ខេត្តព្រះវិហារ ៖ទូកប៉ុកចាយត្រូវបានឈ្មួញជនជាតិវៀតណាមផលិតអត់មានច្បាប់ ប្រមាណ១០ឆ្នាំមកហើយដោយសុវត្ថិភាពក្រោមក្រសែភ្នែកនិង អំណាចលោកមេព្រៃខេត្ត។ បន្ទាប់ពីកោះ សន្តិភាពសុំការបំភ្លឺលើបញ្ហានេះលោកប៉ុល ខាំណារ៉េ នាយខណ្ឌរដ្ឋបាលព្រៃឈើខេត្ដ
ខេត្តព្រះវិហារ ៖ទូកប៉ុកចាយត្រូវបានឈ្មួញជនជាតិវៀតណាមផលិតអត់មានច្បាប់ប្រមាណ១០ឆ្នាំមកហើយដោយសុវត្ថិភាពក្រោមក្រសែភ្នែកនិងអំណាចលោកមេព្រៃខេត្ត។ បន្ទាប់ពីកោះ សន្តិភាពសុំការបំភ្លឺលើបញ្ហានេះលោកប៉ុល ខាំណារ៉េ នាយខណ្ឌរដ្ឋបាលព្រៃឈើខេត្ដ បានអះអាងប្រាប់ពីសកម្មភាពរបស់ឈ្មួញផលិតទូកប៉ុកចាយនៅកណ្ដាលក្រុងព្រះវិហារនាព្រឹកថ្ងៃទី៨កញ្ញាថា ខណ្ឌរដ្ឋបាលព្រៃឈើខេត្ដមិនទទួលខុសត្រូវក្នុងការរកស៊ីរបស់ឈ្មួញនោះទេ ហើយក៏បានឱ្យឈ្មួញឈ្មោះលះ សើ ជាថៅកែផលិតទូកប៉ុកចាយឱ្យបញ្ឈប់សកម្មភាពទាំងស្រុង។ លោកនាយខណ្ឌក៏បានបញ្ជាក់ឱ្យដឹងទៀតថា ពេលនេះបើឈ្មួញខាងលើនៅតែប្រព្រិត្ដទៀតលោកនឹងមានវិធានការតាមផ្លូវច្បាប់ដោយចេញដីការចាប់ខ្លួនភ្លាម។
ការឈានដល់វិធានការបិទទីតាំងផលិតទូកប៉ុកចាយក្នុងក្រុងព្រះវិហារ មិនដឹងថា អាចបញ្ឈប់បានឬយ៉ាងណាទេ ព្រោះទីតាំងនោះបានធ្វើការផលិតទូកប៉ុកចាយអស់រយៈជាង១០ឆ្នាំមកហើយ ដែលមានឈ្មោះសារឿន ហៅធំជាឈ្មួញអ្នកម៉ៅការអារឈើគគីរ ចេញពីក្នុងព្រៃព្រះរការ យកមកលក់ឱ្យឈ្មោះលះ សើ ថៅកែផលិតទូកប៉ុកចាយ។ ចំណែកឈ្មួញបាននិយាយថា ខ្លួនមិនខ្លាចក្នុងការហាមឃាត់របស់រដ្ឋបាលព្រៃឈើទេ ។ ការអះអាងបែបនេះមិនត្រូវបានគេដឹងថា ឈ្មួញរូបនោះអាងអ្វីនោះឡើយ។
លោកមុំ សុផល នាយរងផ្នែករដ្ឋបាលព្រៃឈើត្បែងមានជ័យបានបញ្ជាក់ប្រាប់កោះសន្ដិភាពថា ពេលនេះក្នុងនាមលោកជាសមត្ថកិច្ចផ្នែកព្រៃឈើត្បែងមានជ័យ បានចេញលិខិតជូនដំណឹងទៅដល់ទីតាំងផលិតទូកប៉ុកចាយនោះតាំងថ្ងៃទី៧សីហាមកម៉្លេះ ។ លោកមុំ សុផលបញ្ជាក់ទៀតថា ឈ្មួញផលិតទូកប៉ុកចាយនោះគឺមិនមានច្បាប់ អនុញ្ញាតបន្ដិចណាឡើយ។
លោកឡុង ស៊ីថា ព្រះរាជអាជ្ញារងខេត្ដព្រះវិហារបានឱ្យដឹងដែរថា ជុំវិញការផលិតទូកប៉ុកចាយរបស់ឈ្មួញខាងលើនេះគឺពិតជាអំពើខុសច្បាប់ធំណាស់ ព្រោះកន្លងទៅថ្មីៗនេះនៅក្នុងទីតាំងផលិតទូកប៉ុកចាយរបស់ឈ្មួញឈ្មោះលះ សើ គឺត្រូវបានសមត្ថកិច្ចចម្រុះបង្ក្រាបរឹបអូសយកឈើគគីរដែលទិញចូលដោយខុសច្បាប់យកមកស្ដុកទុកក្នុងទីតាំងរបស់ខ្លួនប្រមាណជាង២៨ម៉ែត្រគូប និងនាំខ្លួនថៅកែឈ្មោះលះ សើ យកមកធ្វើការបង់ផាកពិន័យ មិនអនុញាតឱ្យផលិតម្ដងរួចទៅហើយកាលពីពាក់កណ្ដាលខែសីហាកន្លងទៅនៅចំពោះមុខសាលាដំបូងខេត្ដ។ ការកាត់ក្ដីនៅសាលាដំបូងខេត្ដពេលនោះព្រះរាជអាជ្ញាក៏បានប្ដឹងជំទាស់ទៅលើការសម្រេចរបស់ចៅក្រមសាលាដំបូងខេត្ដបន្តប្តឹងទៅសាលាឧទ្ធរណ៍ ។
ក្រុមអ្នកសង្កេតការណ៍និយាយថា ការផលិតទូកប៉ុកចាយយក្សធ្វើពីឈើគគីរដ៏កម្រដែលមានចំណុះរាប់រយតោនកំពុងធ្វើឱ្យព្រៃឈើនឹងពូជឈើដ៏កម្រ ដែលនៅក្នុងប្រទេសកម្ពុជាបច្ចុប្បន្នបានរលាយអស់ទៅហើយ។ មានតែនៅលើទឹកដីខេត្ដព្រះវិហារតែមួយគត់ ដែលបន្សល់ទុកនូវពូជឈើគគីរប្រភេទលេខ១ ដែលមានមុខកាត់ពី១ម៉ែត្រ ទៅ១,៥០ម៉ែត្រ និងប្រវែងចាប់ពី៣០ទៅ៤០ម៉ែត្រ ។ ពេលនេះដែរ រាជរដ្ឋាភិបាលក៏កំពុងតែមានវិធានការបង្ក្រាបយ៉ាងតឹងរឹងបំផុតទៅលើបទឧក្រិដ្ឋព្រៃឈើនេះ។ ចំណែកនៅទីតាំងផលិតទូកប៉ុកចាយមេជាងជនជាតិយួនប្រមាណ២០នាក់ កំពុងផលិតទូកប៉ុកចាយនៅលើមាត់ស្ទឹងសែន ក្នុងភូមិកំពង់ចម្លង សង្កាត់កំពង់ប្រណាក ក្រុងព្រះវិហារដែលបរិមាណឈើក្នុងការផលិតទូកប៉ុកចាយដ៏ធំក្នុងមួយគ្រឿង គឺចំណាយឈើគគីរប្រភេទលេខមួយពី៣៥ទៅ៤០ម៉ែត្រគូប ។ តាមប្រភពគួរឱ្យជឿជាក់ថា ក្នុង១ឆ្នាំគេផលិតបានពី៣ទៅ៥គ្រឿងដែលមានចំណុះពី២៥០តោនទៅ៣០០តោន ។ ក្នុងការរកស៊ីផលិតទូកប៉ុកចាយនេះក្រោយពេលផលិតរួចរាល់គេនាំចេញទៅលក់នៅប្រទេសវៀតណាម ។
ថ្មីៗនេះតាមការបញ្ជាក់ឱ្យដឹងពីកម្មករកម្ពុជា ជាអ្នកស៊ីឈ្នួលអារឈើគគីរប្រភេទលេខ១ ឱ្យឈ្មួញជាថៅកែប្រមូលឈើទៅលក់ឱ្យឈ្មួញផលិតទូកប៉ុកចាយជាប្រចាំឆ្នាំបាននិយាយថា គឺពូកគេតែងតែបានអារឈើចំរុះគ្រប់ប្រភេទសម្រាប់ផ្ទុកពី៦០ ទៅ៧០ម៉ែត្រគូប មុនពេលនាំទូកប៉ុកចាយចេញពីកន្លែងផលិតទៅលក់នៅព្រំប្រទល់ប្រទេសវៀតណាម ។
តាមការបង្ហើបឱ្យដឹងពីក្រុមកម្មករយួនស៊ីឈ្នួលធ្វើជាមេជាងផលិតទូកប៉ុកចាយ និយាយដោយមិនលាក់លៀមថា ទូកនីមួយៗដែលផលិតរួចនាំទៅដល់ព្រំប្រទល់ប្រទេសវៀតណាម តាមផ្លូវទឹកខេត្ដតាកែវ ក្នុងទូកប៉ុកចាយមួយមានតម្លៃពី២៥ទៅ៣០ម៉ឺនដុល្លារអាមេរិក ។
ថៅកែឈ្មោះ លះ សើ បានឱ្យកោះសន្ដិភាពដឹងថា ខ្លួនរកស៊ីឆ្នាំនេះត្រូវខាតបង់អស់ប្រាក់ប្រមាណ៦២លានរៀលរួចទៅហើយ ដោយសារតែផ្ទៃក្នុងមន្ដ្រីខណ្ឌរដ្ឋបាលព្រៃឈើមិនត្រូវគ្នា ។ ទោះជាបែបណា លោកប៉ុល ខាំណារ៉េ ប្រធាន ខណ្ឌរដ្ឋបាលព្រៃឈើព្រះវិហារបានបំភ្លឺប្រាប់កោះសន្ដិភាពតាមទូរស័ព្ទថា លោកពិតជាមិនបានដឹងអ្វីទាំងអស់ចំពោះឈ្មួញដែលបានផលិតទូកប៉ុកចាយនៅក្នុងខេត្ដព្រះវិហារ។ ចំណែកលោកមុំ សុផល នាយរងផ្នែកព្រៃឈើត្បែងមានជ័យពេលនេះបាននិយាយថា ក្នុងនាមលោកជានាយរងផ្នែកព្រៃឈើត្បែងមានជ័យ គឺលោកមិនទទួលដឹងទេ ចំពោះឈ្មួញដែលផលិតទូកប៉ុកចាយនៅកណ្ដាលក្រុងព្រះវិហារនេះ។ លោកបានបញ្ជាក់ថា ឈ្មួញដែលកំពុងផលិតគឺលោកនឹងឱ្យធ្វើការផ្អាក លុះត្រាណាមានច្បាប់គ្រប់គ្រាន់ពីក្រសួង ។
ការផលិតទូកប៉ុកចាយរបស់ឈ្មួញនេះមជ្ឈដ្ឋាននានាបានសង្ស័យថា ពិតជាមានការឃុបឃិតជាមួយម្ចាស់ផ្ទះជាសមត្ថកិច្ច ហើយអ្នកពាក់ព័ន្ធតាមការបង្ហើបឱ្យដឹងពីសមត្ថកិច្ចខ្លះថា ប្រហែលជានឹងជួបបញ្ហាចំពោះផ្លូវច្បាប់ជាច្រើនក្នុងរឿងនេះ ហើយនឹងអាចឈានទៅដល់ការនាំខ្លួនថៅកែ និងអ្នកសមគំនិតទៅប្រឈមនឹងផ្លូវច្បាប់ទៀតផង។
ជុំវិញការរកស៊ីផលិតទូកប៉ុកចាយដោយចំហហក្នុងខេត្ដព្រះវិហារនាំចេញទៅលក់នៅប្រទេសវៀតណាមដោយខុសច្បាប់របស់ឈ្មួញមានរយៈពេលជាង១០ឆ្នាំមកហើយដែលឆ្នាំទៅក៏កោះសន្តិភាពបាននិយាយដែរ ។ នៅក្នុងខេត្ដព្រះវិហារ តាមស្ថិតិពីទិន្នន័យនៃការបាត់បង់ព្រៃឈើដ៏កម្ររបស់ជាតិ គឺមានទំហំធំធេងណាស់ដែលគេមិនអាចគណនាបានឡើយ៕
ចែករំលែកព័តមាននេះ