រាជធានីភ្នំពេញ ៖ ប្តីប្រពន្ធ២នាក់ ជាអ្នកមើលការខុសត្រូវឱ្យផ្ទះមន្ត្រីជាន់ខ្ពស់យោធា កាលពីថ្ងៃទី២៦ សីហា ២០១១ បានត្រូវសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្នក្រោមបទ ចោទប្រកាន់សង្ស័យថា បានលួចប្រាក់ម្ចាស់ផ្ទះអស់ជាង២លានដុល្លារ ។ ប្តីប្រពន្ធរងនូវការចោទប្រកាន់នេះ
រាជធានីភ្នំពេញ ៖ ប្តីប្រពន្ធ២នាក់ ជាអ្នកមើលការខុសត្រូវឱ្យផ្ទះមន្ត្រីជាន់ខ្ពស់យោធា កាលពីថ្ងៃទី២៦ សីហា ២០១១ បានត្រូវសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្នក្រោមបទចោទប្រកាន់សង្ស័យថា បានលួចប្រាក់ម្ចាស់ផ្ទះអស់ជាង២លានដុល្លារ ។ ប្តីប្រពន្ធរងនូវការចោទប្រកាន់នេះមានឈ្មោះប៉ែន សាលី ភេទប្រុស អាយុ៣២ឆ្នាំ និងប្រពន្ធឈ្មោះគ្រែល ណារី អាយុ២៨ឆ្នាំ ស្នាក់នៅផ្ទះលោកមន្ត្រីជាន់ខ្ពស់យោធា ក្បែរវិទ្យាល័យសន្ធរម៉ុក ខណ្ឌទួលគោក។
មិនមានប្រភពព័ត៌មានណាមួយបញ្ជាក់ឱ្យលម្អិតពីអង្គហេតុនៃការឃុំខ្លួនប្តីប្រពន្ធ២នាក់ជ្រកក្រោមផ្ទះលោកមន្ត្រីជាន់ខ្ពស់យោធានោះទេ សូម្បីសមត្ថកិច្ចកសាងសំណុំរឿងបញ្ជូនខ្លួនជនសង្ស័យទៅសាលាដំបូងក៏មិនហ៊ានហើបមាត់ដែរ ព្រោះគេខ្លាចអស់ស័ក្តិរឿងធ្ងន់ធ្ងរពេក។ទោះបីជាយ៉ាងណា ប្រភពព័ត៌មានសាលាដំបូងរាជធានីភ្នំពេញ បានដឹងតិចតួចបំផុតថា ឈ្មោះប៉ែន សាលី និងប្រពន្ធឈ្មោះគ្រែល ណារី ជាមនុស្សស្និទ្ធស្នាលនឹងលោកមន្ត្រីជាន់ខ្ពស់យោធា ហើយក៏ជាអ្នកមើលការខុសត្រូវក្នុងផ្ទះលោកមន្ត្រីជាន់ខ្ពស់យោធានោះដែរ។
សូមបញ្ជាក់ថា កាលអំឡុងខែមិថុនា ម្ចាស់ផ្ទះបានបាត់លុយកាក់និងគ្រឿងអលង្ការសរុបប្រមាណជាង២លានដុល្លារ ។ ក្រោយពីបាត់លុយបាត់កាក់ម្ចាស់ផ្ទះបានឃាត់ខ្លួនប្តីប្រពន្ធ២នាក់ សាកសួរ ព្រោះគេជាមនុស្សជំនិត និងអាចចេញចូលបានគ្រប់បន្ទប់។ ពេលសាកសួរយកចម្លើយប្តីប្រពន្ធទាំង២ បានលើកដៃប្រណម្យថា គេមិនបានប៉ះពាល់ទ្រព្យសម្បត្តិមាសប្រាក់លុយកាក់របស់ម្ចាស់ផ្ទះនោះទេ ។ ប្រភពព័ត៌មានបានឱ្យដឹងទៀតថា ទោះបីបង្ខំសួរចម្លើយយ៉ាងណាក៏មិនមានលទ្ធផល និងភស្តុតាងណាមួយសម្រាប់ចោទប្រកាន់ពីរនាក់ប្តីប្រពន្ធទាំង២នោះដែរ ៕
ចែករំលែកព័តមាននេះ