រាជធានីភ្នំពេញ ៖ នៅខេត្តឧត្តរមានជ័យ ដោយសារជម្លោះព្រំដែនកម្ពុជា-ថៃ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស បានរងផលប៉ះពាល់ដោយផ្ទាល់ និងប្រយោល…
រាជធានីភ្នំពេញ ៖ នៅខេត្តឧត្តរមានជ័យ ដោយសារជម្លោះព្រំដែនកម្ពុជា-ថៃ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស បានរងផលប៉ះពាល់ដោយផ្ទាល់ និងប្រយោល ដែលបានធ្វើឱ្យសាលារៀនជាប់ព្រំដែនប្រមាណ៦០៥កន្លែង បានផ្អាកដំណើរការជាបណ្តោះអាសន្ន សិស្សប្រមាណ១៥ម៉ឺននាក់ និងគ្រូបង្រៀន៦៣០០នាក់ ត្រូវភៀសសឹក។ នេះបើតាមការរដ្ឋមន្ត្រីក្រសួងអប់រំ យុវជន និងកីឡា ។
ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ថ្លែងក្នុងពិធីបើកបវេសនកាលឆ្នាំសិក្សា ២០២៥-២០២៦ ជានិមិត្តរូបនៅវិទ្យាល័យ ហ៊ុន សែន ចុងកាល់ ខេត្តឧត្តរមានជ័យ ព្រឹកថ្ងៃទី០១ ខែវិច្ឆិកា ឆ្នាំ២០២៥ បានថ្លែងថា ទោះបីមានការសាលារៀនខ្លះផ្អាកបណ្តោះអាសន្នក្តី ក្រោមការដឹកនាំរបស់រាជរដ្ឋាភិបាល ក្រសួងអប់រំ យុវជន និងកីឡាបានដាក់ចេញនូវវិធានការលើកទឹកចិត្តឱ្យមានការចងសម្ព័ន្ធភាព រវាងមន្ទីរអប់រំយុវជន និងកីឡារាជធានី ខេត្ត ជាមួយនឹងខេត្ត ដែលរងផលប៉ះពាល់ពីជម្លោះព្រំដែន ដើម្បីផ្តល់ការគាំទ្រ និងស្តារហេដ្ឋារចនាសម្ព័ន្ធអប់រំ ដែលបានរងខ្ទេចខ្ទាំពីសង្គ្រាម ក៏ដូចជាការអភិវឌ្ឍសាលារៀននៅតាមជាយដែនឱ្យមានភាពគត់មត់នៅក្នុងរយៈពេលខ្លីខាងមុខ និងក្នុងរយៈពេលវែង។
ឯកឧត្តមបានបញ្ជាក់ថា ការបើកបវេសនកាលឆ្នាំសិក្សាថ្មីនាពេលនេះ គឺជាឆ្នាំទី៣ នៃការអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ នៃរដ្ឋសភា ដែលក្នុងនោះការអភិវឌ្ឍធនធានមនុស្ស គឺជាវិស័យអាទិភាព និងមានគោលដៅឆ្ពោះទៅអភិវឌ្ឍន៍មូលធនមនុស្សឱ្យមានចំណេះដឹង និងសមត្ថភាពខ្ពស់ ភាពច្នៃប្រឌិត ស្មារតីសហគ្រិនភាព នវានុវត្តន៍ និងក្រមសីលធម៌ខ្ពស់ ដើម្បីរួមចំណែកដល់ការអភិវឌ្ឍសង្គម និងកំណើនសេដ្ឋកិច្ចប្រកបដោយចីរភាព និងបរិយាបន្ន។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់បុគ្គលិកអប់រំគ្រប់លំដាប់ថ្នាក់ ដែលបានខិតខំបំពេញការងារតាមភារកិច្ចរៀងៗខ្លួន និងចូលរួមអនុវត្តកំណែទម្រង់វិស័យអប់រំប្រកប ដោយស្មារតីទទួលខុសត្រូវខ្ពស់ និងបុរេសកម្ម ជាហេតុធ្វើឱ្យការអភិវឌ្ឍវិស័យអប់រំស្ថិតនៅគន្លងត្រឹមត្រូវ ទាំងការងារគោលនយោបាយ ការងារគ្រប់គ្រង និងការផ្តល់សេវាបង្រៀន និងរៀន ។ ជាក់ស្តែង លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ ទទួលបាននូវភាគរយប្រឡងជាប់ ៨៤.៥៦% និងសិស្សនិទ្ទេស A ចំនួន ៣០២០នាក់។ ជាលទ្ធផលនៃការប្រឡងសញ្ញាបត្រមធ្យមសិក្សាបឋមភូមិមានភាគរយប្រឡងជាប់ ៩៤.៣៤%។
ជាមួយគ្នានោះដែរ ឯកឧត្តមក៏បានឲ្យដឹងថា ក្រសួងក៏បាននិងកំពុងខិតខំកៀរគរ និងផ្តល់សម្ភារៈចាំបាច់មួយចំនួន សម្រាប់ការសម្រួលដំណើរការរៀនសូត្រ ដោយសូមយកឱកាសនេះដែរ ថ្លែងអំណរគុណដល់ការចូលរួមរបស់សប្បុរសជននានា ក្នុងការគាំទ្រ ដែលបានផ្តល់នូវគ្រឿងឧបភោគបរិភោគ សម្ភារៈកីឡា ភេសជ្ជៈ និងសម្ភារៈប្រើប្រាស់ចាំបាច់ផ្សេងៗមួយចំនួនទៅដល់ លោកគ្រូ អ្នកគ្រូ និងសិស្សានុសិស្ស ដែលរងផលប៉ះពាល់ដោយសារជម្លោះព្រំដែននេះផងដែរ។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់បុគ្គលិកអប់រំគ្រប់លំដាប់ថ្នាក់ ដែលបានខិតខំបំពេញការងារតាមភារកិច្ចរៀងៗខ្លួន និងចូលរួមអនុវត្តកំណែទម្រង់វិស័យអប់រំ ប្រកបដោយស្មារតីទទួលខុសត្រូវខ្ពស់ និងបុរេសកម្ម ជាហេតុធ្វើឱ្យការអភិវឌ្ឍវិស័យអប់រំស្ថិតនៅគន្លងត្រឹមត្រូវ ទាំងការងារគោលនយោបាយ ការងារគ្រប់គ្រង និងការផ្តល់សេវាបង្រៀន និងរៀន។
ក្រសួងអប់រំ យុវជន និងកីឡា នឹងបន្តសហការជិតស្និទ្ធិ ជាមួយលេខាធិការដ្ឋាន នៃគណៈកម្មាធិការជាតិ ជំរុញ ការអនុវត្តវិធានការគន្លឹះក្នុងវិស័យអប់រំ (គវអ.) ដោយឈរលើគោលការណ៍មិនពង្រីកចំនួនសាលារៀនគោលដៅ ប៉ុន្តែខិតខំបង្កើនប្រសិទ្ធភាព និងចីរភាពនៃការអនុវត្តកម្មវិធី គវអ. នៅតាមសាលាបឋមសិក្សាគោលដៅទាំង ១៦១ ដែល មានស្រាប់, បន្តជំរុញចលនាសាលារៀនល្អ នាយកសាលាល្អគ្រូបង្រៀនល្អ បរិស្ថាន សាលារៀនល្អ និងការចូលរួមរបស់សហគមន៍ មាតាបិតា និងអ្នកពាក់ព័ន្ធក្នុងវិស័យអប់រំ ,បន្តផ្តោតលើការរៀន និងបង្រៀនមុខវិជ្ជាភាសាខ្មែរ និងគណិតវិទ្យា ថ្នាក់ដំបូងនៅកម្រិតបឋមសិក្សា ការបង្កើនការចូលរៀន និងការពង្រឹងការសិក្សាមុខវិជ្ជា គណិតវិទ្យា វិទ្យាសាស្ត្រ បច្ចេកវិទ្យា និងភាសាបរទេស នៅកម្រិតមធ្យមសិក្សាចំណេះទូទៅរួមទាំងការអនុវត្តវិធីសាស្ត្របង្រៀនថ្មី៕
ចែករំលែកព័តមាននេះ