រាជធានីភ្នំពេញ ៖ ព្រឹកថ្ងៃទី​៣០ ខែ​សីហា ឆ្នាំ​២០១១ វេលាម៉ោង​៩​ព្រឹក នៅសាលប្រជុំ​ធនា​គារអភិវឌ្ឍន៍ជនបទ ​លោក​សុន គន្ធរ ទី​ប្រឹក្សាផ្ទាល់របស់សម្តេច​អគ្គមហាសេនាបតី​តេជោ ហ៊ុន សែន នាយករដ្ឋមន្រ្តី​នៃព្រះ​រាជា​ណា​ចក្រកម្ពុជា និងជាប្រធានអគ្គនាយកធនាគារ​អភិ​វឌ្ឍន៍ជនបទបានចុះហត្ថលេខា​លើកិច្ចព្រមព្រៀង​ទទួលហិរញ្ញប្បទានពីធនាគារអភិវឌ្ឍន៍ចិន (China Development Bank) សម្រាប់គាំទ្រ​អភិវឌ្ឍន៍វិស័យកសិកម្មនៅកម្ពុជា នូវទឹកប្រាក់​ជំហានដំបូងចំនួន​៨​លានដុល្លារអាមេរិក ដែល​មាន​រយៈពេលកម្ចី​១០​ឆ្នាំ ក្នុងអត្រាការប្រាក់​ពាណិជ្ជ​កម្មទាប​ ប្រែប្រួលទៅតាមអត្រារបស់ LIBOR ។

កាលពីឆ្នាំ​២០០៦ លោក Chen Yuan ទេសា​ភិបាលធនាគារអភិវឌ្ឍន៍ចិនធ្លាប់បាន​ចូល​ជួប​សម្ដែងការគួរសមជាមួយសម្តេចតេជោ​នៅ​រាជធានីភ្នំពេញ ហើយឆ្លៀតក្នុងឱកាសនោះ លោក​ក៏បានចុះហត្ថលេខាលើអនុស្សារណៈនៃ​ការ​យោគយល់គ្នាលើកិច្ចសហប្រតិបត្តិការ​ជា​មួយធនាគារអភិវឌ្ឍន៍ជនបទផងដែរ។

ក្នុងឆ្នាំ​២០១០ ធនាគារអភិវឌ្ឍន៍ជនបទបានធ្វើការ​ចរចា​ជាបន្តបន្ទាប់ជាមួយភាគីធនាគារអភិ​វឌ្ឍន៍​ចិន ហើយរហូតមកដល់ពេលនេះធនាគារអភិ​វឌ្ឍន៍​ចិនបានសម្រេចផ្តល់ប្រាក់កម្ចីសាកល្បង​ជំហានដំបូងដល់ធនាគារអភិវឌ្ឍន៍ជនបទ ក្នុង​គោលបំណងសម្រាប់ផ្តល់បន្តដល់ដៃគូ រួមមាន​ក្រុមហ៊ុន​សហគ្រាសអាជីវកម្ម រោងម៉ាស៊ីនកិន​ស្រូវ សមាគម សហគមន៍ ដើម្បីយកទៅប្រើ​ប្រាស់​លើគោលដៅអភិវឌ្ឍន៍វិស័យកសិកម្មនៅ​កម្ពុជា  ។ 

នេះជាទុនបន្ថែមថ្មីទៀតបន្ទាប់ពីធនាគារអភិ​វឌ្ឍន៍ជនបទបានទទួលនូវហិរញ្ញប្បទានពិសេសពីរាជរដ្ឋាភិបាលតាមរយៈក្រសួងសេដ្ឋកិច្ច និង​ហិរញ្ញវត្ថុចំនួន​៣៦​លានដុល្លារអាមេរិក និងការ​បង្កើនដើមទុនដល់ធនាគារអភិវឌ្ឍន៍ជនបទចំនួន​២០លានដុល្លារអាមេរិក សម្រាប់ចូលរួមអភិ​វឌ្ឍន៍​វិស័យ​កសិកម្ម ជាពិសេសវិស័យស្រូវ-អង្ករ​កម្ពុជា ដើម្បីឆ្លើយ​តប​ទៅនឹងគោលនយោបាយ​របស់​រាជរដ្ឋាភិបាលក្រោមការដឹកនាំដ៏ខ្ពង់ខ្ពស់​របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី​នៃព្រះរាជាណាចក្រកម្ពុជា ក្នុងការជំរុញផលិតកម្មស្រូវនិងការនាំអង្ករ​ចេញ​ឲ្យបាន​១លានតោន​ក្នុងឆ្នាំ​២០១៥ ខាងមុខនេះ៕