ប្រទេសជប៉ុននឹងអាចបង្កើនការទិញទំនិញពីប្រទេសកម្ពុជា ខណ:ដែលកម្ពុជាកំពុងពង្រីកទីផ្សារទំនិញរបស់ខ្លួននៅក្នុងពិភពលោក នៅក្នុងស្ថានភាពពាណិជ្ជកម្មកម្ពុជា និងអាមេរិក មានភាពមិនប្រាកដប្រជាដោយសារតែសម្ពាធពន្ធ ។ អ្នកវិភាគមួយរូបនិយាយ នៅថ្ងៃទី២៣ ខែឧសភា នេះ…
ប្រទេសជប៉ុននឹងអាចបង្កើនការទិញទំនិញពីប្រទេសកម្ពុជា ខណ:ដែលកម្ពុជាកំពុងពង្រីកទីផ្សារទំនិញរបស់ខ្លួននៅក្នុងពិភពលោក នៅក្នុងស្ថានភាពពាណិជ្ជកម្មកម្ពុជា និងអាមេរិក មានភាព
មិនប្រាកដប្រជាដោយសារតែសម្ពាធពន្ធ ។
អ្នកវិភាគមួយរូបនិយាយ នៅថ្ងៃទី២៣ ខែឧសភា នេះ ថា វាមិនមែនជារឿងចៃដន្យទេ ដែលសម្តេចធិបតី ហ៊ុន ម៉ាណែត នឹងទៅទស្សនកិច្ចប្រទេសជប៉ុននោះ។ កម្ពុជាកំពុងសំឡឹងឃើញជប៉ុនជាដៃគូពាណិជ្ជកម្ម និងវិនិយោគយ៉ាងសំខាន់។ ទស្សនកិច្ចនោះ នឹងធ្វើអោយកម្ពុជាលក់ទំនិញបានកាន់តែច្រើនទៅទីផ្សារនៅជប៉ុន។
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានឹងធ្វើទស្សនកិច្ចផ្លូវការនៅប្រទេសជប៉ុននៅចុងខែនេះ ហើយគេគិតថា នោះគឺជាឱកាសដ៏ល្អមួយសម្រាប់មេដឹកនាំកម្ពុជាទាក់ទាញការធ្វើពាណិជ្ជកម្ម វិនិយោគ និងពង្រឹងសហប្រតិបត្តិការជាមួយប្រទេសជប៉ុនអោយកាន់តែស៊ីជម្រៅ និងរឹងមាំ។
វ៉េបសាយរបស់ក្រសួងការបរទេសជប៉ុនបានអោយដឹងថា សម្តេចធិបតី និងលោកជំទាវ ពេជ្រ ចន្ទមុន្នី នឹងបំពេញទស្សនកិច្ចផ្លូវការនៅជប៉ុនពីថ្ងៃទី២៨ ដល់ថ្ងៃទី៣១ ខែឧសភា។ នៅក្នុងពេលទស្សនកិច្ចនោះ សម្តេចធិបតីនឹងជួបជាមួយនាយករដ្ឋមន្ត្រីជប៉ុន លោក អ៊ីស៊ីបា ស៊ីហ្គេរុ ( Ishiba Shigeru) ដើម្បីពិភាក្សាអំពីទំនាក់ទំនងទ្វេភាគី និងពិភាក្សាផងដែរអំពីបញ្ហា តំបន់ និងអន្តរជាតិ។ ទស្សនកិច្ចរបស់សម្តេចធិបតីនឹងធ្វើអោយកាន់តែស៊ីជម្រៅភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។
បច្ចុប្បន្ន ជប៉ុនគឺជាដៃគូពាណិជ្ជកម្មលំដាប់កំពូលទី៥ របស់កម្ពុជា។ ដូច្នេះ សង្ឃឹមថា ក្រោយដំណើរទស្សនកិច្ចផ្លូវរដ្ឋរបស់សម្តេចធិបតី ទំនាក់ទំនងពាណិជ្ជកម្ម និងវិនិយោគរវាងកម្ពុជានិងជប៉ុននឹងកាន់តែរីកចម្រើនបន្ថែមមួយកម្រិតទៀត ។ នៅក្នុងចំណោមដៃគូពាណិជ្ជកម្មកំពូលទាំង៥ ជប៉ុនគឺនៅក្នុងបញ្ជីដោយនៅពីក្រោមថៃ វៀតណាម សហរដ្ឋអាមេរិក និងចិន ។
យោងតាមទិន្នន័យរបស់អគ្គនាយកដ្ឋានគយនិងរដ្ឋាករ នៅ៤ខែដើម ឆ្នាំ២០២៥ នេះ ពាណិជ្ជកម្មរវាងកម្ពុជា និងជប៉ុនបានកើនលើស៨៣២លានដុល្លារ កើនឡើងជិត៣០ភាគរយ បើធៀបនឹងរយៈពេលដូចគ្នាកាលពីឆ្នាំមុន ។
នៅក្នុងរយៈពេលនេះ ការនាំចេញរបស់កម្ពុជាទៅកាន់ប្រទេសជប៉ុនមានចំនួន៥២៣លានដុល្លារ កើនឡើងជិត២០ភាគរយ ទន្ទឹមនឹងនេះដែរ ការនាំចូលពីប្រទេសជប៉ុនមកកម្ពុជាមានតម្លៃប្រមាណជាជាង៣០៨លានដុល្លារ កើនឡើងជិត៥១ ភាគរយ។
ទីផ្សារជប៉ុនសម្រាប់កម្ពុជា គឺមានសម្លៀកបំពាក់ កាបូប ស្បែកជើង គ្រឿងសង្ហារិម គ្រឿងសម្អាង ផលិតផលក្រដាស សម្ភារការិយាល័យ និងស្បែក ហើយនាំចូលមកវិញជាគ្រឿងម៉ាស៊ីន រថយន្ត គ្រឿងអេឡិចត្រូនិក គ្រឿងសង្ហារិម ក្រណាត់ និងផលិតផលប្លាស្ទិក ។
ចែករំលែកព័តមាននេះ