កីឡាករហ្វីលីប ឡាម ខ្សែការពារប្រធានក្រុមជម្រើសជាតិអាល្លឺម៉ង់ បានចេញសៀវភៅបញ្ជាក់ពីជីវប្រវត្តិមានឈ្មោះថា «The Subtle Difference » ដោយមានអត្ថន័យបញ្ជាក់ថា កីឡាករណាម្នាក់ជាប្រភេទអ្នកស្រឡាញ់ភេទដូចគ្នា គួរត្រិះរិះពិចារណា ឱ្យបានហ្មត់ចត់ នៅមុនពេលបង្ហាញខ្លួន ព្រោះលទ្ធផលបង្ហាញនោះនៅពេលក្រោយមកនឹងមានបញ្ហាជីវិតដ៏ធ្ងន់ធ្ងរដោយនឹកស្មានមិនដល់ ។
កីឡាករឡាម ខ្សែការពារក្លឹប Bayern Munich ក្រុមជម្រើសជាតិអាល្លឺម៉ង់បង្ហើបឱ្យដឹងថា «ខ្ញុំមិនបានណែនាំដល់កីឡាករអាជីពណាម្នាក់ដែលស្រឡាញ់ភេទដូចគ្នា បង្ហាញមុខជាសាធារណៈទេ ព្រោះបារម្ភខ្លាចជួបបញ្ហាគ្រោះថ្នាក់ដូចកីឡាករចាស្ទីន ហ្វាសានូ ដែលក្រោយពីបង្ហាញអាថ៍កំបាំងរបស់ខ្លួនរហូតធ្វើអត្តឃាត ។
កីឡាករអាយុ២៧ឆ្នាំខាងលើបានបញ្ជាក់ជាចុងក្រោយថា គេមិនបានស្អប់ខ្ពើមអ្នកស្រឡាញ់ភេទដូចគ្នាទេ ប្រសិនបើមានអ្នកណាម្នាក់ចង់បង្ហាញខ្លួនជាសាធារណៈ ។ ខ្ញុំសូមបញ្ជាក់ថា «ខ្ញុំគ្មានបញ្ហាជាមួយអ្នកស្រឡាញ់ភេទដូចគ្នា រួមទាំងមិនរិះគន់ដល់ពួកគេផងដែរ» ។ កាលពីមុននេះ កីឡាករចាស្ទីន ហ្វាសានូ ជាកីឡាករអាជីពម្នាក់ដែលជាអ្នកស្រឡាញ់ភេទដូចគ្នា ខណៈពេលកំពុងនៅជាកីឡាករធ្លាប់លេងឱ្យក្លឹប Nottingham និង Man City ក្រោយមកក៏ធ្វើឱ្យស្ថានភាពជីវិតរស់នៅធ្លាក់ចុះរហូតធ្វើអត្តឃាតនៅឆ្នាំ១៩៩៨ក្នុងអាយុ៣៧ឆ្នាំ ៕
ចែករំលែកព័តមាននេះ