សារព័ត៌មានរុស្ស៊ីរាយការណ៍ថា លោកគីម ជុងអ៊ីល មេដឹកនាំកំពូលរបស់កូរ៉េខាងជើងបានទៅដល់ទីក្រុងអ៊ូឡាន អ៊ូដ តំបន់ស៊ីបេរីកាលពីថ្ងៃទី២៣ សីហា ដើម្បីជួបពិភាក្សាជាមួយប្រធានាធិបតីរុស្ស៊ី លោកឌីមីទ្រី ម៉េដវេដេវ នៅទីនោះ។
នាថ្ងៃទី៤ នៃទស្សនកិច្ចរបស់លោកនៅរុស្ស៊ីរថភ្លើងពាសដែករបស់លោកគីម ជុងអ៊ីល បានទៅដល់ទីក្រុងអ៊ូឡាន អ៊ូដ តំបន់ប៊ូរយ៉ាទីយ៉ា (ស៊ីបេរី) ចម្ងាយប្រមាណជា៤៤២០គីឡូម៉ែត្រខាងកើតក្រុងម៉ូស្គូនាព្រឹកថ្ងៃទី២៣ សីហា ។ លោកត្រូវបានទទួលដោយបណ្តាមន្ត្រីរុស្ស៊ីនៅស្ថានីយរថភ្លើង ហើយលោកបានឡើងរថយន្តហែហមទៅកាន់កន្លែងមួយនាកណ្តាលក្រុង។ លោកត្រូវជួបពិភាក្សាជាមួយលោកម៉េដវេដេវនាថ្ងៃទី២៤ សីហា នៅភូមិសូស្នូវីប័រចម្ងាយ៥០គីឡូម៉ែត្រពីក្រុងអ៊ូឡាន អ៊ូដ។
មេដឹកនាំទាំង២នឹងពិភាក្សាគ្នាលើការអនុវត្តគម្រោង៣ ៖ គឺផ្លូវដែកមួយភ្ជាប់កូរ៉េខាងជើងទៅកូរ៉េខាងត្បូង បំពង់បង្ហូរប្រេងមួយ និងខ្សែកាបបញ្ជូនអគ្គិសនីពីរុស្ស៊ីទៅកូរ៉េខាងត្បូងកាត់តាមកូរ៉េខាងជើង។ ម្យ៉ាងទៀតលោកគីមនឹងទស្សនារោងចក្រផលិតយន្តហោះមួយ និងសហគ្រាសមួយនៃទីក្រុងនោះ។ ទស្សនកិច្ចរបស់លោកគីម ជុងអ៊ីល នៅរុស្ស៊ីក៏សំដៅផងដែរឱ្យទទួលបានជំនួយសេដ្ឋកិច្ចសម្រាប់ប្រទេសលោកដែលរងគ្រោះធ្ងន់ធ្ងរដោយទឹកជំនន់ ហើយកំពុងរងទណ្ឌកម្មសេដ្ឋកិច្ច ៕
ចែករំលែកព័តមាននេះ