ខេត្តប៉ៃលិន ៖ រាជរដ្ឋាភិបាលកម្ពុជា ក៏ដូចជាអង្គការក្រៅរដ្ឋាភិបាលផ្សេងៗ តែងផ្តល់កញ្ចប់ថវិកាយា៉ងច្រើន ដើម្បីស្ថាបនាអគារថ្មីៗ និងជួយកសាងបន្ថែមបំពេញការខ្វះខាតមួយចំនួនដល់មន្ទីរពេទ្យបង្អែកខេត្ត សំដៅផ្តល់ភាពងាយស្រួលដល់គ្រូពេទ្យធ្វើការ ព្រមទាំងផ្តល់កន្លែងដ៏ល្អសម្រាប់ប្រជាពលរដ្ឋសម្រាកព្យាបាលជំងឺ។
ជាការតបស្នងដល់ម្ចាស់អំណោយទើបនៅថ្ងៃទី១៩ សីហា ឆ្នាំ២០១១ វេលាម៉ោង៩ព្រឹក លោកផាប់ ស៊ូវិចិត្រ ប្រធានមន្ទីរពេទ្យបង្អែកខេត្ត បានប្រគល់វិញ្ញាបនបត្រថ្លែងអំណរគុណជូនដល់លោក Arjen Dondorp ប្រធានអង្គការម៉ូរូ ដែលបានផ្តល់អំណោយដ៏វិសេសវិសាលនេះជូនដល់មន្ទីរពេទ្យដែលបង្ហាញពីចំណងមិត្តភាពមួយ។
លោកវេជ្ជបណ្ឌិត ផាប់ ស៊ូវិចិត្រ មានប្រសាសន៍ថ្លែងអំណរគុណយ៉ាងជ្រាលជ្រៅ ជូនចំពោះអង្គការម៉ូរូ (MORU) ដែលបានចំណាយពេលវេលាកម្លាំងកាយចិត្ត និងប្រាក់កាសដ៏ច្រើនជួយដល់មន្ទីរពេទ្យបង្អែកខេត្ត ។ អង្គការម៉ូរូបានជួយកសាងផ្លូវពីអគារ២ជាន់មកអគារព្យាបាលជំងឺទូទៅដែលមានទទឹង៥ម៉ែត្រ និងបណ្តោយ១៥ម៉ែត្រ ព្រមទាំងបានជួយសាងសង់បន្ទប់អគារបេតុងដែលតភ្ជាប់ពីអគារព្យាបាលជំងឺទូទៅមួយកន្លែងទៀត ទំហំ៤ម៉ែត្រX១១ម៉ែត្រជាបន្ទប់សម្រាប់គ្រូពេទ្យប្រចាំការ និងជាឃ្លាំងសម្រាប់ដាក់សម្ភារពេទ្យ។ ក្នុងនោះមានបន្ទប់ទឹក៣សម្រាប់បុគ្គលិកពេទ្យ និងអ្នកជំងឺប្រើប្រាស់ ដោយចំណាយអស់ទឹកប្រាក់សរុបចំនួន ១២.០០០ដុល្លារអាមេរិក។
លោកផាប់ វិចិត្របានបន្តទៀតថា ទាំងនេះជាកាយវិការដ៏ថ្លៃថ្លារកអ្វីប្រៀបផ្ទឹមពុំបាន និងជាការផ្តល់នូវកិច្ចសហប្រតិបត្តិការល្អរវាងគ្នានឹងគ្នា ដើម្បីជួយអភិវឌ្ឍន៍មន្ទីរពេទ្យបង្អែកខេត្ត ឲ្យមានការរីកចម្រើនជឿនលឿនទៅមុខ។
លោកសេង រ៉ន ប្រធានមន្ទីរសុខាភិបាលខេត្តមានប្រសាសន៍ថា មន្ទីរពេទ្យបង្អែកខេត្តពិតជាមានអំណរយ៉ាងខ្លាំងចំពោះគុណបំណាច់របស់អង្គការម៉ូរូដែលមានចិត្តសប្បុរសធម៌ផ្តល់ជាអគារសម្រាប់សម្រួលដល់សេចក្តីត្រូវការរបស់គ្រូពេទ្យ និងបងប្អូនប្រជាពលរដ្ឋដែលកំពុងតែត្រូវការ។ ទន្ទឹមនឹងនេះផងដែរ មន្ទីរពេទ្យក៏នៅតែមានការខ្វះខាតមួយចំនួនទៀត សូមឱ្យអង្គការ និងសប្បុរសជនជួយបន្ថែម និងជួយជួសជុលឡើងវិញនូវអគារណាដែលចាស់ទ្រុឌទ្រោម។
លោក Arjen Dondorp ប្រធានអង្គការម៉ូរូ មានប្រសាសន៍ឲ្យដឹងដែរថា រូបលោកពិតជាស្រឡាញ់ប្រទេសកម្ពុជា និងប្រជាជនដែលរស់នៅក្នុងប្រទេសនេះណាស់ ទើបលោកមានចេតនាយ៉ាងខ្លាំងចំពោះការផ្តល់ជំនួយនេះ ហើយអង្គការរបស់លោកនៅតែរង់ចាំជួយឧបត្តម្ភគ្រប់ពេលវេលាដល់មន្ទីរពេទ្យនេះដែលត្រូវការកសាងនូវសមិទ្ធផលផ្សេងៗទៀតនោះ៕
ចែករំលែកព័តមាននេះ