ខេត្តរតនគិរី ៖ លោកយាយជរាទុរគតពីរនាក់ដែលដើរបេះបន្លែព្រៃ ស្លឹកបាស និងផ្ទីលក់យកកម្រៃចិញ្ចឹមជីវិតរស់យ៉ាងលំបាក និងធ្លាប់បានទទួលអំណោយរួមគ្នាពីសប្បុរសជនតាមរយៈកោះសន្តិភាពកាលពីថ្ងៃទី១៧ សីហា ម្តងរួចមកហើយ ចំពេលដែលលោកយាយម្នាក់ឈ្មោះយិន ឈៀង អាយុ៨៤ឆ្នាំ ធ្លាក់ខ្លួនឈឺធ្ងន់កំពុងសម្រាកស្តូកស្តឹងនៅផ្ទះរបស់គាត់ស្ថិតក្នុងភូមិត្រពាំងច្រេស ឃុំត្រពាំងច្រេស ស្រុកកូនមុំ នោះពេលនេះគាត់បានស្លាប់ហើយនៅវេលាម៉ោង១និង១០នាទីរសៀល ថ្ងៃទី២០ សីហា ។
ពេលនេះសប្បុរសជនបានផ្តល់អំណោយទឹកប្រាក់ជាលើកទីពីរជូនដល់លោកយាយឈ្មោះថី ដែលត្រូវជាបងប្អូនជីដូនមួយធ្លាប់ដើរបេះបន្លែព្រៃជាមួយគ្នាមួយចំនួន និងទឹកប្រាក់មួយចំនួនទៀតបានចូលជាបច្ច័យសម្រាប់ធ្វើបុណ្យបញ្ចុះសពលោកយាយយិន ឈៀង ផងដែរ តាមរយៈភ្នាក់ងារកោះសន្តិភាពយកទៅផ្តល់ជូនរួមគ្នានៅកន្លែងបុណ្យសពក្នុងភូមិត្រពាំងច្រេស ស្រុកកូនមុំ កាលពីព្រឹកថ្ងៃទី២១ សីហា កន្លងទៅនេះ។
កូនលោកយាយយិន ឈៀង បានប្រាប់ថា ម្តាយរបស់គាត់បានចែកឋានទៅហើយ កាលពីថ្ងៃទី២០ សីហា បន្ទាប់ពីគាត់សន្លប់ស្តូកស្តឹងមិនដឹងខ្លួននៅដង្ហើមតិចៗ ចាប់តាំងពីថ្ងៃទី៩ សីហា មកម៉្លេះ នៅពេលគាត់ចុះពីរថយន្តឈ្នួលមកពីក្រុងបានលុង ។
កូនរបស់លោកយាយ យិន ឈៀង និងលោកយាយថី បានថ្លែងអំណរគុណដល់សប្បុរសជនដែលមានចិត្តសប្បុរសធម៌បានផ្តល់អំណោយដ៏ថ្លៃថ្លាជាទឹកប្រាក់ជូនរូបគាត់ទាំងពីរនាក់ និងបានបួងសួងដល់វត្ថុស័ក្តិសិទ្ធិក្នុងលោក សូមជួយតាមថែរក្សាសប្បុរសជនដែលមានចិត្តបុណ្យទាំងអស់ជួបតែសេចក្តីសុខ និងសេចក្តីចម្រើនគ្រប់ប្រការកុំបីឃ្លៀងឃ្លាតឡើយ។
អំណោយជាប្រាក់ជូនដល់លោកយាយទាំងពីរនេះ បានពីការឧបត្ថម្ភរបស់សប្បុរសជន ១-លោកប៊ន ធារង្ស នាយផ្នែករដ្ឋបាលជលផលសេសាន ៥ម៉ឺនរៀល ២-ភ្នាក់ងារកោះសន្តិភាពប្រចាំខេត្ត ៥ម៉ឺនរៀល បន្ថែមពីលើទឹកប្រាក់សប្បុរសជនដែលផ្តល់តាមរយៈការិយាល័យនិពន្ធ ៣-លោកអ៊ា ផា និងលោកស្រី ពឹង វណ្ណា ១០ម៉ឺនរៀល ៤-លោកពឹង ចាន់ថា និងលោកស្រី ហួង ផល្លី ៤ម៉ឺនរៀល ៥-លោកពឹង ទិត្យតុលា និងលោកស្រី ផៃ ច័ន្ទណាវី ១០ម៉ឺនរៀល និង៦-លោកពឹង ចាន់ថូ និងលោកស្រីឡាយ ពិសី ៤ម៉ឺនរៀល ៕
សេចក្តីជូនដំណឹង
សូមជម្រាបជូនដល់បងប្អូនជនរួមជាតិដែលកំពុងរស់នៅក្រៅប្រទេស ឱ្យបានជ្រាបថា លោកណុប ច័ន្ទដារា រស់នៅក្រុងឡូសអេនចឺឡេស ទូរស័ព្ទលេខ ៥៦២ ៣១៣ ៣៦៩៩ អ៊ីម៉ែល ៖ cnop@juno.com គឺជាអ្នកទទួលរាល់ប្រាក់អំណោយសប្បុរសធម៌នានា ដែលបងប្អូនមានបំណងចង់ផ្ញើមកជួយដល់ជនរួមជាតិ តាមរយៈសារព័ត៌មានកោះសន្តិភាព ដោយយើងខ្ញុំសន្យាថានឹងពាំនាំទៅប្រគល់ដល់ដៃជនទុរគត ជនក្រីក្រ ឬជនជួបគ្រោះថ្នាក់ផ្សេងៗ មិនឱ្យខុសបំណងនោះទេ ។
ទូរស័ព្ទទាក់ទងលេខ (៨៥៥) ១៧៤៤៩០១៧ ឬអ៊ីម៉ែល ៖ News@kspg.co ឬ ads@kspg.co ៕
ចែករំលែកព័តមាននេះ