កីឡាករប្រដាល់វេលណាថាន់ ក្លេវើលីនឹងឡើងប្រកួតការពារខ្សែក្រវាត់ពិភពលោកក្នុងប្រភេទទម្ងន់ Light Heavyweight ស្ថាប័ន WBO របស់ខ្លួនប្រឆាំងនឹងកីឡាករអង់គ្លេសតូនី បេលលូនៅសង្វៀនក្រុងលីវើភូលប្រទេសអង់គ្លេសនារាត្រីថ្ងៃសៅរ៍ទី១៥តុលាខាងមុខ។ កីឡាករក្លេវើលីដែលធ្លាប់ប្រកួតឈ្នះ២២លើក មិនធ្លាប់ចាញ់
កីឡាករប្រដាល់វេលណាថាន់ ក្លេវើលីនឹងឡើងប្រកួតការពារខ្សែក្រវាត់ពិភពលោកក្នុងប្រភេទទម្ងន់ Light Heavyweight ស្ថាប័ន WBO របស់ខ្លួនប្រឆាំងនឹងកីឡាករអង់គ្លេសតូនី បេលលូនៅសង្វៀនក្រុងលីវើភូលប្រទេសអង់គ្លេសនារាត្រីថ្ងៃសៅរ៍ទី១៥តុលាខាងមុខ។ កីឡាករក្លេវើលីដែលធ្លាប់ប្រកួតឈ្នះ២២លើក មិនធ្លាប់ចាញ់ និងផ្តួលដៃគូប្រកួតឲ្យសន្លប់១១លើកត្រូវគេគ្រោងដាក់ឲ្យជួបជាមួយកីឡាករបេលលូក្នុងខែឧសភា។ ប៉ុន្តែដោយសារតែកីឡាករបេលលូនៅពេលនោះមានបញ្ហាជាមួយទម្ងន់ខ្លួនក៏ត្រូវអាក់ខានទៅវិញ។
បន្ទាប់មកកីឡាករក្លេវើលីឡើងប្រកួតការពារខ្សែក្រវាត់របស់ខ្លួនប្រឆាំងនឹងកីឡាករអាឡេស្គី គូហ្សៀមស្គីដោយជោគជ័យ។ ថ្លែងតាមរយៈគេហទំព័ររបស់លោកហ្វ្រ៊ែង វ៉ារ៉ឹនអ្នករៀបចំការប្រកួត ក្លេវើលីបញ្ជាក់ថា៖«ការប្រកួតរវាងខ្ញុំនិងបេលលូត្រូវបានគេផ្តួចផ្តើមឲ្យមានជាយូរមកហើយ។ មកដល់ឥឡូវនេះគេបានត្រៀមខ្លួនទទួលមេរៀនពីខ្ញុំហើយ។ គេជាមនុស្សនិយាយច្រើន ប៉ុន្តែកណ្តាប់ដៃរបស់គេមិនអាចឆ្លើយតបនឹងការនិយាយរបស់គេបានទេ។ សម្តីបានក្លាយទៅជាឧបសគ្គដ៏ធំមួយសម្រាប់កីឡាករបេលលូ។ កីឡាកររូបនេះពិតជាមិនអាចធ្វើបានតាមសម្តីអួតក្អេងក្អាងនោះទេ»។
ចំណែកកីឡាករបេលលូដែលមានរហស្សនាមថា«យន្តហោះទម្លាក់គ្រាប់បែក»ធ្លាប់ប្រកួតតែ១៦លើកប៉ុណ្ណោះ ប៉ុន្តែក្នុងនោះគ្មាន១លើកណាដែលគេបរាជ័យឡើយ។ កីឡាកររូបនេះធ្លាប់ផ្តួលគូប្រកួតឲ្យសន្លប់ចំនួន១០លើក។ គេសង្ឃឹមថា ប្រកួតនៅសង្វៀនEcho Arena ខាងមុខនេះនឹងពិតជានាំមកនូវជោគជ័យជាថ្មីទៀត។ បេលលូធ្លាប់ទទួលបានជោគជ័យជាប់ៗគ្នាក្នុងការប្រកួត២លើករួចមកហើយក្នុងឆ្នាំនេះ។ កីឡាករវ័យ២៨ឆ្នាំរូបនេះនិយាយថា៖«កីឡាករក្លេវើលីមិនដែលធ្លាប់វាយអ្នកណាម្នាក់ឲ្យសន្លប់នោះទេ ហើយគេកំពុងតែយល់សប្តិដែលគិតថាវាយខ្ញុំឲ្យសន្លប់នោះ។ ប្រកួតនៅរាត្រីថ្ងៃសៅរ៍ខ្ញុំនឹងធ្វើឲ្យគេជួបនូវសុបិនអាក្រក់»៕
ចែករំលែកព័តមាននេះ