការជួយសង្គ្រោះប្រជាពលរដ្ឋ ឬគ្រោះមហន្តរាយផ្សេងៗដែលបណ្តាលមកពីទឹកជំនន់ជាយថាហេតុ។ ជាមួយនេះធានារាល់ការដឹកជញ្ចូនប្រជាពលរដ្ឋពីទីទួលសុវត្ថិភាពមកលំនៅឋានវិញ ហើយនគរបាលនៅតាមស្រុកត្រូវយកចិត្តទុកដាក់ខ្ពស់អំពីសន្តិសុខ គិតគូរពីទីទួលសុវត្ថិភាព និងការដឹកជញ្ជូន៕
ចែករំលែកព័តមាននេះ