រាជធានីភ្នំពេញ ៖ ស្ត្រីដើររើសអេតចាយអនាថាម្នាក់ ត្រូវជនប្រមឹកវាយបែកក្បាល ខណៈពេលដែលទៅរើសកំប៉ុងស្រាបៀរនៅកន្លែងផឹកស៊ី កាលពីវេលាម៉ោង៦និង៣០នាទីល្ងាចថ្ងៃទី២៤ សីហា នៅខណ្ឌសែនសុខ។
តាមការឱ្យដឹងពីស្ត្រីរងគ្រោះក្នុងសភាពមិនសូវដឹងខុសត្រូវបានឱ្យដឹងថា នាងឈ្មោះលីនដា អាយុ២៧ឆ្នាំ មានស្រុកកំណើតនៅខេត្តបាត់ដំបង តែមកនៅភ្នំពេញដោយដើររើសអេតចាយយកប្រាក់ចិញ្ចឹមជីវិត។ នាងបានប្រាប់ថា នៅថ្ងៃកើតហេតុ នាងបានទៅរើសកំប៉ុងស្រាបៀរដែលគេកំពុងផឹកស៊ីជុំគ្នានៅមុខផ្ទះ ហើយពេលដែលនាងរើសនោះ ក្រុមអ្នកផឹកព្រមាននាងថា កុំមករញ៉េរញ៉ៃនៅទីនោះទៀត ប៉ុន្តែដោយសារនាងចង់បានសំបកកំប៉ុង សម្រាប់លក់ចិញ្ចឹមជីវិត ក៏ចេះតែទៅរើសទៀត ស្រាប់តែភ្លាមនោះបុរសប្រមឹកម្នាក់បានស្ទុះទៅយកដំបងវាយនាងទាំងកំរោល បណ្តាលឱ្យបែកក្បាលហូរឈាមតែម្តង។
បន្ទាប់ពីជនប្រមឹកវាយបែកក្បាលហើយ រថយន្តសាមុយរបស់គ្លីនិកសែនសុខបានដឹកនាងយកទៅព្យាបាលនៅមន្ទីរពេទ្យព្រះកុសុមៈ ។ ពេលដែលទៅដល់មន្ទីរពេទ្យនាងគ្មានសាច់ញាតិបងប្អូនទៅមើលទេ គឺដេកព្យាបាលនៅមន្ទីរពេទ្យតែម្នាក់ឯង។
អ្វីដែលគួរឱ្យអនិច្ចា និងអាណិតអាសូរជាងនេះទៅទៀត គឺនាងមិនត្រឹមតែគេវាយបែកក្បាលប៉ុណ្ណោះទេ ថែមទាំងធ្លាប់ត្រូវគេចាប់រំលោភរហូតបានកូនដល់ទៅ២នាក់ហើយ ។ ពេលនេះនាងកំពុងពពោះកូនទី៣ បាន២ខែទៀត មិនដឹងថា ជនឈាមខ្មៅណាទេ ដែលប្រព្រឹត្តអំពើដូចសត្វតិរច្ឆានបែបនេះលើរូបនាង ៕
ចែករំលែកព័តមាននេះ