ខេត្តរតនគិរី ៖ សមត្ថកិច្ចច្រកទ្វារអន្តរជាតិអូរយ៉ាដាវ បានត្រួតពិនិត្យឆែកឆេររថយន្តក្រុងដឹកអ្នកទេសចររបស់ ក្រុមហ៊ុនវៀតណាមមួយគ្រឿងប្រទះឃើញឈើគ្រញូង ដែលមានមុខកាត់ធំៗជាច្រើនដុំបង្កប់ក្នុងតួសាក់ស៊ីកែច្នៃ ក្នុងឃ្លុបសម្រាប់ដាក់អីវ៉ាន់ ។ សមត្ថកិច្ចឃាត់ខ្លួនជនទាក់ទិននឹងបទល្មើសចំនួន៤នាក់ ក្នុងនោះមាន
ខេត្តរតនគិរី ៖ សមត្ថកិច្ចច្រកទ្វារអន្តរជាតិអូរយ៉ាដាវ បានត្រួតពិនិត្យឆែកឆេររថយន្តក្រុងដឹកអ្នកទេសចររបស់ក្រុមហ៊ុនវៀតណាមមួយគ្រឿងប្រទះឃើញឈើគ្រញូង ដែលមានមុខកាត់ធំៗជាច្រើនដុំបង្កប់ក្នុងតួសាក់ស៊ីកែច្នៃក្នុងឃ្លុបសម្រាប់ដាក់អីវ៉ាន់ ។ សមត្ថកិច្ចឃាត់ខ្លួនជនទាក់ទិននឹងបទល្មើសចំនួន៤នាក់ក្នុងនោះមានស្រី២នាក់ និងរថយន្តកាលពីវេលាម៉ោង១១ព្រឹកថ្ងៃទី២៣ សីហា រួចបញ្ជូនទាំងមនុស្សរួមទាំងវត្ថុតាងទៅខណ្ឌរដ្ឋបាលព្រៃឈើ ដើម្បីកសាងសំណុំរឿងតាមច្បាប់ ។
មន្ត្រីប៉ូលិសច្រកទ្វារអន្តរជាតិអូរយ៉ាដាវឱ្យដឹងថា ដោយទទួលព័ត៌មានពីប្រទេសឡាវថា រថយន្តដឹកភ្ញៀវទេសចរនោះបង្កប់ឈើប្រណីតនៅឃ្លុបដាក់អីវ៉ាន់ចេញពីប្រទេសឡាវតាមមាត់ច្រកដុងក្រឡ ស្ថិតនៅភូមិខាំផាន់ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង ឆ្ពោះទៅប្រទេសវៀតណាម តាមច្រកអូរយ៉ាដាវ ទើបមន្ត្រីប៉ូលិសប្រចាំការច្រកទ្វារលោកកែម ស៊ីណា និងលោកណាំ ប៊ុនវ៉ៃ ស្ទាក់ត្រួតពិនិត្យ និងឆែកឆេររុករកឈើប្រណីតទាំងនោះនៅក្នុងឃ្លុបកែច្នៃរបស់រថយន្តក្រុង ។
លោកណាំ ប៊ុនវ៉ៃ ឱ្យដឹងថា នៅពេលត្រួតពិនិត្យរថយន្តនោះពុំឃើញមានឈើប្រណីតផ្ទុកក្នុងរថយន្តទេ ប៉ុន្តែឃើញស្នាមផ្សារផ្ទាំងដែកពាសបិទខណ្ឌចន្លោះកណ្តាលឃ្លុបដាក់អីវ៉ាន់ គួរឱ្យសង្ស័យលោកក៏យកដែកខួងទម្លុះពីក្រោមត្រង់ចំណុចផ្ទាំងដែកដែលផ្សារជិតមានកំណាត់កាំមីបិទពីខាងក្រៅ ស្រាប់តែមានកម្ទេចឈើចេញមកក្រៅ។ បន្ទាប់ពីមានការសង្ស័យថាមានបង្កប់ឈើប្រណីតកម្លាំងសហការមានស្ថាប័ន គយ កាំកុងត្រូល មន្ត្រីច្រកទ្វារបានរឹបអូសយករថយន្តទៅរក្សាទុកនៅស្នាក់ការប៉ុស្តិ៍ប៉ូលិសអន្តោប្រវេសន៍។
មន្ត្រីរូបនោះបន្តទៀតថា នៅពេលត្រួតពិនិត្យ អ្នកបើករថយន្តនោះគំរាមថា បើធ្វើឱ្យយឺតដំណើររបស់ពួកគេតែកន្លះម៉ោងក្រុមហ៊ុននឹងប្តឹងភ្លាម ។ បន្ទាប់មកមានវត្តមានលោករស់ សារា៉ា ព្រះរាជអាជ្ញារងអមសាលាដំបូងខេត្ត លោកផែន ឌីណា នាយការិយាល័យកណ្តាលនគរបាលយុត្តិធម៌នៃស្នងការដ្ឋានខេត្តចូលរួម ។
លោកវង្ស សុក្រសិរី នាយខណ្ឌ នាយផ្នែក នាយសង្កាត់រដ្ឋបាលព្រៃឈើបានទៅចូលរួមសហការឆែកឆេរដោយយកឧបករណ៍សម្រាប់ផ្សារដែកទៅផ្សារផ្តាច់ទម្លុះផ្ទាំងដែកដែលពាសជិតហើយប្រទះឃើញដុំឈើគ្រញូងផ្ទុកនៅក្នុងនោះចំនួន១៤៨ដុំ មានមុខកាត់ធំៗចាប់ពី១០សង្ទីម៉ែត្រគុណនឹង៤០សង្ទីម៉ែត្រ ប្រវែង៦០សង្ទីម៉ែត្រ ឬ១០សង្ទីម៉ែត្រ គុណនឹង២០សង្ទីម៉ែត្រ ប្រវែង២ម៉ែត្រ សរុបទម្ងន់៤.០៧៣គីឡូក្រាម ស្មើនឹងជាង៣ម៉ែត្រគូប ។ រថយន្តនោះម៉ាកហ៊ីយ៉ាន់ដាយ ៤៥កៅអី ពណ៌ក្រហម ពាក់ស្លាកលេខវៀតណាម ៥១B០១៨៩៧ របស់ក្រុមហ៊ុនទេសចរណ៍វៀតណាមឈ្មោះ HOANG PHAT។
រថយន្តនោះបើតាមប្រភពព័ត៌មានដែលផ្តល់ឱ្យមានស្លាកលេខដល់ទៅពីរសម្រាប់ផ្លាស់ប្តូរគ្នា។នៅពេលឃាត់រថយន្តមួយគ្រឿងនេះត្រួតពិនិត្យនៅច្រកទ្វារអន្តរជាតិអូរយ៉ាដាវ ក៏មានរថយន្តក្រុងមួយគ្រឿងទៀតរបស់ក្រុមហ៊ុននោះបកត្រឡប់ក្រោយឆ្ពោះទៅក្រុងបានលុងវិញ ហាក់បីដូចជាបញ្ឆោតសមត្ថកិច្ច ។ នៅពេលសមត្ថកិច្ចនាំរថយន្តនោះ ទៅឆែកឆេរនៅស្នងការដ្ឋានខេត្តពុំមានឃើញផ្ទុកឈើដូចការសង្ស័យទេ ហើយក៏ដោះលែងឱ្យត្រឡប់ទៅវិញ នៅល្ងាចថ្ងៃទិ២៣ សីហា ។ ចំពោះរថយន្តដែលផ្ទុកឈើឃាត់នៅច្រកអូរយ៉ាដាវនោះ មានដឹកអ្នកទេសចរចំនួន១៥នាក់ រួមទាំងអ្នកបើកបរ ។ ក្រោយពីត្រួតពិនិត្យរួចសមត្ថកិច្ចដោះលែងអ្នកដំណើរចំនួន១១នាក់ឱ្យទៅប្រទេសវៀតណាម ចំណែក៤នាក់ និងវត្ថុតាងត្រូវបញ្ជូនទៅខណ្ឌរដ្ឋបាលព្រៃឈើនៅព្រឹកថ្ងៃទី២៤ សីហា ។
ជនជាតិវៀតណាមចំនួន៤នាក់ដែលពាក់ព័ន្ធនឹងការដឹកជញ្ជូនឈើប្រណីតប្រភេទគ្រញូងបង្កាប់តាមរថយន្តក្រុងមាន១-ឈ្មោះដាវយុ ភេទប្រុស អាយុ៣២ឆ្នាំ ២-ឈ្មោះកាវ ស៊ីវ៉េ ភេទស្រី អាយុ៣៦ឆ្នាំ ៣-ឈ្មោះកាវ ជឿង ភេទប្រុស អាយុ២២ឆ្នាំ ៤-ឈ្មោះនឿង ធី យានធាន ភេទស្រី អាយុ២៦ឆ្នាំ ។ ពួកគេទាំង៤នាក់ រស់នៅប្រទេសវៀតណាម ធ្លាប់ធ្វើសកម្មភាពដឹកជញ្ជូនឈើគ្រញូងបង្កប់តាមរថយន្តក្រុងដែលភាគច្រើនដឹកជញ្ជូនចេញពីប្រទេសឡាវតាមច្រកត្រពាំងក្រៀលឆ្លងកាត់ខេត្តស្ទឹងត្រែង ក្រចេះ ទៅប្រទេសវៀតណាមតាមច្រកទ្វារអន្តរជាតិត្រពាំងស្រែ ក្នុងឃុំ២ធ្នូ ស្រុកស្នួល ខេត្តក្រចេះ និងឆ្លងកាត់ច្រកទ្វារអូរយ៉ាដាវ ។ ជនទាំង៤នាក់ត្រូវបានកសាងសំណុំរឿងបញ្ជូនទៅកាន់សាលាដំបូងនៅព្រឹកថ្ងៃទី២៥ សីហា ឆ្នាំ២០១១ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ