ខេត្តមណ្ឌលគិរី ៖ ម្ចាស់សហគ្រាសបងប្អូនកម្មករនិយោជិត អាណាព្យាបាល និងអាជ្ញាធរពាក់ព័ន្ធប្រមាណ២៦០នាក់ បានចូលរួមយុទ្ធនាការការពារកុមារពីការកេងប្រវ័ញ្ចលើកម្លាំងពលកម្មនៅតាមបណ្តាសហគ្រាស គ្រឹះស្ថានផលិតឥដ្ឋ-ក្បឿង និងកសិឧស្សាហកម្ម និងផ្សព្វផ្សាយបន្ថែមពីផលប៉ះពាល់នៃគ្រឿងញៀន ការឆ្លងមេរោគអេដស៍…
ខេត្តមណ្ឌលគិរី ៖ ម្ចាស់សហគ្រាសបងប្អូនកម្មករនិយោជិត អាណាព្យាបាល និងអាជ្ញាធរពាក់ព័ន្ធប្រមាណ២៦០នាក់ បានចូលរួមយុទ្ធនាការការពារកុមារពីការកេងប្រវ័ញ្ចលើកម្លាំងពលកម្មនៅតាមបណ្តាសហគ្រាស គ្រឹះស្ថានផលិតឥដ្ឋ-ក្បឿង និងកសិឧស្សាហកម្ម និងផ្សព្វផ្សាយបន្ថែមពីផលប៉ះពាល់នៃគ្រឿងញៀន ការឆ្លងមេរោគអេដស៍ ដែលបានធ្វើឡើងរយៈពេល២ថ្ងៃ នៅស្រុកកោះញែក និងស្រុកពេជ្រាដា ។
លោក ណយ ច័ន្ទតារា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តមណ្ឌលគិរី នាព្រឹកថ្ងៃទី២៣ ឧសភា ឆ្នាំ២០២៥ បានឲ្យដឹងថា កម្មវិធីយុទ្ធនាការដែលបានរៀបចំឡើងនៅពេលនេះ មន្ទីរបានសហការជាមួយនាយកដ្ឋានការងារ និងអាជ្ញាធរតាមមូលដ្ឋាន ក្រោមគំនិតផ្ដួចផ្ដើមឡើងដោយឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ហើយបានរៀបចំប្រកាសបើកយុទ្ធការនៅស្រុកបន្ទាយស្រី ខេត្តសៀមរាប កាលពីថ្ងៃទី០៧ ខែមេសា ឆ្នាំ២០២៥ យុទ្ធនាការត្រូវធ្វើឡើងទូទាំងគ្រប់២៥រាជធានី ខេត្ត នៅតាមសហគ្រាស គ្រឹះស្ថាន ផលិតឥដ្ឋ ក្បឿង និងកសិ-ឧស្សាហកម្ម ។
លោកប្រធានមន្ទីរបានបន្តថា យុទ្ធនាការនេះ មិនមែនរៀបចំឡើងតែអង្គភាពមន្ទីរការងារ និងបណ្ដុះបណ្ដាលវិជ្ជាជីវៈ ឬក្រសួងការងារ និងបណ្ដុះបណ្ដាលវិជ្ជាជីវៈ តែប៉ុណ្ណោះទេ គឺមានការចូលរួមសហការពី អាជ្ញាធរពាក់ព័ន្ធគ្រប់លំដាប់ថ្នាក់ ដើម្បីឲ្យយុទ្ធនាការនេះប្រព្រឹត្តទៅបានជោគជ័យ ក្នុងន័យលុបបំបាត់ពលកម្មកុមារឲ្យអស់ ពីទឹកដីនៃព្រះរាជាណាចក្រកម្ពុជា ។
ក្នុងយុទ្ធនាការ២ថ្ងៃចាប់ពីថ្ងៃទី២១ដល់ថ្ងៃទី២២ ខែឧសភា ឆ្នាំ២០២៥ នេះគេសង្កេតឃើញថា មន្ត្រីជំនាញបានចុះផ្សព្វផ្សាយ និងចងបដាស្តីពីការបង្ការ និងទប់ស្កាត់ការប្រើប្រាស់ពលកម្មកុមារនៅតាមសហគ្រាស គ្រឹះស្ថានផលិតឥដ្ឋ ក្បឿង និងកសិ-ឧស្សាហកម្មដល់ទីតាំង ដើម្បីលើកកម្ពស់ការចូលរួម ការយល់ដឹង និងសហការអនុវត្តច្បាប់ពីគ្រប់ភាគីពាក់ព័ន្ធនឹងការប្រឆាំងពលកម្មកុមារ ជាពិសេសនៅវិស័យសិប្បកម្មផលិតឥដ្ឋ ក្បឿង និងកសិ-ឧស្សាហកម្ម។
ជាមួយគ្នានេះ មន្ត្រីជំនាញរបស់ក្រសួងការងារ ក៏បានបន្តជំរុញ និងលើកទឹកចិត្តដល់អាជ្ញាធរមូលដ្ឋាន និងសហគមន៍នៃសិប្បកម្មផលិតឥដ្ឋ ក្បឿង និងកសិ-ឧស្សាហកម្ម ចូលរួមទប់ស្កាត់ និងលុបបំបាត់រាល់ទម្រង់ទាសភាព ទម្រង់ធ្ងន់ធ្ងរនៃពលកម្មកុមារ និងការងារប្រកបដោយគ្រោះ
ថ្នាក់។
ទន្ទឹមនឹងនេះ មន្ត្រីជំនាញក៏បានអំពាវនាវដល់គ្រប់ភាគីពាក់ព័ន្ធរួមគ្នាប្តេជ្ញាបញ្ចប់រាល់ទម្រង់ធ្ងន់ធ្ងរនៃពលកម្មកុមារ និងរាយការណ៍រហ័សតាមរយៈ Hotline ១២៩៧ ឬ ១២៨៦ ក្នុងករណីការប្រើប្រាស់រាល់ទម្រង់ធ្ងន់ធ្ងរនៃពលកម្មកុមារ ៕
ចែករំលែកព័តមាននេះ