ខេត្តកណ្តាល ៖ កម្លាំងមន្ត្រីខណ្ឌរដ្ឋបាលជលផលកណ្តាលនិងកម្លាំងមន្ត្រី អធិការដ្ឋានរដ្ឋបាលជលផលចតុមុខ សហការជាមួយអាជ្ញាធរស្រុកពញាឮ និងកម្លាំងប៉ូលិសអធិការដ្ឋានស្រុកពញាឮបានចុះយុទ្ធនាការ បង្ក្រាបបទល្មើសនេសាទដែលប្រើប្រាស់ឧបករណ៍ស្បៃមុងក្នុងរដូវ បិទនេសាទ ។ យុទ្ធនាការនេះធ្វើឡើងកាល
ខេត្តកណ្តាល ៖ កម្លាំងមន្ត្រីខណ្ឌរដ្ឋបាលជលផលកណ្តាលនិងកម្លាំងមន្ត្រីអធិការដ្ឋានរដ្ឋបាលជលផលចតុមុខ សហការជាមួយអាជ្ញាធរស្រុកពញាឮ និងកម្លាំងប៉ូលិសអធិការដ្ឋានស្រុកពញាឮបានចុះយុទ្ធនាការបង្ក្រាបបទល្មើសនេសាទដែលប្រើប្រាស់ឧបករណ៍ស្បៃមុងក្នុងរដូវបិទនេសាទ ។ យុទ្ធនាការនេះធ្វើឡើងកាលពីព្រឹកថ្ងៃទី២៣ សីហា នៅតាមដងទន្លេសាប និងក្នុងដែនឡូត៍នេសាទលេខ១៦ ស្ថិតក្នុងភូមិសាស្ត្រឃុំកំពង់អុស ស្រុកពញាឮ ខេត្តកណ្តាល។
លោកសេង ធីម នាយផ្នែករដ្ឋបាលជលផលបាសាក់បានឱ្យដឹងថា ជាលទ្ធផលកម្លាំងចម្រុះធ្វើការបង្ក្រាបបានសៃយឺន ស្បៃមុងចំនួន១៤៥ មាត់លូ ព្រួលស្បៃមុងប្រវែង៤.៥០០ម៉ែត្រ, ទូកមួយគ្រឿង, បង្គោលតូចធំចំនួន៤៧០ដើម, ចាក់លែងកូនត្រីចម្រុះក្នុងបឹងធម្មជាតិបានចំនួន៦៥០គីឡូក្រាម, រ៉ាវចំនួន៦មាត់និងរបាំងព្រួលសាច់អួនប្រវែង១២០ម៉ែត្រ។ ក្នុងប្រតិបត្តិការនោះសមត្ថកិច្ចបានឃាត់ខ្លួនជនល្មើសម្នាក់ឈ្មោះអុង ឌី ភេទប្រុស អាយុ៤៨ឆ្នាំ រស់នៅភូមិកំពុងអុស ឃុំកំពង់អុស ស្រុកពញាឮ ពីបទនេសាទប្រើឧបករណ៍ស្បៃមុងក្នុងរដូវបិទនេសាទរួចកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់ ។ ចំណែកឧបករណ៍នេសាទខុសច្បាប់ទាំងនោះត្រូវបានដុតកម្ទេចចោលផងដែរ ។
លោកសេង ធីម នាយផ្នែករដ្ឋបាលជលផលបាសាក់បានបន្តថា ការចុះបង្ក្រាបនេះដោយយោងតាមផែនការដាក់ចុះរបស់លោកឃ្លាំងវណ្ណធុល នាយខណ្ឌរដ្ឋបាលជលផលកណ្តាល និងការចង្អុលបង្ហាញដោយផ្ទាល់ពីលោកណៅ ធួក ប្រតិភូរាជរដ្ឋាភិបាល កម្ពុជាទទួលបន្ទុកជាប្រធានរដ្ឋបាលជលផលដែលលោកបានជំរុញដល់សមត្ថកិច្ចក្រោមឱវាទឱ្យចុះបង្ក្រាបញឹកញាប់ពិសេសក្នុងរដូវបិទនេសាទ នេះ ។ លោកក៏បានអំពាវនាវដល់ប្រជាពលរដ្ឋឱ្យឈប់នេសាទក្នុងរដូវបិទនេសាទពិសេសកុំប្រើប្រាស់ឧបករណ៍នេសាទខុសច្បាប់មានស្បៃមុងដើម្បីរក្សាធនធានមច្ឆជាតិឱ្យមានការកើនឡើង ៕
ចែករំលែកព័តមាននេះ