រាជធានីភ្នំពេញ ៖ យុវជនជាសន្តិសុខម្នាក់ ត្រូវអ្នកស្គាល់គ្នាចាក់ចំនួន៤កន្ត្រៃបណ្តាលឱ្យរងរបួស ដេកពេទ្យ កាលពីវេលាម៉ោង៩យប់ថ្ងៃទី២៦ សីហា ២០១១ នៅបន្ទប់ជួលជិតផ្សារដីហុយ ស្ថិតនៅសង្កាត់ភ្នំពេញថ្មី ខណ្ឌសែនសុខ។ ប្រភពព័ត៌មានពីក្រុមគ្រួសារជនរងគ្រោះបានឱ្យដឹងថា ជនរងគ្រោះឈ្មោះប៉ឹម ទិត្យ
រាជធានីភ្នំពេញ ៖ យុវជនជាសន្តិសុខម្នាក់ ត្រូវអ្នកស្គាល់គ្នាចាក់ចំនួន៤កន្ត្រៃបណ្តាលឱ្យរងរបួសដេកពេទ្យ កាលពីវេលាម៉ោង៩យប់ថ្ងៃទី២៦ សីហា ២០១១ នៅបន្ទប់ជួលជិតផ្សារដីហុយ ស្ថិតនៅសង្កាត់ភ្នំពេញថ្មី ខណ្ឌសែនសុខ។ ប្រភពព័ត៌មានពីក្រុមគ្រួសារជនរងគ្រោះបានឱ្យដឹងថា ជនរងគ្រោះឈ្មោះប៉ឹម ទិត្យ ភេទប្រុស អាយុ២១ឆ្នាំ ជាសន្តិសុខនៅក្រុមហ៊ុនអេសស៊ីវាយ មានស្រុកកំណើតនៅភូមិរលួស ឃុំប្រធាតុ ស្រុកបឹងត្របែក ខេត្តព្រៃវែង មកស្នាក់នៅកន្លែងកើតហេតុខាងលើ។
ប្រភពព័ត៌មានបន្តថា នៅថ្ងៃកើតហេតុខាងលើ ឈ្មោះណាង ភេទប្រុស អាយុ២១ឆ្នាំ នៅបន្ទប់ជួលជិតគ្នា បានយកទូរស័ព្ទស៊ីមពីររបស់ចិន មកបញ្ចាំនឹងជនរងគ្រោះក្នុងតម្លៃ១០ដុល្លារ អាមេរិក ប៉ុន្តែជនរងគ្រោះមិនព្រមទទួលយក ទូរស័ព្ទនោះទេ ហើយបែរជាទៅប្រាប់ម្តាយរបស់ឈ្មោះណាង ពីរឿងយកទូរស័ព្ទមកបញ្ចាំ។
បន្ទាប់ពីដឹងរឿងថា ជនរងគ្រោះទៅប្រាប់ម្តាយរបស់គេ ក៏កើតរឿងខឹងនឹងជនរងគ្រោះ ហើយទៅរករឿងឈ្លោះប្រកែក និងវាយគ្នាជាមួយជនរងគ្រោះ រួចឈ្មោះណាង ទៅរកកូនកាំបិតក្នុងបន្ទប់ជួលបម្រុងយកមកចាក់ ប៉ុន្តែរកមិនឃើញក៏យកកន្ត្រៃសម្រាប់កាត់ព្រុយខោអាវចាក់លើជនរងគ្រោះចំនួន៤កន្ត្រៃ ចំស្មា២ កន្ត្រៃ និងឆ្អឹងជំនីរ២កន្ត្រៃ។ បន្ទាប់ពីត្រូវរបួស ជនរងគ្រោះ ត្រូវក្រុមគ្រួសារបញ្ជូនទៅព្យាបាលនៅមន្ទីរពេទ្យព្រះកុសុមៈ។
ប្រភពព័ត៌មានបន្តទៀតថា ជនដៃដល់ជាមនុស្សញៀនថ្នាំ តែងតែធ្វើបាប បំផ្លិចបំផ្លាញទ្រព្យសម្បត្តិឪពុកម្តាយគេជារឿយៗ ហើយករណីនេះឪពុក-ម្តាយរបស់ជនដៃដល់ បាននិយាយចរចាជាមួយឪពុកម្តាយជនរងគ្រោះដោយសុំធានាសងថ្លៃព្យាបាលទាំងអស់ ហើយសុំឱ្យភាគីជនរងគ្រោះកុំប្តឹង។
ករណីនេះ សមត្ថកិច្ចគួរតែចាត់វិធានការទៅតាមផ្លូវច្បាប់ កុំឱ្យជនដៃដល់រួចខ្លួន និងអាងមានលុយប៉ះប៉ូវដើរបង្ករឿងបែបនេះទៀត៕
ចែករំលែកព័តមាននេះ