ពួកឧទ្ទាមលីប៊ីត្រូវសម្រេចថាតើពួកគេនឹងជាអ្នកកាត់ទោសកូនប្រុសលោកមូអាម៉ា កាដាហ្វី ម្នាក់ ឬត្រូវបញ្ជូនគេទៅកាន់តុលាការឧក្រិដ្ឋកម្មអន្តរជាតិ CPI ។ តំណាងរបស់ពួកឧទ្ទាមលីប៊ីនៅក្រុងប៉ារីសថ្លែងថា វាសនារបស់សីអ៊ីហ្វអាល់អ៊ិស្លាម កាដាហ្វីកូនប្រុសម្នាក់របស់លោកកាដាហ្វីដែលត្រូវចាប់ខ្លួនកាលពីថ្ងៃទី២១ សីហា ហើយជាជនមានដីកាចាប់ខ្លួនរបស់តុលាការ CPI ពីបទឧក្រិដ្ឋប្រឆាំងមនុស្សជាតិ នឹងជាកម្មវត្ថុនៃការអនុម័តមួយក្នុងផ្ទៃរបស់ក្រុមប្រឹក្សាជាតិបណ្តោះអាសន្នលីប៊ី CNT ។
លោក SAYF AL-NASR បេសកជនពិសេសរបស់CNT ប្រចាំប្រទេសបារាំងអះអាងថា CNT នឹងសម្រេចពីវាសនារបស់ជននេះថា តើត្រូវបញ្ជូនរូបគេទៅតុលាការCPI ឬត្រូវទទួលការកាត់ទោសនៅលីប៊ី។ លោកអះអាងថា នឹងមានការអនុម័តមួយក្នុងផ្ទៃក្រុមប្រឹក្សានេះ។ ពេលសួរចង់ដឹងថា ពេលនេះសីអ៊ីហ្វអាល់អ៊ីស្លាមនឹងត្រូវកាត់ទោស ឬយ៉ាងណា បេសកជនរូបនេះឆ្លើយថា ទេ។ លោកបន្តថា ជននេះអាចកាត់ទោសនៅលីប៊ីទាល់តែមានការបង្កើតតុលាការថ្មីនៅលីប៊ីសិន។ រូបគេនឹងទទួលបានការកាត់ទោសដ៏ត្រឹមត្រូវមួយជាមួយនឹងមេធាវីការពារ ព្រមទាំងមានពួកអ្នកសង្កេតការណ៍ និងបណ្តាអ្នកកាសែត។
សីអ៊ីហ្វ អាល់អ៊ីស្លាម ជាកូនប្រុសទី២របស់លោកកាដាហ្វី ហើយជាអ្នកនាំពាក្យមិនផ្លូវការរបស់របបលោកកាដាហ្វី រួចជារឿយៗរូបគេចាត់ទុកជាអ្នកបន្តវេនពីឪពុកផង។ CPI ចោទប្រកាន់រូបគេថា ដើរតួនាទីគន្លឹះក្នុងការបង្ក្រាបការបះបោរតាមគ្រប់មធ្យោបាយ ៕
ចែករំលែកព័តមាននេះ