ការ៉ូលីណា ឌូអឺរ (Carolina Duer) ប្តេជ្ញាចិត្តប្តូរមុខរបរប្រចាំថ្ងៃពីអ្នកគ្រប់គ្រងភោជនីយដ្ឋានរបស់ឪពុក មកជាកីឡាការិនីប្រដាល់សាកល ។ ការដូរដោះបែបនេះ ក្រៅពីរូបនាងប្រហែលគ្មានស្រីណាធ្វើឡើយ។ សព្វថ្ងៃបំណងរបស់នាងបានឈានដល់គោលដៅហើយ ដោយបានក្លាយជាកីឡាការិនីប្រដាល់ជើងឯកលំដាប់ពិភពលោក
ការ៉ូលីណា ឌូអឺរ (Carolina Duer) ប្តេជ្ញាចិត្តប្តូរមុខរបរប្រចាំថ្ងៃពីអ្នកគ្រប់គ្រងភោជនីយដ្ឋានរបស់ឪពុក មកជាកីឡាការិនីប្រដាល់សាកល ។ ការដូរដោះបែបនេះ ក្រៅពីរូបនាងប្រហែលគ្មានស្រីណាធ្វើឡើយ។ សព្វថ្ងៃបំណងរបស់នាងបានឈានដល់គោលដៅហើយ ដោយបានក្លាយជាកីឡាការិនីប្រដាល់ជើងឯកលំដាប់ពិភពលោក ប្រភេទទម្ងន់រុយ ។
រឿងរ៉ាវការ៉ូលីណា ឌូអឺរ ឆ្លុះបញ្ចាំងពីតថភាពកំពុងកើតមានក្នុងវិស័យកីឡាប្រដាល់ស្រីនៅអាហ្សង់ទីន ។ នារីផ្សារភ្ជាប់ខ្លួនជាមួយកីឡាមានលក្ខណៈប្រយុទ្ធនេះ ក្រៅពីហេតុផលចំណូលចិត្តខ្លាំង គឺហេតុផលរកប្រាក់ចិញ្ចឹមខ្លួននិងគ្រួសារ។ ដូច្នេះហើយទើបពួកគេបានទទួលផលល្អអស់ពីម្នាក់ដល់ម្នាក់ជាបន្តបន្ទាប់ ។ ប្រទេសអាហ្សង់ទីនមានជើងឯកនារីផ្នែកប្រដាល់សាកលលំដាប់ពិភពលោក៨នាក់ ឃើញថាច្រើនជាងប្រទេសណាៗទាំងអស់ ។ ការ៉ូលីណា ឌូអឺរ និយាយពីការយល់ឃើញរបស់ខ្លួន «អ្នកប្រដាល់អាជីពនិងគ្រូបង្វឹកអាជីពអាចរស់បានធូរធារ ដូច្នេះហើយទើបមាននារីខ្លះជ្រើសយករបរប្រដាល់សម្រាប់ទ្រទ្រង់ជីវិតផ្ទាល់ខ្លួនក៏ដូចគ្រួសារ ។ សម្រាប់កីឡាប្រដាល់ មិត្តត្រូវជក់ចិត្តហ្វឹកហាត់ជាប្រចាំ មិនថាពេលណា ពេលណាទេ ជាមួយគ្នានេះក៏ត្រូវយកចិត្តទុកដាក់ខ្លាំងរបបបំប៉ន និងផ្នែកផ្សេងៗច្រើនទៀតដើម្បីរក្សាទម្ងន់ខ្លួនឱ្យមានលំនឹងដដែលកុំឱ្យឡើងចុះ ។ បើមិត្តភ្លេចខ្លួន គិតតែលង់ជាមួយការស៊ីផឹកសប្បាយ នោះបានសេចក្តីថាធ្វើឱ្យខ្លួនអស់លក្ខណ៍ដោយខ្លួនឯង» ។
ការ៉ូលីណា ឌូអឺរ ត្រូវបានចាត់ទុកជាករណីចម្លែកក្នុងមជ្ឈដ្ឋានកីឡាមានលក្ខណៈហិង្សានេះ។ មុនពេលសម្រេចចិត្តផ្ញើជីវិតលើសង្វៀនប្រដាល់ នាងជាអ្នកគ្រប់គ្រងភោជនីយដ្ឋានច្រើនកន្លែងរបស់ឪពុក និងជួយមើលខុសត្រូវតាមដានការងារគណនេយ្យផង ។ នាងកើតក្នុងគ្រួសារធូរធារគួរសម ក្នុងគ្រួសារនាងគ្មានអ្នកណាភ្ជាប់ខ្លួនជាមួយវិស័យកីឡាអ្វីទាំងអស់ មានតែនាងម្នាក់ប៉ុណ្ណោះសុខៗស្រាប់តែស្រឡាញ់កីឡានិងជ្រើសយកកីឡាមានលក្ខណៈប្រយុទ្ធស្លាប់រស់ទៀត ។ ការប្រែប្រួលរបស់នាងចាប់ផ្តើមក្នុងឆ្នាំ២០០៣ ពេលនាងអាយុ២៣ឆ្នាំ ។ កាលណោះនាងតាមមិត្តភក្តិទៅមើលគេហាត់ដាល់ក្នុងក្លឹបកីឡាប្រដាល់មួយ បន្ទាប់មកស្រាប់តែលែងចង់ធ្វើការងារប្រចាំថ្ងៃរបស់ខ្លួនដូចមុន អារម្មណ៍គិតតែបាញ់ទៅរកកីឡាប្រដាល់។ ការ៉ូលីណា ឌូអឺរ និយាយប្រាប់មិត្តភក្តិ«ពេលទៅមើលគេហាត់ដាល់នោះ ខ្ញុំរំភើបចិត្តខ្លាំងមែនទែន ។
លោកគ្រូបង្វឹកចេះតែសម្លឹងមុខខ្ញុំ។ ទីបំផុតគាត់ដើរមករកខ្ញុំ សួរត្រង់ៗ តើក្មួយស្រីចង់ក្លាយជាអ្នកប្រដាល់ទេ ? ខ្ញុំឆ្លើយវិញថា ច៎ាស ចង់ខ្លាំងណាស់ ។ ឮដូច្នេះ គាត់ប្រាប់វិញ ថា បើក្មួយស្រីពិតជាចង់មែន ពូនឹងប្រែក្លាយក្មួយឱ្យក្លាយជាអ្នកប្រដាល់ជើងឯក ។ មិនអួតទេ ខ្ញុំជាស្រីចិត្តរឹងប៉ឹងតាំងពីតូចដល់ធំ អត់ចេះខ្លាចអ្វីទាំងអស់ ។ លោកគ្រូបង្វឹកប្រហែលឃើញចរិតនេះរបស់ខ្ញុំតាំងពីដំបូង គួបផ្សំនឹងខ្ញុំមានកាយសម្បទាមាំមួនផង ទើបគាត់ចេះតែមើលមុខខ្ញុំ ហាក់ដូចចាប់អារម្មណ៍ខ្លាំងមកលើខ្ញុំ ។ ព្រោះតែដូច្នេះហើយទើបខ្ញុំបានក្លាយជាអ្នកប្រដាល់តាំងពីពេលនោះ» ។
ជាមួយបទពិសោធន៍ការងារគ្រប់គ្រងភោជនីយដ្ឋានកន្លងមក ការ៉ូលីណា ឌូអឺរ មិនត្រឹមតែយល់បានល្អនូវការរៀបចំយ៉ាងម៉េចខ្លះសម្រាប់ប្រកួតជាមួយដៃគូណាម្នាក់ដើម្បីបានទទួលតម្លៃខ្លួនខ្ពស់ប៉ុណ្ណោះទេ នាងថែមទាំងចេះធ្វើការចរចាបានល្អជាមួយក្រុមហ៊ុនឧបត្ថម្ភផងដែរ ។ ការរកបានអ្នកឧបត្ថម្ភសម្រាប់កីឡាប្រដាល់ជាការលំបាក លុះត្រាកីឡាករ-កីឡាការិនីបង្ហាញសមត្ថភាពឱ្យគេឃើញនិងទុកចិត្ត ។ ការ៉ូលីណា ឌូអឺរ និយាយពីបទពិសោធន៍ផ្ទាល់ខ្លួន «ការស្វែងរកអ្នកឧបត្ថម្ភមិនមែនរឿងងាយស្រួលឡើយ ។ នៅលើសង្វៀន មិត្តប្រើកម្លាំង ប្រើបច្ចេកទេសប្រយុទ្ធ គួបផ្សំនឹងការជឿជាក់លើភាពខ្លាំងរបស់ខ្លួន ជឿថាខ្លួនជាជើងឯកពិតៗ ។ ប៉ុន្តែដើរគោះទ្វារផ្ទះគេស្វែងរកការឧបត្ថម្ភ គឺជាការងារប្រើខួរក្បាលច្រើនជាងសាច់ដុំ»។
ដូចការ៉ូលីណា ឌូអឺរ នាងបេទីណា ហារីណូ ផ្សារភ្ជាប់ខ្លួនជាមួយកីឡាប្រដាល់ ព្រោះតែចំណូលចិត្តផង ប្រាក់ចិញ្ចឹមជីវិតផង ។ ឆ្នាំ២០១០ បេទីណា ហារីណូ គ្រងតំណែងជើងឯកពិភពលោកផ្នែកប្រដាល់នារី ប៉ុន្តែក្រោយពីនោះ មិនយូរប៉ុន្មាន ក្នុងការប្រកួតការពារខ្សែក្រវាត់របស់ខ្លួន នាងបរាជ័យត្រូវគេយកខ្សែក្រវាត់ទៅបាត់ ។ សព្វថ្ងៃនាងកំពុងប្រឹងប្រែងហ្វឹកហាត់ដើម្បីដណ្តើមយកខ្សែក្រវាត់នោះវិញ ។ បេទីណា ហារីណូ និងការ៉ូលីណា ឌូអឺរ ហាត់ក្នុងក្លឹបប្រដាល់ជាមួយគ្នា នៅរដ្ឋធានីប៊ុយអេណូស្សែ៊រ ។ ក្លឹបនោះពីមុនមានតែប្រុសៗប៉ុណ្ណោះ តែសព្វថ្ងៃមាននារីចូលរួមកាន់តែច្រើនឡើងក្នុងជំនាញវាយតប់នេះ ។
សហព័ន្ធកីឡាប្រដាល់អាហ្សង់ទីន បច្ចុប្បន្ន មានកីឡាការិនីជាង១០០នាក់ ជាតួលេខដ៏ខ្ពស់មិនធ្លាប់មានកាលពីមុន ។ លោកអាល់ប៊ែរតូ គ្រូបង្វឹកការ៉ូលីណា ឌូអឺរ និយាយថា កីឡាការិនីប្រដាល់អាហ្សង់ទីន ទើបតែចាប់ផ្តើមមានច្រើនក្នុងពេល១៥ឆ្នាំចុងក្រោយនេះ បន្ទាប់ពីកីឡាការិនីឈ្មោះម៉ាសឺឡា ដែលមានរហស្សនាមថា «ខ្លាញី»ក្លាយជាជើងឯកប្រដាល់ពិភពលោក។ ពួកកីឡាករប្រដាល់ប្រុសៗ ដែលពីដើមចាត់ទុកជារឿងចម្លែកនៅពេលឃើញស្រីចូលហាត់ប្រដាល់ លុះឥឡូវស្រីៗកាន់តែច្រើនឡើងចូលប្រឡូកក្នុងវិស័យកីឡានេះ វាក្លាយជារឿងធម្មតាសម្រាប់ពួកគេទៅវិញ ។ ពួកគេលែងហ៊ានចំអកលេងសើចដូចមុនៗហើយ ៕
ចែករំលែកព័តមាននេះ