ខេត្តកំពង់ឆ្នាំង ៖ ទីតាំងបណ្ដុះបណ្ដាលលួចលាក់ប្រព័ន្ធបច្ចេកវិទ្យា សង្ស័យបង្កើត ក្រុមហ៊ុន (កម្ចីអនឡាញ) មួយកន្លែងត្រូវបានព្រះរាជអាជ្ញារងខេត្តកំពង់ឆ្នាំងដឹកនាំសមត្ថកិច្ចចុះបង្ក្រាប រយៈពេលពេញមួយព្រឹកនិងរហូតដល់ម៉ោង២និង៣០រសៀលថ្ងៃទី២៣ ខែឧសភា ឆ្នាំ២០២៥…
ខេត្តកំពង់ឆ្នាំង ៖ ទីតាំងបណ្ដុះបណ្ដាលលួចលាក់ប្រព័ន្ធបច្ចេកវិទ្យា សង្ស័យបង្កើត ក្រុមហ៊ុន (កម្ចីអនឡាញ) មួយកន្លែងត្រូវបានព្រះរាជអាជ្ញារងខេត្តកំពង់ឆ្នាំងដឹកនាំសមត្ថកិច្ចចុះបង្ក្រាប រយៈពេលពេញមួយព្រឹកនិងរហូតដល់ម៉ោង២និង៣០រសៀលថ្ងៃទី២៣ ខែឧសភា ឆ្នាំ២០២៥ នៅមិនទាន់បញ្ចប់ការសាកសួរនៅឡើយទេ។ ទីតាំងសង្ស័យបើកបង្រៀន កម្ចីអនឡាញនេះស្ថិតនៅក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចនគរបាលដែលកំពុងតែមមាញឹកដឹកនាំការបង្ក្រាបទីតាំងដែលសង្ស័យថា កំពុងបង្រៀនបុគ្គលិក ឲ្យចេះប្រើវិធី កម្ចីអនឡាញ នេះមិនបានបញ្ជាក់ប្រាប់អ្នកសារព័ត៌មានថា តើការបង្ក្រាប ទីតាំងអ្វីឲ្យប្រាកដនោះទេ។ ប៉ុន្តែតាមស្ដាប់ការសាកសួរពីសមត្ថកិច្ច ត្រូវបានបុគ្គលិកក្រុមហ៊ុន បញ្ជាក់ថា ជាកន្លែងបង្រៀនដល់សិស្សឲ្យចេះប្រតិបត្តិការ រកអតិថិជនឲ្យខ្ចីប្រាក់ពីក្រុមហ៊ុន តាម online ហើយបានដឹងទៀតថា ទុនកម្ចីមានថៅកែនៅប្រទេសវៀតណាម ចំណែកអតិថិជនអ្នកខ្ចីក៏ជាជនវៀតណាមដែរ មិនមែនប្រទេសកម្ពុជាទេ។ (បើតាមការពិនិត្យក្នុងកុំព្យូទ័រមានអ្នកខ្ចីពីប្រទេសវៀតណាមមែន)។
ចំពោះវត្ថុតាងដែលត្រូវបានត្រួតពិនិត្យនិងត្រៀមដករហូតរួមមាន មាន តុចំនួន ២២ កៅអីចំនួន ៥៦ កុំព្យូទ័រ ដេកថប១គ្រឿង កុំព្យូទ័រលេបថប២គ្រឿង។
ប្រភពដែលទទួលបានបានបញ្ជាក់ថាទីតាំងសង្ស័យបង្រៀនបើកកម្ចីអនឡាញទើបតែបើកបានរយៈពេល ២ ថ្ងៃប៉ុណ្ណោះ។
ដូចអ្វីដែលម្ចាស់ផ្ទះជួលឱ្យក្រុមហ៊ុនខាងលើលោក វ៉ាត វុទ្ធី ជាម្ចាស់ផ្ទះឲ្យជួលបានបញ្ជាក់ប្រាប់អ្នកសារព័ត៌មានថា ពេលមកជួលក្រុមហ៊ុន បានបញ្ជាក់ថាក្រុមហ៊ុនខ្លួនមានច្បាប់អនុញ្ញាតត្រឹមត្រូវទើបគាត់ព្រមជួលឱ្យ ។ប៉ុន្តែពេលសមត្ថកិច្ចមកឃាត់សួរនាំពុំមានលិខិតស្របច្បាប់អ្វីទាំងអស់ ហើយការជួលនេះទើបតែដាក់បានតែ ២ ថ្ងៃប៉ុណ្ណោះ។
លោក ប៉ុល វុទ្ធី ស្នងការរងនគរបាលខេត្តកំពង់ឆ្នាំង បានបញ្ជាក់តាមទូរសព្ទថារហូតដល់ម៉ោង ៣ រសៀលនេះ មិនទាន់ដឹងច្បាស់ថាជាក្រុមហ៊ុនអ្វីឲ្យពិតប្រាកដនោះទេ មិនអាចនិយាយ ថា ជាក្រុមហ៊ុនកម្ចីអនឡាញនោះដែរ ។អាចថាក្រុមហ៊ុនកំំពុងតែបង្រៀនបុគ្គលិកឲ្យចេះទាក់ទងអតិថិជន ខ្ចីលុយពីក្រុមហ៊ុនតែប៉ុណ្ណោះ ។
យ៉ាងនេះក្តីតាមប្រភពក្រៅផ្លូវការបញ្ជាក់ថាក្រុមហ៊ុនខាងលើពិតជាបើកបង្រៀនកម្ចីអនឡាញពិតមែន ៕
ចែករំលែកព័តមាននេះ