រាជធានីភ្នំពេញ ៖ បុរសម្នាក់មានជំងឺប្រចាំកាយត្រូវក្រុមគ្រួសារដឹកយកទៅកាន់ មន្ទីរពេទ្យមិត្តភាពខ្មែរ-សូវៀត ដើម្បីព្យាបាល។ ពេលទៅដល់ក្រុមគ្រូពេទ្យបានធ្វើការត្រួតពិនិត្យមិនឃើញមាន រោគសញ្ញាអ្វីទាល់តែសោះ ទើបក្រុមគ្រួសារនាំយកទៅឱ្យព្រះចៅអធិការវត្តស្លែងព្យាបាល វិញម្តង ព្រោះឮល្បីថា ព្រះសង្ឃអង្គនោះ
រាជធានីភ្នំពេញ ៖ បុរសម្នាក់មានជំងឺប្រចាំកាយត្រូវក្រុមគ្រួសារដឹកយកទៅកាន់មន្ទីរពេទ្យមិត្តភាពខ្មែរ-សូវៀត ដើម្បីព្យាបាល។ ពេលទៅដល់ក្រុមគ្រូពេទ្យបានធ្វើការត្រួតពិនិត្យមិនឃើញមានរោគសញ្ញាអ្វីទាល់តែសោះ ទើបក្រុមគ្រួសារនាំយកទៅឱ្យព្រះចៅអធិការវត្តស្លែងព្យាបាលវិញម្តង ព្រោះឮល្បីថា ព្រះសង្ឃអង្គនោះមានមន្តអាគមខ្លាំងពូកែ ប៉ុន្តែក្រោយពេលចៅអធិការវត្តព្យាបាលដោយការស្រោចទឹកមន្តរួចស្នាក់នៅក្នុងវត្តបាន១យប់ បុរសនោះក៏បានដាច់ខ្យល់ស្លាប់នៅវេលាទៀបភ្លឺតែម្តង ។
ហេតុការណ៍នោះបានកើតឡើងកាលពីវេលាទៀបភ្លឺថ្ងៃទី២៦ សីហា ឆ្នាំ២០១១ នៅក្នុងវត្តស្លែងដែលមានទីតាំងស្ថិតនៅតាមបណ្តោយផ្លូវជាតិលេខ៣ សង្កាត់ពងទឹក ខណ្ឌដង្កោ រាជធានីភ្នំពេញ ។ បុរសដែលស្លាប់បាត់បង់ជីវិតនោះឈ្មោះសំ ផន អាយុ៣៨ឆ្នាំ ជាកសិករ រស់នៅក្នុងភូមិត្រពាំងផុស ឃុំស្នាយអញ្ជិត ស្រុកជុំគីរី ខេត្តកំពត ហើយក្រោយពេលសមត្ថកិច្ចប៉ូលិសមូលដ្ឋានពិនិត្យរួចស្ត្រីជាប្រពន្ធបានដឹកសពទៅធ្វើបុណ្យតាមប្រពៃណីនៅឯស្រុកកំណើត ។
តាមប្រភពព័ត៌មានបានឱ្យដឹងថា នៅមុនពេលកើតហេតុបុរសរូបនោះត្រូវបានក្រុមគ្រួសារនាំចាកចេញពីស្រុកកំណើតទៅកាន់មន្ទីរពេទ្យមិត្តភាពខ្មែរ-សូវៀត ដើម្បីឱ្យគ្រូពេទ្យព្យាបាលជំងឺប្រចាំកាយរបស់គាត់ ។ ពេលនោះក្រុមគ្រូពេទ្យពិនិត្យរោគសញ្ញាមិនឃើញមានអ្វីទាំងអស់ ទើបពុំដឹងថា ត្រូវព្យាបាលតាមរបៀបណាដែរ ព្រោះតែបុរសនោះមានជំងឺចម្លែកបែបនេះ។ ប្រភពដដែលបានបន្តទៀតថា បន្ទាប់មកក្រុមគ្រួសារក៏បាននាំចេញពីមន្ទីរពេទ្យទៅរកព្រះសង្ឃនាម ថឹក ចុន្ទ ចៅអធិការវត្តស្លែង ដើម្បីឱ្យជួយព្យាបាល ព្រោះល្បីថា ព្រះអង្គមានមន្តអាគមខ្លាំងពូកែ ។ ពេលទៅដល់ព្រះអង្គថឹក ចុន្ទ បានទទួលព្យាបាលតាមវិធីស្រោចទឹកមន្តទៅតាមជំនាញដែលព្រះអង្គចេះ និងធ្លាប់ព្យាបាលអ្នកជំងឺទូទៅកន្លងមក។ លុះពេលចៅអធិការវត្តស្រោចទឹកមន្តរួចរាល់ហើយ បុរសនោះក៏បានស្នាក់នៅក្នុងវត្តនោះ១យប់រហូតដល់វេលាម៉ោងជាង៣ជិតភ្លឺថ្ងៃទី២៦ សីហា ក៏ស្រាប់តែដាច់ខ្យល់ស្លាប់នៅក្នុងវត្តនោះតែម្តង ។
ប្រភពដដែលបានបន្តទៀតថា បន្ទាប់ពីឃើញប្តីរបស់ខ្លួនស្លាប់ក្រោយពេលស្រោចទឹកមន្តរួចបែបនេះ ស្ត្រីជាប្រពន្ធបានស្នើសុំឱ្យប៉ូលិសមូលដ្ឋានចុះត្រួតពិនិត្យក្រែងមានការពាក់ព័ន្ធទៅនឹងចៅអធិការវត្តព្យាបាលប្តីរបស់ខ្លួនខុសបច្ចេកទេសបណ្តាលឱ្យស្លាប់ ។ ពេលនោះប៉ូលិសបានចុះធ្វើការពិនិត្យមិនឃើញមានការពាក់ព័ន្ធទៅនឹងការព្យាបាលរបស់ចៅអធិការវត្តអង្គនោះឡើយ ទើបក្រុមគ្រួសារសម្រេចចិត្តនាំយកសាកសពទៅកាន់ស្រុកកំណើតដើម្បីធ្វើបុណ្យតាមប្រពៃណីជាតិ ។
ទាក់ទិនទៅនឹងហេតុការណ៍នោះប្រជាពលរដ្ឋនិយាយថា ក្រុមគ្រួសាររបស់បុរសរូបនោះឆោតល្ងង់ខ្លាំងណាស់ សម័យនេះទៅហើយនៅតែជឿជាក់លើមន្តអាគមអូមអាមទៀត។ ដឹងថាប្តីរបស់ខ្លួនសូម្បីតែគ្រូពេទ្យជំនាញ មានម៉ាស៊ីនថត និងស្គែនទំនើបៗមើលរោគសញ្ញាមិនឃើញផង បែរជាយកអប្បិយជំនឿដាក់ខ្លួនរហូតប្តីស្លាប់បែបនេះ ។ ដោយឡែកព្រះចៅអធិការវត្តស្លែងព្រះនាមថឹក ចុន្ទ បានមានថេរដីកាទៅកាន់មន្ត្រីអាជ្ញាធរថា ការសា្លប់របស់បុរសនោះមិនមានពាក់ព័ន្ធទៅនឹងការព្យាបាលរបស់ព្រះអង្គនោះទេ។ តាមពិតបន្ទាប់ពីចេញពីមន្ទីរពេទ្យរកព្រះអង្គឱ្យជួយព្យាបាល ព្រះអង្គបានស្រោចទឹកមន្តឱ្យឃើញថា បុរសនោះមានអាការធូរស្រាលខ្លះហើយ និងបានសុំស្នាក់នៅក្នុងវត្ត១យប់ លុះជិតភ្លឺក៏ស្រាប់តែស្លាប់បែបនេះទៅវិញ៕
ចែករំលែកព័តមាននេះ