ខេត្តកំពង់ឆ្នាំង ៖ កម្មការិនីប្រមាណ២០០នាក់បានដួលសន្លប់ជាបន្តបន្ទាប់កាលពីវេលា ម៉ោង៨ និង៣០នាទីព្រឹក ថ្ងៃទី២៥ សីហា នៅក្នុងរោងចក្រតម្បាញM&V ដែលស្ថិតក្នុងភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង។ នេះជាការដួលសន្លប់លើកទី២ ហើយនៃដើមសប្តាហ៍ចុងខែសីហានេះ ដែលករណីថ្ងៃទី២៣ សីហា មានការដួលសន្លប់កម្មករចំនួនជាង៥០នាក់។
ខេត្តកំពង់ឆ្នាំង ៖ កម្មការិនីប្រមាណ២០០នាក់បានដួលសន្លប់ជាបន្តបន្ទាប់កាលពីវេលាម៉ោង៨ និង៣០នាទីព្រឹក ថ្ងៃទី២៥ សីហា នៅក្នុងរោងចក្រតម្បាញM&V ដែលស្ថិតក្នុងភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង។ នេះជាការដួលសន្លប់លើកទី២ ហើយនៃដើមសប្តាហ៍ចុងខែសីហានេះ ដែលករណីថ្ងៃទី២៣ សីហា មានការដួលសន្លប់កម្មករចំនួនជាង៥០នាក់។
តាមមន្ត្រីប៉ូលិសជាជំហានដំបូងបាននិយាយឱ្យដឹងថា កម្មការិនីដែលដួលសន្លប់ និងដឹកតាមរថយន្ត តាមរ៉ឺម៉ក រួមទាំងម៉ូតូឌុបបានចូលមកសង្គ្រោះនៅមន្ទីរពេទ្យគិតត្រឹមម៉ោង១០ព្រឹកថ្ងៃដដែលមាន១៥២នាក់ ក្នុងនោះមានប្រុស២នាក់ ។ ឯអ្នកធ្ងន់ធ្ងរដាក់ខ្យល់អុកសីុហ្សែនមាន១៨នាក់ ក្នុងនោះមានប្រុសម្នាក់។ ប៉ុន្តែតួលេខចុងក្រោយរបស់មន្ទីរពេទ្យវិញ គឺបានកើនដល់១៩៨នាក់ឯណោះ។ នៅម៉ោង១២ថ្ងៃត្រង់ ថ្ងៃដដែល លោកសូរិន្ទ ទីរ៉ាវុឌ្ឍី ប្រធានមន្ទីរពេទ្យខេត្តបានឱ្យដឹងថា តួលេខពិតប្រាកដគឺមានចំនួន២០០នាក់គត់ដែលបានចុះបញ្ជីសង្គ្រោះបន្ទាន់។ ប៉ុន្តែពេលនេះបានត្រឡប់ទៅផ្ទះវិញជាបណ្តើរៗខ្លះហើយគិតត្រឹមម៉ោង១រសៀលនៅសល់តែត្រឹម៤១នាក់ប៉ុណ្ណោះ។ លោកបន្តថា តាមមើលពួកនាងសុទ្ធតែមានសុខភាពជាធម្មតាទេ ប៉ុន្តែរឿងដួលសន្លប់បណ្តាលមកពីអ្វីនោះលោកមិនទាន់ហ៊ានសន្និដ្ឋានឡើយ។
កម្មការិនីជាច្រើននាក់បាននិយាយដូចៗគ្នាថា កាលពីថ្ងៃទី២៣ ខែសីហា អគារក្នុងរោងចក្រតម្បាញចំនួន៣ គឺ អគារលេខ៨, ៩ និងលេខ១០បានដួលសន្លប់ ហើយអគារនោះថ្ងៃទី២៤ សីហា ក៏បានឱ្យឈប់សម្រាក និងចូលធ្វើការនៅថ្ងៃទី២៥ សីហាវិញ។ ប៉ុន្តែស្រាប់តែម៉ោង៨ និង៣០នាទីទើបចូលធ្វើការក៏ដួលសន្លប់ជាបន្តបន្ទាប់ទៀត គឺគ្រប់អគារទាំង១០ ។ រីឯអគារ៣ជាន់មួយទៀតក៏មានអ្នកដួលសន្លប់ផងដែរ។
ក្រុមកម្មការិនីបាននិយាយខុសៗគ្នាថា បណ្តាលមកពីសាច់កំណាត់មកដល់ថ្មីធុំក្លិន តែខ្លះទៀតថា មកពីមានរថយន្តបូមលូបង្គន់៤ថ្ងៃហើយបូមមិនទាន់ហើយ។ ចំណែកមូលហេតុជាក់លាក់បែបណានោះ គឺមិនទាន់ដឹងច្បាស់ទេ ព្រោះភាគីខាងរោងចក្រពុំអាចសុំការបកស្រាយបាន។ ប៉ុន្តែមជ្ឈដ្ឋានជុំវិញកន្លែងកើតហេតុបាននិយាយថា បណ្តាលមកពីបរិយាកាសក្នុងអគារធ្វើការមិនល្អ។
ទោះជាយ៉ាងនេះក្តីប្រជាពលរដ្ឋដែលមានកូនចៅធ្វើការនៅរោងចក្រនោះសំណូមពរយ៉ាងទទូចឱ្យមន្ទីរពាក់ព័ន្ធ ពិសេសអាជ្ញាធរមូលដ្ឋាន ស្រុក ខេត្ត ជួយត្រួតពិនិត្យក្នុងរោងចក្រផង។ អ្វីដែលមានការកត់សំគាល់គឺជនជាតិចិនជាម្ចាស់ ឬថៅកែរោងចក្របានព្យាយាមរារាំងមិនឱ្យអ្នកកាសែតចូលថតយកព័ត៌មានទេ រហូតច្រានគ្នាទៅវិញទៅមកដួលផ្ងារក្រោយក៏មានដែរ ព្រោះអ្នកកាសែតព្យាយាមចូលថតក្នុងរោងចក្រដែលកំពុងមានកម្មករដួលសន្លប់ដេករដូករណែល ហើយត្រូវថៅកែរារាំងដូចជាមិនចង់ឱ្យដឹកអ្នករងគ្រោះទាំងនោះចេញទេ ៕
ចែករំលែកព័តមាននេះ